16.09C Vancouver 16.09C VancouverMay 12, 2026 2:12 PM - Connect Newsroom - Ramandeep Kaur with files from The Canadian Press
ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਇਸ ਅਕਤੂਬਰ ਵਿੱਚ ਸੂਬੇ ਦੇ ਵੱਖ ਹੋਣ ਬਾਰੇ ਰਿਫਰੈਂਡਮ ਕਰਵਾਉਣ ਦੀ ਸੰਭਾਵਨਾ ਨੂੰ ਪੂਰੀ ਤਰ੍ਹਾਂ ਖਾਰਜ ਨਹੀਂ ਕੀਤਾ ਹੈ। ਵੱਖਵਾਦੀ ਸਮਰਥਕ ਆਗੂ ਹੁਣ ਖੁੱਲ੍ਹੇਆਮ ਉਨ੍ਹਾਂ 'ਤੇ ਇਸ ਵੋਟਿੰਗ ਲਈ ਦਬਾਅ ਬਣਾ ਰਹੇ ਹਨ। ਜਦ ਸਮਿਥ ਤੋਂ ਸਿੱਧਾ ਸਵਾਲ ਪੁੱਛਿਆ ਗਿਆ ਕਿ ਕੀ ਉਹ ਅਜਿਹੀ ਵੋਟ ਨਾ ਕਰਵਾਉਣ ਦਾ ਵਾਅਦਾ ਕਰੇਗੀ, ਤਾਂ ਉਨ੍ਹਾਂ ਕਿਹਾ ਕਿ ਅਸੀਂ ਕੁਝ ਚੀਜ਼ਾਂ ਦੀ ਉਡੀਕ ਕਰ ਰਹੇ ਹਾਂ।
ਅਸੀਂ ਆਪਣੀ ਕਾਕਸ ਅਤੇ ਕੈਬਨਿਟ ਨਾਲ ਮਿਲ ਕੇ ਇਸ 'ਤੇ ਫੈਸਲਾ ਲਵਾਂਗੇ। ਹਾਲਾਂਕਿ,ਉਨ੍ਹਾਂ ਦੀ ਕੈਬਨਿਟ ਦੇ ਕੁਝ ਮੰਤਰੀ ਇਸ ਦੇ ਹੱਕ ਵਿੱਚ ਨਹੀਂ ਹਨ। ਵਿੱਤ ਮੰਤਰੀ ਨੇਟ ਹੌਰਨਰ ਦਾ ਕਹਿਣਾ ਹੈ ਕਿ ਉਹ ਵੱਖਵਾਦੀ ਉਮੀਦਵਾਰਾਂ ਦੇ ਖਿਲਾਫ ਚੋਣ ਲੜ ਚੁੱਕੇ ਹਨ ਅਤੇ ਉਹ ਅਜਿਹੀ ਕਿਸੇ ਵੋਟ ਦਾ ਸਮਰਥਨ ਨਹੀਂ ਕਰਦੇ। ਵੱਖਵਾਦੀ ਪ੍ਰਬੰਧਕਾਂ ਦਾ ਦਾਅਵਾ ਹੈ ਕਿ ਉਨ੍ਹਾਂ ਨੇ ਪਿਛਲੇ ਹਫਤੇ ਇਲੈਕਸ਼ਨ ਐਲਬਰਟਾ ਨੂੰ 3 ਲੱਖ ਦਸਤਖਤਾਂ ਵਾਲੀ ਪਟੀਸ਼ਨ ਸੌਂਪੀ ਹੈ ਪਰ ਕੋਰਟ ਦੇ ਹੁਕਮ ਕਾਰਨ ਇਨ੍ਹਾਂ ਦਸਤਖਤਾਂ ਦੀ ਜਾਂਚ ਰੁਕ ਗਈ ਹੈ।
ਇਹ ਕਾਨੂੰਨੀ ਚੁਣੌਤੀ ਫਸਟ ਨੇਸ਼ਨ ਵੱਲੋਂ ਦਿੱਤੀ ਗਈ ਹੈ।ਐਲਬਰਟਾ ਐਨ.ਡੀ.ਪੀ. ਦੀ ਡਿਪਟੀ ਲੀਡਰ ਰਾਖੀ ਪੰਚੋਲੀ ਨੇ ਕਿਹਾ ਕਿ ਮੌਜੂਦਾ ਹਾਲਾਤ ਵਿੱਚ ਰੈਫਰੈਂਡਮ ਨਹੀਂ ਹੋ ਸਕਦਾ। ਉਨ੍ਹਾਂ ਨੇ ਐਲਬਰਟਨਜ਼ ਦੇ ਵੋਟਿੰਗ ਡੇਟਾ ਦੇ ਲੀਕ ਹੋਣ ਦਾ ਹਵਾਲਾ ਦਿੱਤਾ ਅਤੇ ਪ੍ਰੀਮੀਅਰ 'ਤੇ ਵੱਖਵਾਦੀਆਂ ਦੀ ਮਦਦ ਕਰਨ ਦੇ ਇਲਜ਼ਾਮ ਲਗਾਏ।
