ਸਰੀ ਵਿਚ ਆਰ.ਸੀ.ਐਮ.ਪੀ. ਨੇ ਸ਼ੱਕੀ ਸਿੰਥੈਟਿਕ ਡਰੱਗ ਲੈਬ ਦਾ ਕੀਤਾ ਪਰਦਾਫਾਸ਼

ਸਰੀ ਵਿਚ ਆਰ.ਸੀ.ਐਮ.ਪੀ. ਦੀ ਫੈਡਰਲ ਪੁਲਿਸਿੰਗ ਪੈਸੀਫਿਕ ਖੇਤਰੀ ਟੀਮ ਨੇ ਇੱਕ ਸਿੰਥੈਟਿਕ ਡਰੱਗ ਲੈਬ ਦਾ ਪਰਦਾਫਾਸ਼ ਕੀਤਾ ਹੈ। ਰਿਚਮੰਡ ਵਿਚ ਵੀ ਇੱਕ ਵੱਡੀ ਕਾਰਵਾਈ ਕੀਤੀ ਗਈ,ਪੁਲਿਸ ਮੁਤਾਬਕ ਇਨ੍ਹਾਂ ਦੋ ਲੋਕਸ਼ਨਸ ਵਿਚ ਛਾਪੇਮਾਰੀ ਵਿਚ ਨਾ ਸਿਰਫ਼ ਵੱਡੀ ਮਾਤਰਾ ਵਿਚ ਨਸ਼ਾ ਬਰਾਮਦ ਹੋਇਆ ਬਲਕਿ ਹਥਿਆਰਾਂ ਦਾ ਇੱਕ ਵੱਡਾ ਜ਼ਖੀਰਾ ਵੀ ਜ਼ਬਤ ਕੀਤਾ ਗਿਆ,ਜੋ ਇਸ ਗੱਲ ਦਾ ਸੰਕੇਤ ਦਿੰਦਾ ਹੈ ਕਿ ਇਹ ਕਾਰੋਬਾਰ ਸੰਗਠਿਤ ਅਪਰਾਧਿਕ ਸਮੂਹ ਵਲੋਂ ਚਲਾਇਆ ਜਾ ਰਿਹਾ ਸੀ।

ਆਰ.ਸੀ.ਐਮ.ਪੀ.ਮੁਤਾਬਕ, ਜਾਂਚ ਗਰਮੀਆਂ ਵਿਚ ਸ਼ੁਰੂ ਹੋਈ ਸੀ,ਜਿਸ ਤਹਿਤ ਸਰੀ ਵਿਚ 54 ਏ ਐਵੇਨਿਊ ਦੇ 12900-ਬਲਾਕ ਵਿਚ ਸਿੰਥੈਟਿਕ ਡਰੱਗ ਮਿਲੀ,ਜੋ ਫੈਂਟਾਨਿਲ ਬਣਾਉਣ ਵਿਚ ਸ਼ਾਮਲ ਸੀ। ਉਥੇ ਹੀ,ਰਿਚਮੰਡ ਵਿਚ ਮੈਕਨੀਲੀ ਡਰਾਈਵ ਦੇ 12300-ਬਲਾਕ ਦੇ ਇੱਕ ਰਿਹਾਇਸ਼ ਵਿਚ ਸਰਚ ਵਾਰੰਟ ਲਾਗੂ ਕੀਤੇ ਗਏ ਸਨ,ਜਿੱਥੇ ਅਧਿਕਾਰੀਆਂ ਨੇ ਡਰੱਗ ਅਤੇ $86,000 ਕੈਸ਼ ਜ਼ਬਤ ਕੀਤਾ।

ਇਸ ਓਪਰੇਸ਼ਨ ਵਿਚ 14 ਕਿਲੋਗ੍ਰਾਮ ਸ਼ੱਕੀ ਫੈਂਟਾਨਿਲ, 13 ਹਥਿਆਰ, 4 ਕੰਡਕਟਡ ਐਨਰਜੀ ਵੈਪੰਸ ਅਤੇ ਕਾਰਤੂਸ ਤੋਂ ਇਲਾਵਾ ਸਾਈਲੈਂਸਰ ਜ਼ਬਤ ਹੋਏ। ਆਰ.ਸੀ.ਐਮ.ਪੀ. ਨੇ 14 ਸਤੰਬਰ ਨੂੰ ਸਰੀ ਅਤੇ ਰਿਚਮੰਡ ਵਿਚ ਦੋ ਜਾਇਦਾਦਾਂ 'ਤੇ ਤਲਾਸ਼ੀ ਵਾਰੰਟ ਜਾਰੀ ਕੀਤੇ ਸਨ। ਰਿਚਮੰਡ ਵਾਲੀ ਥਾਂ 'ਤੇ ਇੱਕ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਗਿਆ ਸੀ ਪਰ ਉਸ ਨੂੰ ਅਗਲੇਰੀ ਜਾਂਚ ਹੋਣ ਤੱਕ ਬਿਨਾਂ ਕਿਸੇ ਦੋਸ਼ ਦੇ ਰਿਹਾਅ ਕੀਤਾ ਜਾ ਚੁੱਕਾ ਹੈ।