11.69C Vancouver 11.69C VancouverOct 31, 2025 4:22 PM - Connect Newsroom
ਬੀ. ਸੀ. ਦੇ ਐਜਵੁੱਡ ਸਥਿਤ ਸ਼ੁਤਰਮੁਰਗ ਫਾਰਮ ਦੇ ਮਾਮਲੇ ਵਿਚ ਸੁਪਰੀਮ ਕੋਰਟ ਔਫ ਕੈਨੇਡਾ ਵਲੋਂ 6 ਨਵੰਬਰ ਨੂੰ ਫੈਸਲਾ ਦਿੱਤਾ ਜਾਵੇਗਾ, ਜਿਸ ਵਿਚ ਸਵਉੱਚ ਅਦਾਲਤ ਇਹ ਤੈਅ ਕਰੇਗੀ ਕਿ ਯੂਨੀਵਰਸਲ ਸ਼ੁਤਰਮੁਰਗ ਫਾਰਮ ਦੀ ਉਸ ਦੇ ਸ਼ੁਤਰਮੁਰਗਾਂ ਨੂੰ ਮਾਰਨ ਵਿਰੁੱਧ ਦਾਇਰ ਅੰਤਿਮ ਅਪੀਲ 'ਤੇ ਸੁਣਵਾਈ ਕੀਤੀ ਜਾਵੇ ਜਾਂ ਨਹੀਂ।
ਜੇ ਅਦਾਲਤ ਮਾਮਲੇ ਦੀ ਸੁਣਵਾਈ ਨਾ ਕਰਨ ਦਾ ਫੈਸਲਾ ਕਰਦੀ ਹੈ ਅਤੇ ਸੀ.ਐਫ.ਆਈ.ਏ. ਯਾਨੀ ਕੈਨੇਡੀਅਨ ਫੂਡ ਇੰਸਪੈਕਸ਼ਨ ਏਜੰਸੀ ਦੇ cull order 'ਤੇ ਲੱਗੀ ਰੋਕ ਹਟਾ ਦਿੰਦੀ ਹੈ ਤਾਂ ਸੈਂਕੜੇ ਸ਼ੁਤਰਮੁਰਗਾਂ ਨੂੰ ਮਾਰਨ ਦਾ ਕਾਨੂੰਨੀ ਰਸਤਾ ਸਾਫ ਹੋ ਜਾਵੇਗਾ ਅਤੇ ਜੇ ਅਪੀਲ ਸੁਣਨ ਦੀ ਇਜਾਜ਼ਤ ਦਿੱਤੀ ਜਾਂਦੀ ਹੈ ਤਾਂ ਝੁੰਡ ਦੀ ਕਿਸਮਤ ਬਾਰੇ ਅੰਤਿਮ ਫੈਸਲਾ ਸੁਣਵਾਈ ਤੋਂ ਬਾਅਦ ਆਵੇਗਾ।
ਗੌਰਤਲਬ ਹੈ ਕਿ ਸੀ.ਐਫ.ਆਈ.ਏ. ਵਲੋਂ ਦਸੰਬਰ 2024 ਵਿਚ ਯੂਨੀਵਰਸਲ ਸ਼ੁਤਰਮੁਰਗ ਫਾਰਮ ਦੇ ਕੁਝ ਸ਼ੁਤਰਮੁਰਗਾਂ ਵਿਚ ਏਵੀਅਨ ਫਲੂ ਦਾ ਪਤਾ ਲੱਗਣ ਤੋਂ ਬਾਅਦ ਫਾਰਮ ਨੂੰ ਆਪਣੇ 400 ਸ਼ੁਤਰਮੁਰਗਾਂ ਦੇ ਲਗਭਗ ਪੂਰੇ ਝੁੰਡ ਨੂੰ ਮਾਰਨ ਦਾ ਆਦੇਸ਼ ਦਿੱਤਾ ਗਿਆ ਸੀ ਪਰ ਉਦੋਂ ਤੋਂ ਫਾਰਮ ਇਸ ਦੀ ਲੜਾਈ ਅਦਲਾਤਾਂ ਵਿਚ ਲੜ ਰਿਹਾ ਹੈ।
ਫਾਰਮ ਦੇ ਮਾਲਕਾਂ ਦੀ ਦਲੀਲ ਹੈ ਕਿ ਬਚੇ ਹੋਏ ਸ਼ੁਤਰਮੁਰਗਾਂ ਵਿਚ ਬਿਮਾਰੀ ਦੇ ਕੋਈ ਲੱਛਣ ਨਹੀਂ ਹਨ ਅਤੇ ਉਨ੍ਹਾਂ ਨੂੰ ਮਾਰਿਆ ਨਹੀਂ ਜਾਣਾ ਚਾਹੀਦਾ। ਉਥੇ ਹੀ, ਏਜੰਸੀ ਦਾ ਕਹਿਣਾ ਹੈ ਕਿ ਸਿਹਤਮੰਦ ਦਿਖਾਈ ਦੇਣ ਵਾਲੇ ਸ਼ੁਤਰਮੁਰਗ ਅਜੇ ਵੀ ਬਿਮਾਰੀ ਫੈਲਾ ਸਕਦੇ ਹਨ।
