ਸਪੇਨ ਨੇ ਨਾਟੋ ਦੇ ਅਨੁਮਾਨਿਤ ਰੱਖਿਆ ਖਰਚ ਵਾਧੇ ਨੂੰ 'ਗੈਰ-ਵਾਜਬ' ਦਿੱਤਾ ਕਰਾਰ

ਸਪੇਨ ਨੇ ਨੈਟੋ ਡਿਫੈਂਸ ਟਾਰਗੇਟ ਨੂੰ 5 ਫੀਸਦੀ ਤੱਕ ਵਧਾਉਣ ਦੇ ਪ੍ਰਸਤਾਵ ਨੂੰ ਰੱਦ ਕਰ ਦਿੱਤਾ ਹੈ। ਰਿਪੋਰਟਸ ਮੁਤਾਬਕ, ਪ੍ਰਧਾਨ ਮੰਤਰੀ ਪੇਡਰੋ ਸਾਂਚੇਜ਼ ਨੇ ਕਥਿਤ ਤੌਰ 'ਤੇ ਨੈਟੋ ਦੇ ਜਨਰਲ ਸਕੱਤਰ ਮਾਰਕ ਰੁਟੇ ਨੂੰ ਕਿਹਾ ਹੈ ਕਿ ਮੈਂਬਰ ਮੁਲਕਾਂ ਦੇ ਡਿਫੈਂਸ ਖਰਚ ਦੇ ਟੀਚੇ ਨੂੰ ਉਨ੍ਹਾਂ ਦੀ ਜੀ.ਡੀ.ਪੀ.ਦੇ 5 ਫੀਸਦੀ ਤੱਕ ਕਰਨ ਦਾ ਪ੍ਰਸਤਾਵ ਨਾ ਸਿਰਫ਼ ਗੈਰ-ਵਾਜਬ ਹੋਵੇਗਾ ਸਗੋਂ ਇਹ ਹਾਸਲ ਕਰਨਾ ਵੀ ਮੁਸ਼ਕਲ ਹੈ।

ਸਪੇਨ ਨੇ ਇਹ ਗੱਲ ਉਦੋਂ ਕਹੀ ਹੈ ਜਦੋਂ ਅਗਲੇ ਹਫ਼ਤੇ ਹੇਗ ਵਿਚ ਨੈਟੋ ਦੀ ਬੈਠਕ ਹੋਣ ਵਾਲੀ ਹੈ ਅਤੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਵੀ ਬੈਠਕ ਦਾ ਹਿੱਸਾ ਹੋਣਗੇ। ਕੈਨੇਡਾ ਹੁਣ ਤੱਕ ਆਪਣੇ ਡਿਫੈਂਸ ਖਰਚ ਨੂੰ ਜੀ.ਡੀ.ਪੀ. ਦੇ 2 ਫੀਸਦੀ ਟਾਰਗੇਟ ਤੱਕ ਵੀ ਪੂਰਾ ਨਹੀਂ ਕਰ ਸਕਿਆ ਹੈ,ਹਾਲਾਂਕਿ ਪੀ.ਐੱਮ.ਕਾਰਨੀ ਨੇ ਇਸੇ ਫਿਸਕਲ ਵਿਚ ਇਹ ਟੀਚਾ ਪ੍ਰਾਪਤ ਕਰਨ ਦੀ ਗੱਲ ਆਖੀ ਹੈ।

ਸਪੇਨ ਨੂੰ ਵਿਸ਼ਵਾਸ ਹੈ ਕਿ ਉਹ ਘੱਟ ਖਰਚ ਨਾਲ ਕਾਫ਼ੀ ਕੁਝ ਕਰ ਸਕਦਾ ਹੈ। ਸਾਂਚੇਜ਼ ਨੇ ਕਿਹਾ ਕਿ 5 ਫੀਸਦੀ ਦੇ ਨਵੇਂ ਖਰਚ ਟਾਰਗੇਟ ਨੂੰ ਅਪਣਾਉਣ ਨਾਲ ਸਪੇਨ ਦੀ ਅਰਥਵਿਵਸਥਾ 'ਤੇ ਮਾੜਾ ਪ੍ਰਭਾਵ ਹੋਣਗੇ ਕਿਉਂਕਿ ਇਸ ਖ਼ਰਚ ਲਈ ਸਰਕਾਰ ਨੂੰ ਪਬਲਿਕ ਸਰਵਿਸਸ ਵਿਚ ਕਟੌਤੀ ਕਰਨੀ ਪਵੇਗੀ ਅਤੇ ਟੈਕਸਾਂ ਵਿਚ ਵਾਧਾ ਕਰਨਾ ਪਵੇਗਾ।