ਸਪੋਟੀਫਾਈ ਨੇ ਇਸ ਸਾਲ 17% ਕਰਮਚਾਰੀਆਂ ਨੂੰ ਕੱਢਣ ਦਾ ਕੀਤਾ ਫੈਸਲਾ

ਸਪੋਟੀਫਾਈ ਨੇ ਇਸ ਸਾਲ ਛਾਂਟੀ ਦੇ ਤੀਜੇ ਗੇੜ ਵਿੱਚ ਆਪਣੇ ਗਲੋਬਲ ਵਰਕਫ਼ੋਰਸ ਦੇ 17 ਫੀਸਦੀ ਕਰਮਚਾਰੀਆਂ ਨੂੰ ਕੱਢਣ ਦਾ ਫੈਸਲਾ ਕੀਤਾ ਹੈ। ਮਿਊਜ਼ਿਕ ਸਟ੍ਰੀਮਿੰਗ ਸਰਵਿਸ ਦੇਣ ਵਾਲੀ ਕੰਪਨੀ ਦਾ ਕਹਿਣਾ ਹੈ ਕਿ ਉਸ ਨੇ ਲਾਭ ਹੋਣ ਦੇ ਯਤਨ ਵਜੋਂ ਖ਼ਰਚ ਘਟਾਉਣ ਲਈ ਇਹ ਕਦਮ ਚੁੱਕਿਆ ਹੈ। ਸੀਈਓ ਡੈਨੀਅਲ ਏਕ ਨੇ ਕੰਪਨੀ ਦੇ ਬਲੌਗ 'ਤੇ ਸੋਮਵਾਰ ਨੂੰ ਕਰਮਚਾਰੀਆਂ ਲਈ ਇਹ ਸੁਨੇਹਾ ਪੋਸਟ ਕੀਤਾ। ਹਾਲਾਂਕਿ ਇਸ ਵਿੱਚ ਇਹ ਜਾਣਕਾਰੀ ਨਹੀਂ ਦਿੱਤੀ ਗਈ ਕਿੰਨੇ ਕਰਮਚਾਰੀਆਂ ਦੀ ਛੁੱਟੀ ਕੀਤੀ ਜਾ ਰਹੀ ਹੈ ਪਰ ਬੁਲਾਰੇ ਨੇ ਪੁਸ਼ਟੀ ਕੀਤੀ ਕਿ ਲਗਭਗ 1,500 ਵਰਕਰ ਕੱਢੇ ਜਾ ਰਹੇ ਹਨ। ਸੀਈਓ ਡੈਨੀਅਲ ਏਕ ਨੇ ਕਿਹਾ ਕਿ ਪਿਛਲੇ ਸਾਲ ਸੈਂਟਰਲ ਬੈਂਕਾਂ ਨੇ ਵਿਆਜ ਦਰਾਂ ਵਿੱਚ ਕਾਫ਼ੀ ਵਾਧਾ ਕੀਤਾ ਹੈ ਜਿਸ ਨਾਲ ਆਰਥਿਕ ਵਿਕਾਸ ਵੀ ਹੌਲੀ ਹੋਇਆ ਹੈ ਅਤੇ ਕੰਪਨੀ ਇਸ ਚੁਣੌਤੀਪੂਰਨ ਮਾਹੌਲ ਦਾ ਸਾਹਮਣਾ ਕਰ ਰਹੀ ਹੈ। ਸਟਾਕਹੋਮ ਦੀ ਕੰਪਨੀ ਸਪੋਟੀਫਾਈ ਦਾ ਕਹਿਣਾ ਹੈ ਕਿ ਸਤੰਬਰ ਵਿੱਚ ਸਮਾਪਤ ਹੋਏ 9 ਮਹੀਨਿਆਂ ਵਿੱਚ ਉਸ ਨੇ 462 ਮਿਲੀਅਨ ਯੂਰੋ ਯਾਨੀ ਲਗਭਗ $500 ਮਿਲੀਅਨ ਦਾ ਘਾਟਾ ਦਰਜ ਕੀਤਾ।