22.11C Vancouver 22.11C VancouverSep 15, 2025 8:58 PM - Connect Newsroom - Pervez Sandhu
ਅੱਜ ਦੀ ਸਰੀ ਸਿਟੀ ਹਾਲ ਵਿਖੇ ਹੋਈ ਐਕਸਟੌਰਸ਼ਨ ਮਾਮਲਿਆਂ 'ਚ ਇਨਾਮ ਦੇ ਐਲਾਨ ਸੰਬੰਧੀ ਪ੍ਰੈਸ ਕਾਨਫਰੰਸ 'ਚ ਦੱਸਿਆ ਗਿਆ ਕਿ ਇਲਾਕੇ 'ਚ ਐਕਸਟੌਰਸ਼ਨ ਸੰਬੰਧੀ ਕੁੱਲ 44 ਫਾਈਲਾਂ 'ਤੇ ਜਾਂਚ ਹੋ ਰਹੀ ਹੈ।
ਇਸੇ ਦੌਰਾਨ ਇਹ ਵੀ ਸਪਸ਼ਟ ਕੀਤਾ ਗਿਆ ਕਿ ਇਨ੍ਹਾਂ 'ਚ 27 ਮਾਮਲੇ ਅਜਿਹੇ ਸਨ ਜਿਥੇ ਸ਼ੂਟਿੰਗ ਵੀ ਵਾਪਰੀ ਸੀ।
ਇਸੇ ਸੰਬੰਧੀ ਉਚੇਚੇ ਤੌਰ 'ਤੇ ਕਨੈਕਟ ਐਫ.ਐਮ. ਨੇ ਐਸ.ਪੀ.ਐਸ. ਮੁਖੀ, ਚੀਫ਼ ਨੌਰਮ ਲਿਪਿੰਸਕੀ ਨੂੰ ਵਨ ਔਨ ਵਨ ਗੱਲਬਾਤ ਦੌਰਾਨ ਪੁੱਛਿਆ ਕਿ ਇਨ੍ਹਾਂ 44 ਮਾਮਲਿਆਂ 'ਚ ਹੁਣ ਤੱਕ ਕਿੰਨੀਆਂ ਗ੍ਰਿਫਤਾਰੀਆਂ ਹੋਈਆਂ ਹਨ?
ਚੀਫ਼ ਲਿਪਿੰਸਕੀ ਦਾ ਕਹਿਣਾ ਸੀ, "ਫਿਲਹਾਲ ਇਨ੍ਹਾਂ ਮਾਮਲਿਆਂ ਦੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਕੋਈ ਗ੍ਰਿਫਤਾਰੀ ਨਹੀਂ ਕੀਤੀ ਗਈ ਹੈ।"
ਉਨ੍ਹਾਂ ਦੱਸਿਆ, "ਕੁਝ ਮਾਮਲਿਆਂ 'ਚ ਤਲਾਸ਼ੀ ਵਰੰਟਾਂ ਨੂੰ ਅੰਜਾਮ ਦਿੱਤਾ ਗਿਆ ਹੈ ਅਤੇ ਹੋਰ ਕਾਰਵਾਈਆਂ ਵੀ ਹੋਈਆਂ ਹਨ."ਕਨੈਕਟ ਐਫ.ਆਮ. ਨੇ ਪੁੱਛਿਆ ਕਿ ਆਖਿਰ 44 ਮਾਮਲਿਆਂ ਦੀ ਜਾਂਚ ਦੇ ਬਾਵਜੂਦ ਇੱਕ ਵੀ ਗ੍ਰਿਫਤਾਰੀ ਨਾ ਹੋਣਾ, ਕੀ ਇਹ ਸਰੀ ਵਾਸੀਆਂ ਨੂੰ ਸਿਰ ਖੁਰਕਣ 'ਤੇ ਮਜਬੂਰ ਨਹੀਂ ਕਰੇਗਾ।
ਪੁਲਿਸ ਮੁਖੀ ਦਾ ਕਹਿਣਾ ਸੀ, "ਮਾਮਲਿਆਂ ਦੀ ਜਾਂਚ ਐਕਟਿਵ ਹੈ ਅਤੇ ਇਹ ਮਾਮਲੇ ਵਿਦੇਸ਼ਾਂ ਤੋਂ ਆਉਂਦੀਆਂ ਫਿਰੌਤੀ ਸੰਬੰਧੀ ਕਾਲਸ ਕਾਰਨ ਗੁੰਝਲਦਾਰ ਹਨ।"
ਕਨੈਕਟ ਐਫ.ਐਮ. ਨੇ ਫਿਰ ਪੁੱਛਿਆ ਕਿ ਇਹ ਸਮਝਿਆ ਜਾ ਸਕਦਾ ਹੈ ਕਿ ਇਨ੍ਹਾਂ ਫਿਰੌਤੀ ਮਾਮਲਿਆਂ ਦਾ ਸਰਗਨਾ ਦੇਸ਼ ਤੋਂ ਬਾਹਰ ਹੋਵੇ, ਪਰ ਗੋਲੀਆਂ ਚਲਾਉਣ ਵਾਲੇ ਲੋਕ ਤਾਂ ਘਟਨਾਵਾਂ ਨੂੰ ਇੱਥੇ ਅੰਜਾਮ ਦੇ ਰਹੇ ਹਨ ਤਾਂ ਫਿਰ ਐਸ.ਪੀ.ਐਸ. ਉਨ੍ਹਾਂ ਲੋਕਾਂ ਤੱਕ ਕਿਉਂ ਨਹੀਂ ਪਹੁੰਚ ਸਕੀ?
ਪੁਲਿਸ ਮੁਖੀ ਦਾ ਕਹਿਣਾ ਸੀ ਕਿ "ਮਾਮਲੇ ਗੁੰਝਲਦਾਰ ਹਨ ਅਤੇ ਕਈ ਮਾਮਲਿਆਂ 'ਚ ਵਧੇਰੇ ਜਾਣਕਾਰੀ ਹਾਸਿਲ ਕਰਨ ਦੀ ਉਡੀਕ ਕੀਤੀ ਜਾ ਰਹੀ ਹੈ।" ਉਨ੍ਹਾਂ ਆਖਿਆ, "ਕਈ ਵਾਰ ਕੁਝ ਗ੍ਰਿਫਤਾਰੀਆਂ ਵੀ ਹੋ ਜਾਣ ਤਾਂ ਉਨ੍ਹਾਂ ਲੋਕਾਂ ਦੀ ਜਗ੍ਹਾ ਨਵੇਂ ਚੇਹਰੇ ਉਨ੍ਹਾਂ ਹੀ ਕਾਰਵਾਈਆਂ ਨੂੰ ਅੰਜਾਮ ਦੇਣ ਲਈ ਖੜੇ ਕਰ ਦਿੱਤੇ ਜਾਂਦੇ ਹਨ।"
ਚੀਫ਼. ਲਿਪਿੰਸਕੀ ਦਾ ਕਹਿਣਾ ਸੀ ਕਿ ਉਹ ਆਸਵੰਦ ਹਨ ਕਿ ਅੱਜ ਦੇ ਇਨਾਮ ਸੰਬੰਧੀ ਐਲਾਨ ਤੋਂ ਬਾਅਦ ਲੋਕ ਵਧੇਰੇ ਜਾਣਕਾਰੀ ਸਾਂਝੀ ਕਰਨਗੇ ਜਿਸ ਨਾਲ ਇਨ੍ਹਾਂ ਮਾਮਲਿਆਂ ਸੰਬੰਧੀ ਗ੍ਰਿਫਤਾਰੀਆਂ 'ਚ ਮਦਦ ਹੋਵੇਗੀ।
