ਆਰ.ਸੀ.ਐਮ.ਪੀ. ਨੇ ਸਾਊਥ ਈਸਟ ਡਿਸਟ੍ਰਿਕ ਦੀ ਕਾਰਵਾਈ ਦੌਰਾਨ ਵੱਡੀ ਮਾਤਰਾ ਵਿੱਚ ਨਸ਼ੇ ਅਤੇ ਹਥਿਆਰ ਕੀਤੇ ਜ਼ਬਤ

ਕੈਲੋਨਾ ਅਤੇ ਪੈਂਟਿਕਟਨ ਵਿਚ ਆਰ.ਸੀ.ਐਮ.ਪੀ. ਨੇ 29 ਕਿਲੋ ਮੇਥਾਮਫੇਟਾਮਾਈਨ ਸਮੇਤ ਕਈ ਪਾਬੁੰਦੀਸ਼ੁਦਾ ਡਰੱਗਸ ਦੀ ਬਰਾਮਦਗੀ ਨਾਲ ਨਸ਼ਾ ਤਸਕਰਾਂ ਦੇ ਇੱਕ ਨੈੱਟਵਰਕ ਦਾ ਪਰਦਾਫਾਸ਼ ਕੀਤਾ ਹੈ। ਆਰ.ਸੀ.ਐਮ.ਪੀ. ਦੀ ਫੈਡਰਲ ਪੁਲਿਸਿੰਗ ਪੈਸੀਫਿਕ ਖੇਤਰ ਯੂਨਿਟ ਮੁਤਾਬਕ, ਇਹ ਜਾਂਚ 2024 ਵਿਚ ਸਾਊਥ ਈਸਟ ਡਿਸਟ੍ਰਿਕ ਵਿਚ ਸ਼ੁਰੂ ਹੋਈ ਸੀ।

17 ਦਸੰਬਰ 2025 ਨੂੰ ਤਿੰਨ ਘਰਾਂ ਅਤੇ ਦੋ ਗੱਡੀਆਂ ਦੀ ਤਲਾਸ਼ੀ ਲਈ ਗਈ, ਜਿਸ ਦੌਰਾਨ 4 ਵਿਅਕਤੀ ਹਿਰਾਸਤ ਵਿਚ ਲਏ ਗਏ। ਛਾਪੇਮਾਰੀ ਵਿਚ 18 ਕਿਲੋ ਕੋਕੀਨ, 4 ਕਿਲੋ ਫੈਂਟਾਨਿਲ, 8500 ਨਸ਼ੇ ਦੀਆਂ ਗੋਲੀਆਂ ਅਤੇ 50 ਲਿਟਰ ਦੇ ਕਰੀਬ ਨਸ਼ਾ ਬਣਾਉਣ ਵਾਲਾ ਮਾਲ ਤੇ ਕ੍ਰਾਈਮ ਜ਼ਰੀਏ ਕਮਾਏ ਗਈ $240,000 ਦੀ ਰਕਮ ਬਰਾਮਦ ਹੋਈ। ਇਸ ਕਾਰਵਾਈ ਵਿਚ ਕੈਲੋਨਾ, ਵੈਸਟ ਕੈਲੋਨਾ ਅਤੇ ਪੈਂਟਿਕਟਨ ਆਰ.ਸੀ.ਐਮ.ਪੀ. ਸਮੇਤ ਕੰਬਾਈਨਡ ਫੋਰਸ ਸਪੈਸ਼ਲ ਇਨਫੋਰਸਮੈਂਟ ਯੂਨਿਟ ਅਤੇ ਐਮਰਜੈਂਸੀ ਰਿਸਪਾਂਸ ਟੀਮ ਸ਼ਾਮਲ ਸਨ।

ਗ੍ਰਿਫ਼ਤਾਰ ਕੀਤੇ ਚਾਰਾਂ ਸ਼ੱਕੀਆਂ ਨੂੰ ਜਾਂਚ ਮੁਕੰਮਲ ਹੋਣ ਤੱਕ ਰਿਹਾਅ ਕਰ ਦਿੱਤਾ ਗਿਆ ਹੈ। ਆਰ.ਸੀ.ਐਮ.ਪੀ. ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਸ ਬਰਾਮਦਗੀ ਨਾਲ ਇਲਾਕੇ ਵਿਚ ਨਸ਼ਿਆਂ ਦੀ ਸਪਲਾਈ ਚੇਨ ਨੂੰ ਵੱਡੀ ਸੱਟ ਵੱਜੀ ਹੈ ਅਤੇ ਆਉਣ ਵਾਲੇ ਦਿਨਾਂ ਵਿਚ ਹੋਰ ਗ੍ਰਿਫ਼ਤਾਰੀਆਂ ਦੀ ਸੰਭਾਵਨਾ ਹੈ।