ਬੀ. ਸੀ. ਸਰਕਾਰ ਮੁੜ ਤਿਆਰ ਕਰੇਗੀ ਦੋ ਸਾਲ ਪਹਿਲਾਂ ਅੱਗ ਕਰਨ ਤਬਾਹ ਹੋਏ ਸਕੂਲ ਨੂੰ

ਬੀ. ਸੀ. ਸਰਕਾਰ ਨੇ ਲਗਭਗ ਦੋ ਸਾਲ ਪਹਿਲਾਂ ਸ਼ੱਕੀ ਅੱਗ ਨਾਲ ਤਬਾਹ ਹੋਏ ਪੋਰਟ ਕੋਕਟਲਮ ਦੇ ਇੱਕ ਐਲੀਮੈਂਟਰੀ ਸਕੂਲ ਨੂੰ ਫਿਰ ਸਥਾਪਤ ਕਰਨ ਦੀ ਯੋਜਨਾ ਨੂੰ ਹਰੀ ਝੰਡੀ ਦਿੱਤੀ ਹੈ। ਸੂਬਾ ਸਰਕਾਰ ਨੇ ਸ਼ੁੱਕਰਵਾਰ ਨੂੰ ਐਲਾਨ ਕੀਤਾ ਕਿ 240 ਸੀਟਾਂ ਵਾਲਾ ਇੱਕ ਆਧੁਨਿਕ ਨਵਾਂ ਸਕੂਲ ਉਸੇ ਥਾਂ 'ਤੇ ਬਣਾਇਆ ਜਾਵੇਗਾ, ਜਿੱਥੇ ਹੇਜ਼ਲ ਟ੍ਰੇਮਬਥ ਐਲੀਮੈਂਟਰੀ ਸਕੂਲ ਦੀ ਇਮਾਰਤ 14 ਅਕਤੂਬਰ 2023 ਨੂੰ ਸੜ ਗਈ ਸੀ।

ਇੰਫਰਾਸਟਰਕਚਰ ਮੰਤਰੀ ਬੋਵਿਨ ਮਾ ਨੇ ਕਿਹਾ ਕਿ ਅਸੀਂ ਜਾਣਦੇ ਹਾਂ ਕਿ ਹੇਜ਼ਲ ਟ੍ਰੇਮਬਥ ਐਲੀਮੈਂਟਰੀ ਸਕੂਲ ਦੇ ਨੁਕਸਾਨ ਨੇ ਮਾਪਿਆਂ, ਵਿਦਿਆਰਥੀਆਂ, ਅਧਿਆਪਕਾਂ ਅਤੇ ਸਟਾਫ਼ ਨੂੰ ਡੂੰਘਾ ਪ੍ਰਭਾਵਿਤ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਮੈਂ ਲੋਕਲ ਸਕੂਲ ਡਿਸਟ੍ਰਿਕ ਦਾ ਧੰਨਵਾਦ ਕਰਦੀ ਹਾਂ ਜੋ ਇਸ ਨਵੇਂ ਸਕੂਲ ਨੂੰ ਪਰਿਵਾਰਾਂ ਲਈ ਜਲਦੀ ਤਿਆਰ ਕਰਨ ਲਈ ਸਾਡੇ ਨਾਲ ਸਹਿਯੋਗ ਕਰ ਰਿਹਾ ਹੈ।

ਇਸ ਪ੍ਰੋਜੈਕਟ ਦਾ ਕੁੱਲ ਖ਼ਰਚ ਲਗਭਗ $39 ਮਿਲੀਅਨ ਤੱਕ ਪਹੁੰਚਣ ਦੀ ਉਮੀਦ ਹੈ। ਬੋਵਿਨ ਮਾ ਨੇ ਕਿਹਾ ਕਿ ਉਸਾਰੀ ਜੁਲਾਈ 2026 ਵਿਚ ਸ਼ੁਰੂ ਹੋ ਜਾਵੇਗੀ ਅਤੇ ਇਸ ਦੇ ਦਸੰਬਰ 2027 ਵਿਚ ਖੁੱਲ੍ਹਣ ਦੀ ਉਮੀਦ ਹੈ।