ਰਿਚਮੰਡ ਆਰ.ਸੀ.ਐਮ.ਪੀ. ਵੱਲੋਂ ਵਾਹਨਾਂ ਦੀ ਧੋਖਾਧੜੀ ਵਾਲੀ ਵਿਕਰੀ ਬਾਰੇ ਲੋਕਾਂ ਨੂੰ ਦਿੱਤੀ ਗਈ ਚਿਤਾਵਨੀ

ਬੀ. ਸੀ. ਵਿਚ ਇੱਕ ਵ੍ਹੀਕਲ ਸਕੈਮ ਸਾਹਮਣੇ ਆਇਆ ਹੈ, ਜਿਸ ਵਿਚ ਪੀੜਤ ਅਣਜਾਣੇ ਵਿਚ ਅਪਰਾਧਿਕ ਜੁਰਮ ਵਿਚ ਘਸੀਟੇ ਜਾ ਸਕਦੇ ਹਨ। ਰਿਚਮੰਡ ਆਰ.ਸੀ.ਐਮ.ਪੀ. ਵਲੋਂ ਇਸ ਧੋਖਾਧੜੀ ਬਾਰੇ ਲੋਕਾਂ ਨੂੰ ਚਿਤਾਵਨੀ ਦਿੱਤੀ ਗਈ ਹੈ। ਇਸ ਵਿਚ ਪੀੜਤਾਂ ਨੂੰ ਹਾਈ ਡਿਮਾਂਡ ਲਗਜ਼ਰੀ ਗੱਡੀਆਂ ਦੀ ਖਰੀਦ ਅਤੇ ਐਕਸਪੋਰਟ ਨਾਲ ਪੈਸੇ ਕਮਾਉਣ ਦੇ ਮੌਕਿਆਂ ਬਾਰੇ ਸੰਪਰਕ ਕੀਤਾ ਜਾਂਦਾ ਹੈ।

ਪੀੜਤ ਕਿਸੇ ਥਰਡ ਪਾਰਟੀ ਫਾਇਨਾਂਸਿੰਗ ਨਾਲ ਗੱਡੀ ਖਰੀਦਦਾ ਹੈ, ਉਸ ਨੂੰ ਆਪਣੇ ਨਾਂ ਉਤੇ ਰਜਿਸਟਰਡ ਕਰਵਾਉਂਦਾ ਹੈ ਤੇ ਫਿਰ ਗੱਡੀ ਨੂੰ ਕਿਸੇ ਹੋਰ ਸਥਾਨ 'ਤੇ ਸਟੋਰ ਕਰ ਦਿੱਤਾ ਜਾਂਦਾ ਹੈ, ਜਿਸ ਤੋਂ ਥੋੜ੍ਹੀ ਦੇਰ ਬਾਅਦ ਪੀੜਤ ਨੂੰ ਦੱਸਿਆ ਜਾਂਦਾ ਹੈ ਕਿ ਗੱਡੀ ਚੋਰੀ ਹੋ ਗਈ ਹੈ ਅਤੇ ਉਸ ਨੂੰ ਇਸ ਦੀ ਰਿਪੋਰਟ ਆਈ.ਸੀ.ਬੀ.ਸੀ. ਨੂੰ ਕਰਨੀ ਚਾਹੀਦੀ ਹੈ।

ਰਿਚਮੰਡ ਆਰ.ਸੀ.ਐਮ.ਪੀ. ਦੀ ਪ੍ਰਾਪਰਟੀ ਕ੍ਰਾਈਮ ਯੂਨਿਟ ਦੇ ਕਾਰਪੋਰਲ ਰਿਆਨ ਲੀ ਨੇ ਕਿਹਾ ਕਿ ਵਿਕਟਮ ਅਣਜਾਣੇ ਵਿਚ ਮਨੀ ਮਿਊਲ ਦੇ ਰੂਪ ਵਿਚ ਇੱਕ ਅਪਰਾਧਿਕ ਜੁਰਮ ਵਿਚ ਹਿੱਸਾ ਲੈ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਮਨੀ ਮਿਊਲ ਉਹ ਹੈ ਜਿੱਥੇ ਕੋਈ ਵਿਅਕਤੀ ਕ੍ਰਿਮੀਨਲ ਦੇ ਬੈਨਫ 'ਤੇ ਗੈਰ-ਕਾਨੂੰਨੀ ਢੰਗ ਨਾਲ ਪ੍ਰਾਪਤ ਪੈਸੇ ਨੂੰ ਟ੍ਰਾਂਸਫਰ ਕਰਦਾ ਹੈ, ਹਾਲਾਂਕਿ, ਇਸ ਮਾਮਲੇ ਵਿਚ ਪੈਸੇ ਦੀ ਬਜਾਏ ਵਾਹਨ ਵਰਤੇ ਜਾ ਰਹੇ ਹਨ। ਇਸ ਸਕੈਮ ਦਾ ਸ਼ਿਕਾਰ ਹੋਣ ਤੋਂ ਬਚਣ ਲਈ ਪੁਲਿਸ ਨੇ ਲੋਕਾਂ ਨੂੰ ਹੋਰ ਧਿਰ ਲਈ ਗੱਡੀ ਰਜਿਸਟਰ ਨਾ ਕਰਨ ਦੀ ਸਲਾਹ ਦਿੱਤੀ ਹੈ।