ਓਨਟਾਰੀਓ ਐਨ.ਡੀ.ਪੀ. ਦੇ ਸਾਬਕਾ ਨੇਤਾ ਸਟੀਫਨ ਲੇਵਿਸ ਦਾ ਦਿਹਾਂਤ

ਕੈਨੇਡਾ ਦੇ ਸਾਬਕਾ ਸਿਆਸਤਦਾਨ ਅਤੇ ਸੰਯੁਕਤ ਰਾਸ਼ਟਰ ਵਿਚ ਦੇਸ਼ ਦੇ ਰਾਜਦੂਤ ਰਹੇ ਸਟੀਫਨ ਲੇਵਿਸ ਇਸ ਫ਼ਾਨੀ ਸੰਸਾਰ ਨੂੰ ਅਲਵਿਦਾ ਕਹਿ ਗਏ ਹਨ। ਉਨ੍ਹਾਂ ਦੀ ਸੰਸਥਾ, ਸਟੀਫਨ ਲੇਵਿਸ ਫਾਊਂਡੇਸ਼ਨ, ਨੇ ਅੱਜ ਆਪਣੀ ਵੈੱਬਸਾਈਟ 'ਤੇ ਇਸ ਦੁਖਦਾਈ ਖ਼ਬਰ ਦੀ ਪੁਸ਼ਟੀ ਕੀਤੀ।

88 ਸਾਲਾ ਲੇਵਿਸ ਲੰਬੇ ਸਮੇਂ ਤੋਂ ਮਾਨਵਤਾ ਦੀ ਸੇਵਾ ਵਿਚ ਸਰਗਰਮ ਸਨ। ਉਹ ਇੱਕ ਸਮੇਂ ਓਨਟਾਰੀਓ ਐਨ.ਡੀ.ਪੀ. ਦੇ ਲੀਡਰ ਰਹਿ ਚੁੱਕੇ ਸਨ ਅਤੇ ਐਵੀ ਲੇਵਿਸ ਦੇ ਪਿਤਾ ਸਨ, ਜਿਨ੍ਹਾਂ ਨੂੰ ਲੰਘੇ ਐਤਵਾਰ ਹੀ ਫੈਡਰਲ ਐਨ.ਡੀ.ਪੀ. ਦਾ ਨਵਾਂ ਲੀਡਰ ਚੁਣਿਆ ਗਿਆ ਹੈ।ਸਟੀਫਨ ਲੇਵਿਸ ਨੇ ਸੰਯੁਕਤ ਰਾਸ਼ਟਰ ਵਿਚ ਕੈਨੇਡਾ ਦੇ ਰਾਜਦੂਤ ਵਜੋਂ ਚਾਰ ਸਾਲ ਸੇਵਾਵਾਂ ਨਿਭਾਈਆਂ ਸਨ।

ਇਸ ਤੋਂ ਇਲਾਵਾ ਉਹ UNICEF ਦੇ ਡਿਪਟੀ ਡਾਇਰੈਕਟਰ ਅਤੇ ਅਫਰੀਕਾ ਵਿਚ ਐਚ.ਆਈ.ਵੀ.-ਏਡਜ਼ ਲਈ ਸੰਯੁਕਤ ਰਾਸ਼ਟਰ ਦੇ ਵਿਸ਼ੇਸ਼ ਦੂਤ ਵੀ ਰਹੇ ਸਨ। 2003 ਵਿਚ ਉਨ੍ਹਾਂ ਸਟੀਫਨ ਲੇਵਿਸ ਫਾਊਂਡੇਸ਼ਨ ਦੀ ਸਥਾਪਨਾ ਕੀਤੀ ਸੀ।

ਇਸ ਫਾਊਂਡੇਸ਼ਨ ਨੇ ਅਫਰੀਕਾ ਵਿਚ ਏਡਜ਼ ਵਿਰੁੱਧ ਲੜ ਰਹੀਆਂ ਸੰਸਥਾਵਾਂ ਲਈ ਹੁਣ ਤੱਕ $200 ਮਿਲੀਅਨ ਤੋਂ ਵੱਧ ਦਾ ਫੰਡ ਇਕੱਠਾ ਕੀਤਾ ਹੈ। ਸਟੀਫਨ ਲੇਵਿਸ ਦੇ ਦਿਹਾਂਤ ਨਾਲ ਕੈਨੇਡਾ ਨੇ ਇੱਕ ਅਜਿਹੀ ਸ਼ਖਸੀਅਤ ਗੁਆ ਦਿੱਤੀ ਹੈ ਜਿਸ ਨੇ ਨਾ ਸਿਰਫ਼ ਦੇਸ਼ ਦੀ ਸਿਆਸਤ ਨੂੰ ਪ੍ਰਭਾਵਿਤ ਕੀਤਾ ਬਲਕਿ ਇੱਕ ਉੱਘੇ ਸਮਾਜਿਕ ਕਾਰਕੁੰਨ ਵੀ ਸਨ।