ਨੈਨਾਈਮੋ ਵਿੱਚ ਵਾਹਨ ਅਤੇ ਕਮਿਊਨਟੀ ਮੇਲਬਾਕਸ ਦੀ ਭੰਨਤੋੜ ਦੀ ਜਾਂਚ ਜਾਰੀ

ਨੈਨਾਈਮੋ ਸ਼ਹਿਰ ਵਿਚ ਇੱਕ ਨਵੀਂ ਟੇਸਲਾ ਗੱਡੀ ਦੀ ਭੰਨਤੋੜ ਹੋਣ ਅਤੇ ਨੇੜੇ ਹੀ ਕਮਿਊਨਿਟੀ ਮੇਲਬਾਕਸ ਨੂੰ ਉਖਾੜੇ ਜਾਣ ਦੇ ਮਾਮਲੇ ਹੋਏ ਹਨ। ਆਰ.ਸੀ.ਐਮ.ਪੀ. ਮੁਤਾਬਕ, ਘਟਨਾ ਬੁੱਧਵਾਰ ਦੀ ਰਾਤ ਨੂੰ ਓਲਡ ਵਿਕਟੋਰੀਆ ਰੋਡ ਦੇ 900 ਬਲੌਕ ਵਿਚ ਵਾਪਰੀ।

ਪੁਲਿਸ ਮੁਤਾਬਕ, ਸੜਕ ਕਿਨਾਰੇ ਖੜ੍ਹੀ ਨਵੇਂ ਮਾਡਲ ਦੀ ਟੇਸਲਾ ਗੱਡੀ ਦੇ ਫਰੰਟ ਹੁੱਡ ਅਤੇ ਸਾਈਡ ਪੈਨਲਾਂ 'ਤੇ ਡੂੰਘੇ ਕੱਟ ਮਾਰੇ ਗਏ ਅਤੇ ਉਸ ਦਾ ਮੂਹਰਲਾ ਸ਼ੀਸ਼ਾ ਭੰਨ ਦਿੱਤਾ ਗਿਆ। ਗੱਡੀ ਤੋਂ ਕੁਝ ਹੀ ਮੀਟਰ ਦੀ ਦੂਰੀ 'ਤੇ ਸਥਿਤ ਕੈਨੇਡਾ ਪੋਸਟ ਦੇ ਕਈ ਮੇਲਬਾਕਸ ਆਪਣੀ ਜਗ੍ਹਾ ਤੋਂ ਉਖਾੜੇ ਹੋਏ ਮਿਲੇ।

ਨੈਨਾਈਮੋ ਆਰ.ਸੀ.ਐਮ.ਪੀ. ਵਲੋਂ ਸ਼ੱਕੀ ਤੱਕ ਪਹੁੰਚਣ ਲਈ ਲੋਕਾਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਜਿਹੜੇ ਲੋਕ 25 ਫਰਵਰੀ ਦੀ ਰਾਤ 11 ਵਜੇ ਤੋਂ ਅਗਲੀ ਸਵੇਰੇ 5 ਵਜੇ ਵਿਚਕਾਰ ਇਸ ਇਲਾਕੇ ਵਿਚੋਂ ਲੰਘੇ ਸਨ, ਉਹ ਆਪਣੀ ਡੈਸ਼ਕੈਮ ਫੁਟੇਜ ਦੀ ਜਾਂਚ ਕਰਨ ਅਤੇ ਜੇ ਕੁਝ ਸ਼ੱਕੀ ਮਿਲਦਾ ਹੈ ਤਾਂ ਪੁਲਿਸ ਨਾਲ ਸੰਪਰਕ ਕੀਤਾ ਜਾਵੇ। ਨੈਨਾਈਮੋ ਆਰ.ਸੀ.ਐਮ.ਪੀ. ਨੇ ਸਪੱਸ਼ਟ ਕੀਤਾ ਕਿ ਹੁਣ ਤੱਕ ਕਿਸੇ ਸ਼ੱਕੀ ਦੀ ਪਛਾਣ ਨਹੀਂ ਹੋ ਸਕੀ ਹੈ।