ਰਿਚਮੰਡ ਆਰ.ਸੀ.ਐਮ.ਪੀ.ਪਿਛਲੇ ਮਹੀਨੇ ਹੋਈ ਗੰਭੀਰ ਟੱਕਰ ਦੇ ਸੰਬੰਧ 'ਚ ਗਵਾਹਾਂ ਨੂੰ ਅੱਗੇ ਆਉਣ ਦੀ ਕੀਤੀ ਅਪੀਲ

ਰਿਚਮੰਡ ਆਰ.ਸੀ.ਐਮ.ਪੀ. ਨੇ ਪਿਛਲੇ ਮਹੀਨੇ ਦੋ ਵਾਹਨਾਂ ਦੀ ਹੋਈ ਗੰਭੀਰ ਟੱਕਰ ਦੇ ਸਬੰਧ ਵਿਚ ਗਵਾਹਾਂ ਨੂੰ ਅੱਗੇ ਆਉਣ ਦੀ ਅਪੀਲ ਕੀਤੀ ਹੈ, ਇਸ ਟੱਕਰ ਵਿਚ ਇੱਕ ਮੋਟਰਸਾਈਕਲ ਸਵਾਰ ਨੂੰ ਗੰਭੀਰ ਸੱਟਾਂ ਆਈਆਂ ਸਨ ਜੋ ਅਜੇ ਵੀ ਹਸਪਤਾਲ ਵਿਚ ਹੈ ਜਿਥੇ ਉਸ ਦੀ ਹਾਲਤ ਨਾਜ਼ੁਕ ਬਣੀ ਹੋਈ ਹੈ।

ਪੁਲਿਸ ਅਨੁਸਾਰ, 23 ਅਕਤੂਬਰ ਨੂੰ ਦੁਪਹਿਰ ਲਗਭਗ 12 ਵਜੇ ਨੰ 4 ਰੋਡ ਅਤੇ ਔਡਲਿਨ ਰੋਡ ਦੇ ਚੌਰਾਹੇ ’ਤੇ ਇੱਕ grey Yamaha R7 ਮੋਟਰਸਾਈਕਲ ਅਤੇ ਇੱਕ ਬਲੈਕ ਵੋਲਵੋ XC90 ਦੀ ਟੱਕਰ ਹੋਈ ਸੀ। ਇਸ ਵਿਚ ਮੋਟਰਸਾਈਕਲ ਚਾਲਕ ਨੂੰ ਗੰਭੀਰ ਸੱਟਾਂ ਨਾਲ ਹਸਪਤਾਲ ਲਿਜਾਇਆ ਗਿਆ, ਜਦੋਂ ਕਿ ਵੋਲਵੋ ਗੱਡੀ ਦੇ ਡਰਾਈਵਰ ਨੂੰ ਕੋਈ ਵੱਡੀ ਸੱਟ ਨਹੀਂ ਲੱਗੀ।

ਰਿਚਮੰਡ ਆਰ.ਸੀ.ਐਮ.ਪੀ. ਦੀ ਕ੍ਰਿਮਿਨਲ ਕੋਲਿਜ਼ਨ ਇਨਵੈਸਟੀਗੇਸ਼ਨ ਟੀਮ ਮਾਮਲੇ ਦੀ ਜਾਂਚ ਕਰ ਰਹੀ ਹੈ, ਜਿਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੋ ਹਾਦਸੇ ਵਾਲੇ ਦਿਨ ਦੁਪਹਿਰ ਕਰੀਬ 11:45 ਵਜੇ ਤੋਂ 12:10 ਵਜੇ ਦਰਮਿਆਨ ਨੰ 4 ਰੋਡ ਅਤੇ ਔਡਲਿਨ ਰੋਡ ਦੇ ਇਲਾਕੇ ਵਿਚ ਸਨ ਅਤੇ ਜਿਨ੍ਹਾਂ ਨੇ ਇਹ ਟੱਕਰ ਦੇਖੀ ਹੋਵੇ ਜਾਂ ਡੈਸ਼ ਕੈਮ ਫੁਟੇਜ ਹੋਵੇ ਉਹ ਰਿਚਮੰਡ ਆਰ.ਸੀ.ਐਮ.ਪੀ. ਨਾਲ ਸੰਪਰਕ ਕਰ ਸਕਦੇ ਹਨ।