ਸੈਂਟ ਐਲਬਰਟ ਵਿਚ ਆਪਣੀ ਪਾਰਟਨਰ ਅਤੇ ਧੀ ਦੇ ਕਤਲ ਦੇ ਦੋਸ਼ ਵਿਚ ਵਿਅਕਤੀ ਗ੍ਰਿਫਤਾਰ

ਐਲਬਰਟਾ ਦੇ ਸ਼ਹਿਰ ਸੈਂਟ ਐਲਬਰਟ ਵਿਚ ਇਕ ਵਿਅਕਤੀ ਨੂੰ ਆਪਣੀ 23 ਸਾਲਾ ਪਾਰਟਨਰ ਆਇਲਾ ਈਗੋਟਿਕ-ਲਰਨ ਦੇ ਕਤਲ ਅਤੇ 9 ਮਹੀਨਿਆਂ ਦੀ ਮਾਸੂਮ ਧੀ ਦੀ ਮੌਤ ਦੇ ਖ਼ਦਸ਼ੇ ਦੇ ਦੋਸ਼ ਵਿਚ ਹਿਰਾਸਤ ਵਿੱਚ ਲਿਆ ਗਿਆ ਹੈ। 23 ਜਨਵਰੀ ਨੂੰ ਸਟਰਜਨ ਪੁਆਇੰਟ ਵਿਲਾਸ ਅਪਾਰਟਮੈਂਟ ਦੇ ਪ੍ਰਬੰਧਕ ਇਕ ਕਿਰਾਏਦਾਰ ਨੂੰ ਘਰ ਖਾਲੀ ਕਰਵਾਉਣ ਲਈ ਪਹੁੰਚੇ। ਅਪਾਰਟਮੈਂਟ ਦੇ ਅੰਦਰ ਉਨ੍ਹਾਂ ਨੂੰ ਕੁਝ ਸ਼ੱਕੀ ਲੱਗਾ ਅਤੇ ਉਨ੍ਹਾਂ ਪੁਲਿਸ ਨੂੰ ਬੁਲਾਇਆ।

ਜਾਂਚ ਦੌਰਾਨ ਪੁਲਿਸ ਨੂੰ 23 ਸਾਲਾ ਆਇਲਾ ਦੀ ਲਾਸ਼ ਮਿਲੀ।ਆਇਲਾ ਦੀ 9 ਮਹੀਨਿਆਂ ਦੀ ਬੱਚੀ, ਬ੍ਰੇਲੀ ਬੀਸਲੀ ਗਾਇਬ ਹੈ। ਪੁਲਿਸ ਨੂੰ ਯਕੀਨ ਹੈ ਕਿ 33 ਸਾਲਾ ਕ੍ਰਿਸਟੋਫਰ ਵਿਲੀਅਮ ਬੀਸਲੀ ਨੇ ਬੱਚੀ ਦਾ ਵੀ ਕਤਲ ਕੀਤਾ ਹੈ। ਕ੍ਰਿਸਟੋਫਰ 'ਤੇ ਸੈਕਿੰਡ ਡਿਗਰੀ ਮਰਡਰ ਅਤੇ ਲਾਸ਼ਾਂ ਨਾਲ ਛੇੜ ਛਾੜ ਕਰਨ ਦੇ ਦੋਸ਼ ਵਿਚ ਚਾਰਜ ਕੀਤਾ ਗਿਆ ਹੈ।ਕ੍ਰਿਸਟੋਫਰ ਪਹਿਲਾਂ ਹੀ ਆਇਲਾ ਨਾਲ ਕੁੱਟਮਾਰ ਦੇ ਮਾਮਲੇ ਵਿੱਚ ਪ੍ਰੋਬੇਸ਼ਨ 'ਤੇ ਸੀ।

ਪੁਲਿਸ ਦਾ ਮੰਨਣਾ ਹੈ ਕਿ ਇਹ ਕਤਲ ਦਸੰਬਰ 2025 ਨੂੰ ਕੀਤਾ ਗਿਆ ਸੀ ਅਤੇ ਲਗਭਗ 8 ਹਫ਼ਤਿਆਂ ਤੱਕ ਕਿਸੇ ਨੂੰ ਇਸ ਬਾਰੇ ਪਤਾ ਨਹੀਂ ਲੱਗਿਆ। ਕ੍ਰਿਸਟੋਫਰ ਨੂੰ 2 ਫਰਵਰੀ ਨੂੰ ਅਦਾਲਤ ਵਿਚ ਪੇਸ਼ ਕੀਤਾ ਜਾਵੇਗਾ।