ਰਿਕਾਰਡ ਹੇਠਲੇ ਪੱਧਰ 'ਤੇ ਰੁਪਿਆ; ਡਾਲਰ ਦੇ ਮੁਕਾਬਲੇ 60 ਪੈਸੇ ਡਿੱਗ ਕੇ 77.50 'ਤੇ ਪੁੱਜਾ

ਸੋਮਵਾਰ ਨੂੰ ਅਮਰੀਕੀ ਡਾਲਰ ਦੇ ਮੁਕਾਬਲੇ ਭਾਰਤੀ ਕਰੰਸੀ 60 ਪੈਸੇ ਦਾ ਗੋਤਾ ਲਾਉਂਦੇ ਹੋਏ ਰਿਕਾਰਡ ਹੇਠਲੇ ਪੱਧਰ 77.50 ਰੁਪਏ ਪ੍ਰਤੀ ਡਾਲਰ 'ਤੇ ਬੰਦ ਹੋਈ। ਅਮਰੀਕਾ ਦੇ ਫੈਡਰਲ ਰਿਜ਼ਰਵ ਵੱਲੋਂ ਵਿਆਜ ਦਰਾਂ ਵਧਾਉਣ ਮਗਰੋਂ ਵਿਦੇਸ਼ੀ ਫੰਡ ਦੇ ਲਗਾਤਾਰ ਨਿਕਲਣ ਕਾਰਨ ਭਾਰਤੀ ਕਰੰਸੀ ਵਿਚ ਕਮਜ਼ੋਰੀ ਦੇਖਣ ਨੂੰ ਮਿਲੀ ਹੈ।

ਪਿਛਲੇ ਕਾਰੋਬਾਰੀ ਸੈਸ਼ਨ ਸ਼ੁੱਕਰਵਾਰ ਨੂੰ ਭਾਰਤੀ ਕਰੰਸੀ ਦਾ ਬੰਦ ਪੱਧਰ 76.90 ਰੁਪਏ ਪ੍ਰਤੀ ਅਮਰੀਕੀ ਡਾਲਰ ਸੀ।

ਰੁਪਏ ਦੀ ਅੱਜ ਸ਼ੁਰੂਆਤ ਵੀ ਕਮਜ਼ੋਰ ਹੋਈ, ਜਿੱਥੇ ਇਹ 77.17 ਦੇ ਪੱਧਰ 'ਤੇ ਖੁੱਲ੍ਹਿਆ, ਉੱਥੇ ਹੀ ਦਿਨ ਦੇ ਕਾਰੋਬਾਰ ਦੌਰਾਨ ਇਸ ਨੇ ਅਮਰੀਕੀ ਡਾਲਰ ਦੇ ਮੁਕਾਬਲੇ 77.58 ਦਾ ਰਿਕਾਰਡ ਹੇਠਲਾ ਪੱਧਰ ਦਰਜ ਕੀਤਾ। ਇਸ ਤਰ੍ਹਾਂ ਭਾਰਤੀ ਕਰੰਸੀ ਨੇ ਅੱਜ ਇੰਟਰਾ-ਡੇਅ ਅਤੇ ਬੰਦ ਦੌਰਾਨ ਨਵਾਂ ਹੇਠਲਾ ਰਿਕਾਰਡ ਪੱਧਰ ਦੇਖਿਆ। ਪਿਛਲੀ ਵਾਰ ਭਾਰਤੀ ਕਰੰਸੀ ਨੇ 7 ਮਾਰਚ ਨੂੰ ਰਿਕਾਰਡ ਹੇਠਲਾ ਪੱਧਰ ਦਰਜ ਕੀਤਾ ਸੀ, ਜਦੋਂ ਇਹ ਅਮਰੀਕੀ ਡਾਲਰ ਦੇ ਮੁਕਾਬਲੇ 76.98 ਦੇ ਪੱਧਰ 'ਤੇ ਪੁੱਜ ਗਈ ਸੀ। ਦੱਸ ਦੇਈਏ ਕਿ ਫੈਡਰਲ ਰਿਜ਼ਰਵ ਵੱਲੋਂ ਪਿਛਲੇ ਹਫ਼ਤੇ ਵਿਆਜ ਦਰ ਵਿਚ 0.50 ਫ਼ੀਸਦ ਵਾਧਾ ਕਰਨ ਮਗਰੋਂ ਅਮਰੀਕੀ ਡਾਲਰ ਦੁਨੀਆ ਦੀਆਂ ਪ੍ਰਮੁੱਖ ਕਰੰਸੀਆਂ ਦੇ ਮੁਕਾਬਲੇ ਮਜਬੂਤ ਹੋਇਆ ਹੈ। ਪਿਛਲੇ ਦੋ ਸੈਸ਼ਨਾਂ ਵਿਚ ਭਾਰਤੀ ਕਰੰਸੀ ਅਮਰੀਕੀ ਡਾਲਰ ਦੇ ਮੁਕਾਬਲੇ 115 ਪੈਸੇ ਤੱਕ ਕਮਜ਼ੋਰ ਹੋਈ ਹੈ।