ਪ੍ਰੀਮੀਅਰ ਸਮਿਥ ਨੇ ਪੀ.ਐਮ.ਕਾਰਨੀ ਨਾਲ ਊਰਜਾ ਪ੍ਰੋਜੈਕਟਾਂ ਅਤੇ ਪਾਈਪਲਾਈਨ ਸਮਝੌਤੇ ’ਤੇ ਕੀਤੀ ਗੱਲਬਾਤ

ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਅੱਜ ਔਟਵਾ ਵਿਖੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨਾਲ ਮੁਲਾਕਾਤ ਕੀਤੀ। ਇਸ ਮੌਕੇ ਉਨ੍ਹਾਂ ਨੇ ਸਪੱਸ਼ਟ ਸ਼ਬਦਾਂ ਵਿੱਚ ਕਿਹਾ ਕਿ ਐਲਬਰਟਾ ਦੇ ਲੋਕ ਅਤੇ ਉਦਯੋਗਿਕ ਖੇਤਰ ਦੇ ਨਿਵੇਸ਼ਕ ਵੱਡੇ ਪ੍ਰੋਜੈਕਟਾਂ ਨੂੰ ਲੈ ਕੇ ਹੁਣ ਬੇਸਬਰੇ ਹੋ ਰਹੇ ਹਨ।

ਸਮਿਥ ਨੇ ਜ਼ੋਰ ਦਿੱਤਾ ਕਿ ਤੇਲ ਪਾਈਪਲਾਈਨ ਅਤੇ ਐਨਰਜੀ ਸਹਿਯੋਗ ਸਬੰਧੀ ਸਮਝੌਤੇ (MOU) ਨੂੰ ਅਗਲੇ ਕੁਝ ਦਿਨਾਂ ਦੇ ਅੰਦਰ-ਅੰਦਰ ਅੰਤਿਮ ਰੂਪ ਦਿੱਤਾ ਜਾਣਾ ਚਾਹੀਦਾ ਹੈ।ਦੋਵਾਂ ਸਰਕਾਰਾਂ ਵਿਚਕਾਰ ਹੋਏ ਇਸ ਸਮਝੌਤੇ ਦੀਆਂ ਕੁਝ ਸ਼ਰਤਾਂ ਨੂੰ ਪੂਰਾ ਕਰਨ ਦੀ ਆਖਰੀ ਤਾਰੀਖ 1 ਅਪ੍ਰੈਲ ਸੀ, ਜੋ ਕਿ ਲੰਘ ਚੁੱਕੀ ਹੈ। ਸਮਿਥ ਅਨੁਸਾਰ, ਐਲਬਰਟਾ ਵਿੱਚ ਵਧ ਰਹੀ ਵੱਖਵਾਦੀ ਲਹਿਰ ਨੂੰ ਰੋਕਣ ਲਈ ਇਹ ਦਿਖਾਉਣਾ ਜ਼ਰੂਰੀ ਹੈ ਕਿ ਕੈਨੇਡਾ ਦੀ ਫੈਡਰਲ ਪ੍ਰਣਾਲੀ ਐਲਬਰਟਾ ਲਈ ਕੰਮ ਕਰ ਸਕਦੀ ਹੈ।

ਰਿਪੋਰਟਾਂ ਅਨੁਸਾਰ, ਉਦਯੋਗਿਕ ਕਾਰਬਨ ਪ੍ਰਾਈਸਿੰਗ ਨੂੰ ਲੈ ਕੇ ਦੋਵਾਂ ਪੱਖਾਂ ਵਿੱਚ ਅਜੇ ਵੀ ਅਸਹਿਮਤੀ ਬਣੀ ਹੋਈ ਹੈ।ਜਿੱਥੇ ਫੈਡਰਲ ਸਰਕਾਰ ਪ੍ਰੋਜੈਕਟਾਂ ਦੀ ਮਨਜ਼ੂਰੀ ਦੀ ਪ੍ਰਕਿਰਿਆ ਨੂੰ ਦੋ ਸਾਲਾਂ ਤੱਕ ਘਟਾਉਣ ਲਈ ਕਾਨੂੰਨ ਲਿਆਉਣ ਦੀ ਤਿਆਰੀ ਕਰ ਰਹੀ ਹੈ, ਉੱਥੇ ਹੀ ਐਲਬਰਟਾ ਨੇ ਪਹਿਲਾਂ ਹੀ ਆਪਣਾ Expedited 120-Day Approvals Act ਪਾਸ ਕਰ ਦਿੱਤਾ ਹੈ।