13.74C Vancouver 13.74C VancouverSep 8, 2021 12:49 AM -
ਸਰੀ ਦੇ ਮੇਅਰ ਡਗ ਮੈਕੁਲਮ 'ਤੇ ਹੋਏ ਕਥਿਤ ਸ਼ਬਦੀ ਹਮਲੇ ਅਤੇ ਉਨ੍ਹਾਂ ਦੇ ਪੈਰ 'ਤੇ ਕਥਿਤ ਤੌਰ 'ਤੇ ਗੱਡੀ ਚੜ੍ਹਾਉਣ ਦੇ ਮਾਮਲੇ 'ਚ ਪੁਲਿਸ ਨੇ ਗਵਾਹਾਂ ਨੂੰ ਸਾਹਮਣੇ ਆਉਣ ਦੀ ਅਪੀਲ ਕੀਤੀ ਹੈ।
ਮੈਕੁਲਮ ਨੇ ਇੱਕ ਬਿਆਨ 'ਚ ਦੱਸਿਆ ਹੈ ਕਿ ਉਨ੍ਹਾਂ ਦੇ ਪੈਰ ਦੇ ਉੱਤੋਂ ਇੱਕ ਗੱਡੀ ਲੰਘਾ ਦਿੱਤੀ ਗਈ।
ਡਗ ਮੈਕੁਲਮ ਨੇ ਇਲਜਾਮ ਲਗਾਏ ਹਨ ਕਿ ਉਹ ਗਰੋਸਰੀ ਸ਼ੌਪਿੰਗ ਲਈ ਗਏ ਸਨ ਅਤੇ ਇਸੇ ਦੌਰਾਨ ਉਨ੍ਹਾਂ ਨੂੰ ਕੁਝ ਲੋਕਾਂ ਦੀ ਤਿੱਖੀ ਟਿੱਪਣੀ ਦਾ ਸਾਹਮਣਾ ਕਰਨਾ ਪਿਆ ਤੇ ਉਸ ਤੋਂ ਬਾਅਦ ਇਹਨਾਂ ਲੋਕਾਂ ਨੇ ਉਨ੍ਹਾਂ ਦੇ ਪੈਰ 'ਤੇ ਗੱਡੀ ਚੜ੍ਹਾ ਦਿੱਤੀ।
ਮੈਕੁਲਮ ਨੇ ਇਸ ਤੋਂ ਵੱਧ ਇਸ ਮਾਮਲੇ ਬਾਰੇ ਕੁਝ ਨਹੀਂ ਦੱਸਿਆ।
ਹਾਲਾਂਕਿ ਸਰੀ ਆਰ.ਸੀ.ਐਮ.ਪੀ. ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੂੰ ਸਾਊਥ ਪਾਇੰਟ ਸੇਵ ਔਨ ਫੂਡਸ (South Point Save on Foods) 'ਤੇ ਸ਼ਨੀਵਾਰ ਨੂੰ ਸੱਦਿਆ ਗਿਆ ਸੀ।
ਉਨ੍ਹਾਂ ਨੂੰ ਜਾਣਕਾਰੀ ਮਿਲੀ ਸੀ ਕਿ ਇੱਕ-ਦੂਜੇ ਨੂੰ ਜਾਨਣ ਵਾਲੀਆਂ ਪਾਰਟੀਆਂ ਵਿਚਾਲੇ ਕਹਾਸੁਣੀ ਹੋਈ ਹੈ।
ਪੁਲਿਸ ਦਾ ਕਹਿਣਾ ਹੈ ਕਿ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਪੂਰਾ ਮਾਮਲਾ ਸਰੀ ਪੁਲਿਸ ਦੀ ਮਿਊਨਿਸਪਲ ਫੋਰਸ 'ਚ ਟ੍ਰਾਂਜ਼ਿਸ਼ਨ ਨਾਲ ਸੰਬੰਧਤ ਦੱਸਿਆ ਜਾ ਰਿਹਾ ਹੈ।
ਮੈਕੁਲਮ ਦੇ ਉਲਟ ਪੱਖ ਤੋਂ 'ਕੀਪ ਦ ਆਰ.ਸੀ.ਐਮ.ਪੀ. ਇਨ ਸਰੀ' (Keep the RCMP in Surrey) ਦੇ ਪ੍ਰਬੰਧਕ ਈਵਨ ਸਕੌਟ (Ivan Scott) ਦਾ ਕਹਿਣਾ ਹੈ ਕਿ ਮੈਕੁਲਮ ਦੀ ਪੈਰ ਮਿੱਧੇ ਜਾਣ ਦੀ ਗੱਲ ਝੂਠੀ ਹੈ।
ਸਕੌਟ ਦਾ ਕਹਿਣਾ ਹੈ ਕਿ ਉਹ ਇਸ ਮੁਹਿੰਮ ਤਹਿਤ ਲੋਕਾਂ ਦੇ ਹਸਤਾਖਰ ਲੈਣ ਲਈ ਜਗ੍ਹਾ-ਜਗ੍ਹਾ ਪਹੁੰਚ ਕਰ ਰਹੇ ਸਨ ਅਤੇ ਇਸੇ ਦੌਰਾਨ ਡਗ ਮੈਕੁਲਮ ਨੇ ਉਨ੍ਹਾਂ 'ਤੇ ਤਿੱਖੇ ਸ਼ਬਦ ਵਰਤੇ ਸਨ।
ਇਸ ਮਾਮਲੇ 'ਚ ਝੂਠ ਕੀ ਹੈ ਸੱਚ ਕੀ ਹੈ ਇਸ ਦਾ ਪਤਾ ਜਾਂਚ ਤੋਂ ਬਾਅਦ ਹੀ ਲੱਗੇਗਾ ਹਾਲਾਂਕਿ ਪਹਿਲਾਂ ਤੋਂ ਹੀ ਵਿਵਾਦਾਂ 'ਚ ਰਹੀ ਸਰੀ ਪੁਲਿਸ ਦੀ ਟ੍ਰਾਂਜ਼ਿਸ਼ਨ ਨਾਲ ਇੱਕ ਹੋਰ ਵਿਵਾਦ ਜੁੜ ਗਿਆ ਹੈ।
