ਪੁਲਿਸ ਨੇ ਨਸ਼ਿਆਂ ਦੀ ਵੱਡੀ ਖੇਪ ਸਣੇ ਜ਼ਬਤ ਕੀਤਾ ਕੈਸ਼

ਕੈਨੇਡੀਅਨ ਲਾਅ ਇਨਫੋਰਸਮੈਂਟ ਏਜੰਸੀ ਨੇ ਇੱਕ ਸਾਂਝੇ ਅਤੇ ਵੱਡੇ ਓਪਰੇਸ਼ਨ ਤਹਿਤ ਹਜ਼ਾਰਾਂ ਕਿਲੋਗ੍ਰਾਮ ਪਾਬੰਦੀਸ਼ੁਦਾ ਨਸ਼ਾ ਅਤੇ ਇਨ੍ਹਾਂ ਤੋਂ ਇਕੱਠੇ ਕੀਤੇ ਗਏ $13.46 ਮਿਲੀਅਨ ਕੈਸ਼ ਜ਼ਬਤ ਕੀਤਾ ਹੈ। ਆਰ.ਸੀ.ਐਮ.ਪੀ. ਨੇ ਮੰਗਲਵਾਰ ਨੂੰ ਇੱਕ ਪ੍ਰੈੱਸ ਰਿਲੀਜ਼ ਵਿਚ ਇਸ ਦੀ ਜਾਣਕਾਰੀ ਦਿੰਦੇ ਕਿਹਾ ਕਿ ਨੈਸ਼ਨਲ ਫੈਂਟਾਨਿਲ ਸਪ੍ਰਿੰਟ 2.0 ਨਾਮਕ ਓਪ੍ਰੇਸ਼ਨ ਦੌਰਾਨ 386 ਕਿਲੋਗ੍ਰਾਮ ਫੈਂਟਾਨਿਲ, 5,989 ਕਿਲੋਗ੍ਰਾਮ ਕੋਕੀਨ ਅਤੇ 1,708 ਕਿਲੋਗ੍ਰਾਮ ਮੈਥਾਮਫੇਟਾਮਾਈਨ ਦੀ ਜ਼ਬਤੀ ਹੋਈ।

ਇਹ ਕਾਰਵਾਈ ਫੈਂਟਾਨਿਲ ਦੀ ਸਭ ਤੋਂ ਵੱਡੀ ਸਿੰਗਲ ਜ਼ਬਤੀਆਂ ਵਿਚੋਂ ਇੱਕ ਹੈ ਜੋ ਕਿ ਇੱਕ ਬਹੁਤ ਹੀ ਖਤਰਨਾਕ ਨਸ਼ਾ ਹੈ, ਜਿਸ ਦੀ ਥੋੜ੍ਹੀ ਜਿਹੀ ਮਾਤਰਾ ਵੀ ਜਾਨਲੇਵਾ ਸਾਬਤ ਹੋ ਸਕਦੀ ਹੈ।

ਇਸ ਓਪਰੇਸ਼ਨ ਨੂੰ 20 ਮਈ ਤੋਂ 31 ਅਕਤੂਬਰ ਤੱਕ ਸੀ.ਆਈ.ਆਰ.ਓ.ਸੀ. ਯਾਨੀ ਕੈਨੇਡੀਅਨ ਇੰਟੀਗ੍ਰੇਟਿਡ ਰਿਸਪਾਂਸ ਟੂ ਔਰਗਨਾਈਜਡ ਕ੍ਰਾਈਮ ਨਾਲ ਮਿਲ ਕੇ ਚਲਾਇਆ ਗਿਆ, ਜਿਸ ਦਾ ਉਦੇਸ਼ ਸੰਗਠਿਤ ਅਪਰਾਧ ਨੂੰ ਨੱਥ ਪਾਉਣਾ ਹੈ। ਆਰ.ਸੀ.ਐਮ.ਪੀ. ਮੁਤਾਬਕ, ਕਈ ਮਹੀਨਿਆਂ ਦੀ ਗੁਪਤ ਸੂਚਨਾ ਅਤੇ ਜਾਂਚ ਤੋਂ ਬਾਅਦ ਸਪ੍ਰਿੰਟ 2.0 ਓਪਰੇਸ਼ਨ ਦੌਰਾਨ ਕੈਨੇਡਾ ਭਰ ਵਿਚ 100 ਤੋਂ ਵੱਧ ਏਜੰਸੀਆਂ ਨੇ ਕਈ ਗ੍ਰਿਫਤਾਰੀਆਂ ਵੀ ਕੀਤੀਆਂ ਹਨ ਅਤੇ ਅੱਗੇ ਦੀ ਜਾਂਚ ਜਾਰੀ ਹੈ।