ਕੈਨੇਡਾ ਫੈਡਰਲ ਚੋਣਾਂ ਲਈ ਮੁਕਾਬਲਾ ਸਖਤ, ਅਨੁਮਾਨਿਤ ਸੀਟਾਂ ਵਿਚ ਬਦਲਾਅ

ਕੈਨੇਡਾ ਵਿਚ 28 ਅਪ੍ਰੈਲ ਨੂੰ ਚੋਣਾਂ ਦਾ ਦਿਨ ਨਜ਼ਦੀਕ ਆਉਣ ਵਿਚਕਾਰ ਕਿਸੇ ਪਾਰਟੀ ਦੇ ਸਰਕਾਰ ਬਣਾਉਣ ਦੇ ਸਮੀਕਰਨ ਵੀ ਤੇਜ਼ੀ ਨਾਲ ਬਦਲ ਰਹੇ ਹਨ। ਨੈਨੋ ਰਿਸਰਚ ਦੇ ਤਾਜ਼ਾ ਅਨੁਮਾਨ ਮੁਤਾਬਕ,ਮਾਰਕ ਕਾਰਨੀ ਦੀ ਲਿਬਰਲ ਪਾਰਟੀ ਫਿਰ ਤੋਂ ਘੱਟ ਗਿਣਤੀ ਸਰਕਾਰ ਵਿਚ ਆ ਸਕਦੀ ਹੈ। ਪਿਛਲੇ ਹਫ਼ਤੇ ਨਾਲੋਂ ਲਿਬਰਲਸ ਦੀਆਂ 17 ਸੀਟਾਂ ਘਟੀਆਂ ਹਨ।

ਨੈਨੋ ਮੁਤਾਬਕ, ਜੇ ਚੋਣਾਂ 6 ਅਪ੍ਰੈਲ ਨੂੰ ਹੁੰਦੀਆਂ ਜਦੋਂ ਅਨੁਮਾਨ ਤਿਆਰ ਕੀਤੇ ਗਏ ਸਨ ਤਾਂ ਲਿਬਰਲਸ ਨੂੰ ਘੱਟੋ-ਘੱਟ 156 ਸੀਟਾਂ ਮਿਲਣੀਆਂ ਸਨ। 30 ਮਾਰਚ ਨੂੰ ਲਿਬਰਲਸ ਲਈ ਇਹੀ ਅੰਕੜਾ 173 ਦਾ ਸੀ। ਇਸ ਦੌਰਾਨ ਪੀਅਰ ਪੌਲੀਐਵ ਦੀ ਆਗਵਾਈ ਵਿਚ ਕੰਜ਼ਰਵੇਟਿਵ ਦੇ 114 ਸੀਟਾਂ ਜਿੱਤਣ ਦੀ ਸੰਭਾਵਨਾ ਸੀ। ਇਹ ਪਾਰਟੀ ਨੂੰ ਪਿਛਲੇ ਅਨੁਮਾਨਾਂ ਨਾਲੋਂ 8 ਸੀਟਾਂ ਦਾ ਫਾਇਦਾ ਹੁੰਦਾ।

ਨੈਨੋ ਰਿਸਰਚ ਦੇ ਮੁੱਖ ਡੇਟਾ ਸਾਇੰਟਿਸਟ ਨਿਕ ਨੈਨੋਸ ਨੇ ਕਿਹਾ ਕਿ ਅਜੇ ਵੀ 53 ਹਲਕੇ ਅਜਿਹੇ ਹਨ, ਜਿੱਥੇ ਦੋਵਾਂ ਧਿਰਾਂ ਵਿਚਕਾਰ ਬਹੁਤ ਨਜ਼ਦੀਕੀ ਮੁਕਾਬਲਾ ਹੈ। ਉਥੇ ਹੀ, ਬਲਾਕ ਕਿਊਬੈਕਵਾ ਨੂੰ ਵੱਡਾ ਬੂਸਟ ਮਿਲਿਆ ਹੈ, ਪਿਛਲੇ ਅਨੁਮਾਨ ਦੀਆਂ 4 ਸੀਟਾਂ ਤੋਂ ਇਹ 17 'ਤੇ ਪਹੁੰਚਦੀ ਦਿਖਾਈ ਦੇ ਰਹੀ ਹੈ, ਜਦੋਂ ਕਿ ਐੱਨ. ਡੀ. ਪੀ. ਜਗਮੀਤ ਸਿੰਘ ਸਮੇਤ 4 ਸੀਟਾਂ 'ਤੇ ਬਣੀ ਹੋਈ ਹੈ।