ਸਾ

ਰਿਚਮੰਡ ਆਰ.ਸੀ.ਐਮ.ਪੀ. ਦੇ ਰੋਡ ਸੇਫਟੀ ਯੂਨਿਟ ਵੱਲੋਂ ਗੈਰ-ਕਾਨੂੰਨੀ ਰਾਈਡ ਹੇਲਿੰਗ ਆਪਰੇਟਰ ਵਿਰੁੱਧ ਵੱਡੀ ਕਾਰਵਾਈ ਕੀਤੀ ਗਈ ਹੈ। 2 ਜਨਵਰੀ ਨੂੰ ਪੁਲਿਸ ਨੇ ਕਮਰਸ਼ੀਅਲ ਵ੍ਹੀਕਲ ਸੇਫਟੀ ਇਨਫੋਰਸਮੈਂਟ ਨਾਲ ਮਿਲ ਕੇ ਇੱਕ ਟਾਰਗੇਟਿਡ ਮੁਹਿੰਮ ਚਲਾਈ, ਜਿਸ ਵਿਚ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲੇ ਬਿਨਾਂ ਲਾਇਸੈਂਸ ਵਾਲੀ ਸਵਾਰੀ ਡਰਾਈਵਰਾਂ ਨੂੰ ਕੁੱਲ $10,615 ਦਾ ਜੁਰਮਾਨਾ ਲੱਗਾ ਹੈ।

ਪੁਲਿਸ ਅਨੁਸਾਰ, ਇਸ ਕਾਰਵਾਈ ਦੌਰਾਨ ਕਈ ਗੰਭੀਰ ਮਾਮਲੇ ਸਾਹਮਣੇ ਆਏ। ਡਰਾਈਵਰਾਂ ਵਿਚੋਂ ਇੱਕ ਅਜਿਹਾ ਡਰਾਈਵਰ ਸੀ ਜਿਸ ਨੇ 2024 ਤੋਂ ਹੁਣ ਤੱਕ ਪੰਜ ਹਿੰਸਕ ਅਪਰਾਧ ਕੀਤੇ ਸਨ, ਜਿਸ ਕਾਰਨ ਉਹ ਕਿਸੇ ਵੀ ਟੈਕਸੀ ਕੰਪਨੀ ਵਿਚ ਕੰਮ ਕਰਨ ਦੇ ਯੋਗ ਨਹੀਂ ਸੀ। ਇੱਕ ਹੋਰ ਡਰਾਈਵਰ ਦਾ ਲਾਇਸੈਂਸ ਦੋ ਮਹੀਨੇ ਪਹਿਲਾਂ ਕਮਜ਼ੋਰ ਡਰਾਈਵਿੰਗ ਦੇ ਕੇਸ ਵਿਚ ਰੱਦ ਕੀਤਾ ਜਾ ਚੁੱਕਾ ਸੀ।

ਰਿਚਮੰਡ ਆਰ.ਸੀ.ਐਮ.ਪੀ. ਦੇ ਰੋਡ ਸੇਫਟੀ ਯੂਨਿਟ ਦੇ ਕਾਂਸਟੇਬਲ ਫ੍ਰੈਂਕ ਟਰਾਪੇ ਨੇ ਚਿਤਾਵਨੀ ਦਿੱਤੀ ਕਿ ਗੈਰ-ਕਾਨੂੰਨੀ ਐਪਸ ਜਾਂ ਪਲੇਟਫਾਰਮ ਰਾਹੀਂ ਸਫਰ ਕਰਨਾ ਜਨਤਾ ਲਈ ਖ਼ਤਰਨਾਕ ਹੈ। ਉਨ੍ਹਾਂ ਕਿਹਾ ਕਿ ਅਜਿਹੇ ਡਰਾਈਵਰਾਂ ਦਾ ਕੋਈ ਕ੍ਰਿਮੀਨਲ ਰਿਕਾਰਡ ਚੈੱਕ ਨਹੀਂ ਹੁੰਦਾ ਅਤੇ ਨਾ ਹੀ ਉਨ੍ਹਾਂ ਕੋਲ ਕਮਰਸ਼ੀਅਲ ਇੰਸ਼ੋਰੈਂਸ ਹੁੰਦਾ ਹੈ, ਜੇਕਰ ਸਫਰ ਦੌਰਾਨ ਕੋਈ ਦੁਰਘਟਨਾ ਵਾਪਰਦੀ ਹੈ ਤਾਂ ਪੁਲਿਸ ਲਈ ਅਜਿਹੇ ਡਰਾਈਵਰਾਂ ਜਾਂ ਵਾਹਨਾਂ ਨੂੰ ਟਰੇਸ ਕਰਨਾ ਮੁਸ਼ਕਲ ਹੋ ਜਾਂਦਾ ਹੈ। ਪੁਲਿਸ ਨੇ ਲੋਕਾਂ ਨੂੰ ਆਪਣੇ ਏਰੀਏ ਵਿਚ ਸਿਰਫ ਮਾਨਤਾ ਪ੍ਰਾਪਤ ਅਤੇ ਲਾਇਸੈਂਸਸ਼ੁਦਾ ਟੈਕਸੀ ਅਤੇ ਰਾਈਡ ਹੇਲਿੰਗ ਸਰਵਿਸ ਦੀ ਵਰਤੋਂ ਕਰਨ ਦੀ ਅਪੀਲ ਕੀਤੀ ਹੈ।