13.38C Vancouver 13.38C VancouverJul 2, 2021 3:34 PM -
ਬ੍ਰਿਟਿਸ਼ ਕੋਲੰਬੀਆ ਦੇ ਇੰਟੀਰੀਅਰ ਵਿੱਚ ਲਿਟਨ ਇਲਾਕੇ ਵਿੱਚ ਲੱਗੀਆਂ ਜੰਗਲੀ ਅੱਗਾਂ ਕਾਰਣ ਸੈਂਕੜੇ ਲੋਕ ਬੇਘਰ ਹੋ ਗਏ ਹਨ ਅਤੇ ਵੱਡੀ ਗਿਣਤੀ ਵਿੱਚ ਸਥਾਨਕ ਵਸਨੀਕ ਲਾਪਤਾ ਹਨ।
ਪਬਲਿਕ ਸੇਫਟੀ ਮਨਿਸਟਰ ਮਾਈਕ ਫਾਰਨਵਰਥ ਨੇ ਫਿਲਹਾਲ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕੀਤੀ ਕਿ ਕਿੰਨੇ ਲੋਕ ਹਾਲੇ ਤੱਕ ਲੱਭੇ ਨਹੀਂ ਗਏ ਹਨ।
ਫਾਰਨਵਰਥ ਅਨੁਸਾਰ ਬੁੱਧਵਾਰ ਰਾਤ ਨੂੰ ਘਰਾਂ ਨੂੰ ਤੁਰੰਤ ਖਾਲੀ ਕਰਣ ਦੇ ਹੁਕਮਾਂ ਕਾਰਣ ਇਹ ਕਹਿਣਾ ਮੁਸ਼ਕਿਲ ਹੈ ਕਿ ਸਥਾਨਕ ਲੋਕਾਂ ਨੇ ਬਚਾਅ ਲਈ ਕਿੱਥੇ ਕਿੱਥੇ ਪਨਾਹ ਲਈ ਹੈ।
ਅਧਿਕਾਰੀਆਂ ਮੁਤਾਬਕ ਸੈੱਲ ਸਰਵਿਸ ਤੋਂ ਬਿੰਨਾ ਫਿਲਹਾਲ ਇਹ ਸਪਸ਼ਟ ਕਰਨਾ ਵੀ ਔਖਾ ਹੈ ਕਿ ਲਿਟਨ ਵਿੱਚ ਇਸ ਸਮੇਂ ਕੋਈ ਵਿਅਕਤੀ ਮੌਜੂਦ ਹੈ ਜਾਂ ਨਹੀਂ।
ਆਰ.ਸੀ.ਐਮ.ਪੀ. ਅਨੁਸਾਰ ਸਥਿਤੀ ਗੰਭੀਰ ਹੋਣ ਕਾਰਣ ਪਿੰਡ ਵਿੱਚ ਦਾਖ਼ਲ ਹੋਣਾ ਸੰਭਵ ਨਹੀਂ ਹੈ ਪਰ ਏਰੀਅਲ ਤਸਵੀਰਾਂ ਵਿੱਚ ਅੱਗ ਨਾਲ ਤਬਾਹ ਹੋਈਆਂ ਇਮਾਰਤਾਂ ਅਤੇ ਵਾਹਨਾਂ ਨੂੰ ਦੇਖਿਆ ਜਾ ਸਕਦਾ ਹੈ।
ਅਧਿਕਾਰੀਆਂ ਮੁਤਾਬਕ ਸਥਿਤੀ ਸੁਰਖਿਅਤ ਹੁੰਦੇ ਹੀ ਉਹ ਪੀੜਤਾਂ ਦੀ ਭਾਲ ਲਈ ਯਤਨ ਸ਼ੁਰੂ ਕਰ ਦੇਣਗੇ।
ਲਿਟਨ ਦੇ ਤਕਰੀਬਨ 1000 ਲੋਕਾਂ ਨੂੰ ਜੰਗਲੀ ਅੱਗ ਕਾਰਣ ਆਪਣੇ ਘਰ ਖਾਲੀ ਕਰਣ ਦੇ ਹੁਕਮ ਜਾਰੀ ਕੀਤੇ ਗਏ ਸਨ।
ਬੀ.ਸੀ. ਦੇ ਦੱਖਣ ਪੂਰਬੀ ਇਲਾਕੇ ਵਿੱਚ ਵੀ ਜੰਗਲੀ ਅੱਗਾਂ ਕਾਰਣ ਇਵਕਯੂਏਸ਼ਨ ਅਲਰਟ ਜਾਰੀ ਕਰ ਦਿੱਤੇ ਗਏ ਹਨ।
ਵੀਰਵਾਰ ਰਾਤ ਕੈਮਲੂਪਸ ਦੇ ਨਜ਼ਦੀਕ ਲੱਗੀ ਇੱਕ ਜੰਗਲੀ ਅੱਗ ਸਦਕਾ ਥੋੜੇ ਸਮੇਂ ਲਈ ਕੁਝ ਲੋਕਾਂ ਨੂੰ ਆਪਣੇ ਘਰ ਖਾਲੀ ਕਰਣ ਦੀ ਹਦਾਇਤ ਦਿੱਤੀ ਗਈ ਸੀ ਪਰ ਫਿਰ ਕੁਝ ਘੰਟੇ ਬਾਅਦ ਅੱਧੀ ਰਾਤ ਦੇ ਕਰੀਬ ਇਲਾਕੇ ਵਿੱਚ ਮੀਂਹ ਪੈਣ ਕਾਰਣ ਇਵਕਯੂਏਸ਼ਨ ਆਰਡਰ ਰੱਦ ਕਰ ਦਿੱਤੇ ਗਏ ਸਨ।
ਬੀ.ਸੀ. ਵਾਈਲਡਫਾਇਰ ਸਰਵਿਸ ਅਨੁਸਾਰ ਸੂਬੇ ਦੇ ਇੰਟੀਰੀਅਰ ਵਿੱਚ ਅਜਿਹੀਆਂ 106 ਦੇ ਕਰੀਬ ਜੰਗਲੀ ਅੱਗਾਂ ਨੂੰ ਕਾਬੂ ਕਰਣ ਦੇ ਯਤਨ ਕੀਤੇ ਜਾ ਰਹੇ ਹਨ।
