ਸਰੀ ਪੁਲਿਸ ਨੇ ਸ਼ੱਕੀ ਅੱਗ ਵਿਚ ਫਸੇ ਦੋ ਵਿਅਕਤੀਆਂ ਦੀ ਬਚਾਈ ਜਾਨ

ਸਰੀ ਪੁਲਿਸ ਨਿਊਟਨ ਇਲਾਕੇ ਵਿਚ ਦੇਰ ਰਾਤ ਲੱਗੀ ਇੱਕ ਸ਼ੱਕੀ ਅੱਗ ਦੀ ਜਾਂਚ ਕਰ ਰਹੀ ਹੈ, ਜਿਸ ਵਿਚ ਦੋ ਵਾਹਨਾਂ ਅਤੇ ਇੱਕ ਘਰ ਨੂੰ ਨੁਕਸਾਨ ਪਹੁੰਚਿਆ ਹੈ। ਪੁਲਿਸ ਮੁਤਾਬਕ, ਉਨ੍ਹਾਂ ਨੂੰ ਦੇਰ ਰਾਤ ਕਰੀਬ 1:45 ਵਜੇ ਇੱਕ ਨਿਵਾਸੀ ਨੇ ਸੂਚਨਾ ਦਿੱਤੀ ਕਿ 13400 ਬਲਾਕ 64 ਐਵੇਨਿਊ ਵਿਚ ਉਸ ਦੀ ਗਲੀ ਵਿਚ ਇੱਕ ਘਰ ਨੂੰ ਅੱਗ ਲੱਗ ਗਈ ਹੈ। ਅਧਿਕਾਰੀ ਮੌਕੇ ਪਹੁੰਚੇ ਤਾਂ ਦੋ ਵਾਹਨਾਂ ਅਤੇ ਇੱਕ ਘਰ ਦੇ ਸਾਹਮਣੇ ਵਾਲੇ ਹਿੱਸੇ ਵਿਚ ਅੱਗ ਲੱਗੀ ਹੋਈ ਸੀ।

ਬੇਸਮੈਂਟ ਸੂਟ ਵਿਚ ਰਹਿ ਰਹੇ ਲੋਕ ਸੁਰੱਖਿਅਤ ਬਾਹਰ ਨਿਕਲ ਗਏ ਸਨ ਪਰ ਉੱਪਰਲੀ ਮੰਜ਼ਲ 'ਤੇ ਉਨ੍ਹਾਂ ਨੂੰ ਦੋ ਬਜ਼ੁਰਗ ਹੋਣ ਬਾਰੇ ਸੂਚਨਾ ਦਿੱਤੀ ਗਈ, ਅਧਿਕਾਰੀ ਜਲਦ ਹੀ ਘਰ ਦੇ ਪਿਛਲੇ ਪਾਸੇ ਦੀ ਗਏ ਤੇ ਉਨ੍ਹਾਂ ਨੂੰ ਕੱਚ ਦੇ ਦਰਵਾਜ਼ੇ ਤੋੜ ਕੇ ਰੈਸਕਿਊ ਕੀਤਾ।

ਪੁਲਿਸ ਵਲੋਂ ਕੁੱਲ ਅੱਠ ਲੋਕ ਇਵੈਕੁਏਟ ਕੀਤੇ ਗਏ, ਕਿਸੇ ਨੂੰ ਕੋਈ ਸੱਟ ਨਹੀਂ ਲੱਗੀ। ਪੁਲਿਸ ਨੇ ਅੱਗ ਨੂੰ ਸ਼ੱਕੀ ਅਤੇ ਟਾਰਗੇਟ ਦੱਸਿਆ ਹੈ।

ਇਸ ਵਿਚ ਦੋ ਸ਼ੱਕੀ ਸ਼ਾਮਲ ਮੰਨੇ ਜਾਂਦੇ ਹਨ ਜੋ ਅੱਗ ਸ਼ੁਰੂ ਹੋਣ ਸਮੇਂ ਰਿਹਾਇਸ਼ ਦੇ ਸਾਹਮਣੇ ਦੇਖੇ ਗਏ ਸਨ। ਪੁਲਿਸ ਦਾ ਕਹਿਣਾ ਹੈ ਕਿ ਦੋ ਡਾਰਕ ਸੇਡਾਨ 134 ਏ ਸਟਰੀਟ 'ਤੇ ਸਾਊਥ ਵੱਲ ਭੱਜਦੀਆਂ ਦੇਖੀਆਂ ਗਈਆਂ।