14.31C Vancouver 14.31C VancouverOct 10, 2023 6:42 PM - Connect News
ਆਰਸੀਐੱਮਪੀ ਨੇ ਮੰਗਲਵਾਰ ਨੂੰ ਘੋਸ਼ਣਾ ਕੀਤੀ ਕਿ ਉਨ੍ਹਾਂ ਨੇ ਓਨਟੇਰਿਓ ਦੇ ਪ੍ਰੀਮੀਅਰ ਡਗ ਫੋਰਡ ਦੀ ਗ੍ਰੀਨਬੈਲਟ ਜ਼ਮੀਨ ਨੂੰ ਵਿਕਾਸ ਲਈ ਖੋਲ੍ਹਣ ਦੀ ਯੋਜਨਾ ਦੀ ਅਪਰਾਧਿਕ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਆਰਸੀਐੱਮਪੀ ਦੇ ਬੁਲਾਰੇ ਨੇ ਮੰਗਲਵਾਰ ਨੂੰ ਇੱਕ ਬਿਆਨ ਵਿੱਚ ਕਿਹਾ ਹੈ ਕਿ ਓਨਟੇਰਿਓ ਪ੍ਰੋਵਿੰਸ਼ੀਅਲ ਪੁਲਿਸ ਦੇ ਹਵਾਲੇ ਤੋਂ ਬਾਅਦ ਆਰਸੀਐੱਮਪੀ ਓ ਡਿਵੀਜ਼ਨ ਦੀ ਸੈਂਸਟਿਵ ਅਤੇ ਅੰਤਰਰਾਸ਼ਟਰੀ ਜਾਂਚ ਯੂਨਿਟ ਨੇ ਵਿਕਾਸ ਲਈ ਗ੍ਰੀਨਬੈਲਟ ਦੇ ਹਿੱਸੇ ਨੂੰ ਖੋਲ੍ਹਣ ਦੇ ਫੈਸਲੇ ਨਾਲ ਜੁੜੇ ਦੋਸ਼ਾਂ ਦੀ ਜਾਂਚ ਸ਼ੁਰੂ ਕੀਤੀ ਹੈ।
ਉਨ੍ਹਾਂ ਨੇ ਕਿਹਾ ਕਿ ਜਾਂਚ ਨਿਰਪੱਖ ਅਤੇ ਸਹੀ ਕੀਤੀ ਜਾਵੇਗੀ ਤਾਂ ਜੋ ਕੈਨੇਡੀਅਨ ਅਸਲ ਸੱਚ ਜਾਣ ਸਕਣ।
ਆਰਸੀਐੱਮਪੀ ਦੇ ਬੁਲਾਰੇ ਨੇ ਕਿਹਾ ਕਿ ਇਸ ਮਾਮਲੇ ਬਾਰੇ ਹੋਰ ਵਧੇਰੇ ਜਾਣਕਾਰੀ ਨਹੀਂ ਦਿੱਤੀ ਜਾਵੇਗੀ, ਕਿਉਂਕਿ ਇਸਦੀ ਜਾਂਚ ਸ਼ੁਰੂ ਹੋ ਚੁੱਕੀ ਹੈ ਜਲਦ ਨਤੀਜੇ 'ਤੇ ਪਹੁੰਚ ਕੇ ਅਪਡੇਟ ਪ੍ਰਦਾਨ ਕੀਤੀ ਜਾਵੇਗੀ।
ਜ਼ਿਕਰਯੋਗ ਹੈ ਕਿ ਓਨਟੇਰਿਓ ਸਰਕਾਰ ਵਿਵਾਦਗ੍ਰਸਤ ਗ੍ਰੀਨਬੈਲਟ ਮਾਮਲੇ ਵਿੱਚ ਆਪਣੀ ਦਿਸ਼ਾ ਬਦਲਦਿਆਂ ਸੁਰੱਖਿਅਤ ਜ਼ਮੀਨ ਨੂੰ ਨਿਰਮਾਣ ਲਈ ਖੋਲਣ ਦੇ ਫ਼ੈਸਲੇ ਤੋਂ ਪਿੱਛੇ ਹਟ ਗਈ ਹੈ।
ਪ੍ਰੀਮੀਅਰ ਡਗ ਫ਼ੋਰਡ ਨੇ ਇਸ ਬਾਰੇ ਐਲਾਨ ਕੀਤਾ ਸੀ ਕਿ ਉਹ ਲੋਕਾਂ ਨਾਲ ਵਾਅਦਾ ਕੀਤਾ ਸੀ ਕਿ ਗ੍ਰੀਨਬੈਲਟ ਨੂੰ ਛੂਹਿਆ ਨਹੀਂ ਜਾਵੇਗਾ, ਪਰ ਉਹ ਵਾਅਦਾ ਨਹੀਂ ਨਿਭਾ ਸਕੇ, ਜਿਸਦੇ ਲਈ ਉਨ੍ਹਾਂ ਨੇ ਸੂਬਾ ਨਿਵਾਸੀਆਂ ਤੋਂ ਮੁਆਫ਼ੀ ਮੰਗੀ ਸੀ।
ਪਿਛਲੇ ਸਾਲ ਸੂਬਾ ਸਰਕਾਰ ਨੇ ਰਿਹਾਇਸ਼ੀ ਸੰਕਟ ਦਾ ਹਵਾਲਾ ਦਿੰਦੇ ਹੋਏ 50,000 ਘਰ ਬਣਾਉਣ ਲਈ ਗ੍ਰੀਨਬੈਲਟ ਵਿੱਚੋਂ 7,400 ਏਕੜ ਜ਼ਮੀਨ ਲਈ ਸੀ, ਪਰ ਆਡੀਟਰ ਜਨਰਲ ਅਤੇ ਇੰਟੈਗ੍ਰਿਟੀ ਕਮਿਸ਼ਨਰ ਦੀਆਂ ਰਿਪੋਰਟਾਂ ਵਿੱਚ ਪਾਇਆ ਗਿਆ ਸੀ ਕਿ ਜ਼ਮੀਨਾਂ ਦੀ ਚੋਣ ਕਰਨ ਦੀ ਪ੍ਰਕਿਰਿਆ ਵਿੱਚ ਜਲਦਬਾਜ਼ੀ ਕੀਤੀ ਗਈ ਸੀ ਅਤੇ ਇਸ ਦੌਰਾਨ ਕੁਝ ਡਿਵੈਲਪਰਾਂ ਦਾ ਪੱਖ ਪੂਰਿਆ ਗਿਆ ਸੀ।
