ਅਮਰੀਕਾ ਦੇ ਟੈਰਿਫ ਨਾਲ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਣਗੇ ਕੈਲਗਰੀ ਸਣੇ ਇਹ ਸ਼ਹਿਰ

ਕੈਨੇਡਾ ’ਤੇ ਅਮਰੀਕੀ ਟੈਰਿਫ ਲੱਗਣ ਦੀ ਸੂਰਤ ਵਿਚ ਕੈਲਗਰੀ, ਨਿਊ ਬਰੰਜ਼ਵਿਕ ਦਾ ਸ਼ਹਿਰ ਸੇਂਟ ਜੌਨ ਅਤੇ ਓਨਟਾਰੀਓ ਦਾ ਸ਼ਹਿਰ ਵਿੰਡਸਰ ਸਭ ਤੋਂ ਵੱਧ ਪ੍ਰਭਾਵਿਤ ਹੋਣਗੇ। ਕੈਨੇਡੀਅਨ ਚੈਂਬਰ ਆਫ਼ ਕਾਮਰਸ ਨੇ ਸਟੈਟਿਸਟਿਕਸ ਕੈਨੇਡਾ ਦੇ ਵਪਾਰਕ ਅੰਕੜਿਆਂ ਦੀ ਪੜਤਾਲ ਕਰਦੇ ਹੋਏ ਇਹ ਰਿਪੋਰਟ ਤਿਆਰ ਕੀਤੀ ਹੈ।

ਟਰੰਪ ਨੇ ਕੈਨੇਡਾ ਅਤੇ ਮੈਕਸੀਕੋ ਦੋਵਾਂ ਦੇਸ਼ਾਂ ਵਲੋਂ ਸਰਹੱਦੀ ਸੁਰੱਖਿਆ ਲਈ ਚੁੱਕੇ ਜਾ ਰਹੇ ਕਦਮਾਂ ਦੇ ਜਵਾਬ ਵਿਚ ਟੈਰਿਫ ਨੂੰ ਘੱਟੋ-ਘੱਟ 4 ਮਾਰਚ ਤੱਕ ਮੁਲਤਵੀ ਕੀਤਾ ਹੈ ਅਤੇ 12 ਮਾਰਚ ਨੂੰ ਸਟੀਲ ਅਤੇ ਐਲੂਮੀਨੀਅਮ ਆਯਾਤ ’ਤੇ 25 ਫੀਸਦੀ ਟੈਰਿਫ ਲਗਾਉਣ ਦੀ ਧਮਕੀ ਵੀ ਦਿੱਤੀ ਹੈ।

ਕੈਨੇਡੀਅਨ ਚੈਂਬਰ ਆਫ਼ ਕਾਮਰਸ ਦਾ ਕਹਿਣਾ ਹੈ ਕਿ ਇਸ ਨਾਲ ਓਨਟਾਰੀਓ ਦੇ ਹੈਮਿਲਟਨ ਅਤੇ ਸੌਲਟ ਸਟੀ. ਮੈਰੀ ਵਰਗੇ ਸ਼ਹਿਰ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਣਗੇ, ਜਿੱਥੇ ਵੱਡੇ ਸਟੀਲ ਉਦਯੋਗ ਹਨ। ਉਥੇ ਹੀ, ਸੇਂਟ ਜੌਨ ਅਤੇ ਕੈਲਗਰੀ ਅਮਰੀਕਾ ਨੂੰ ਕੱਚਾ ਤੇਲ ਅਤੇ ਕੁਦਰਤੀ ਗੈਸ ਵੱਡੀ ਮਾਤਰਾ ਵਿਚ ਨਿਰਯਾਤ ਕਰਦੇ ਹਨ।

ਰਿਪੋਰਟ ਦਾ ਕਹਿਣਾ ਹੈ ਕਿ ਟਰੇਡ ਵਪਾਰ ਵਿਚ ਬੀਫ ਨਿਰਯਾਤ ਵੀ ਪ੍ਰਭਾਵਿਤ ਹੋਵੇਗਾ। ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਕੁਝ ਕੈਨੇਡੀਅਨ ਸ਼ਹਿਰਾਂ ਲਈ ਟੈਰਿਫ ਦਾ ਖਤਰਾ ਘੱਟ ਹੈ। ਇਨ੍ਹਾਂ ਵਿਚ ਵਿਕਟੋਰੀਆ ਅਤੇ ਹੈਲੀਫੈਕਸ ਵਰਗੇ ਸ਼ਹਿਰ ਸ਼ਾਮਲ ਹਨ, ਜੋ ਏਸ਼ੀਆ ਜਾਂ ਯੂਰਪ ਨੂੰ ਵਧੇਰੇ ਨਿਰਯਾਤ ਕਰਦੇ ਹਨ।