ਸਰੀ ਦੇ ਘਰ ਨੂੰ ਦੂਜੀ ਵਾਰ ਫਿਰੌਤੀ ਨਾਲ ਸਬੰਧਤ ਗੋਲੀਬਾਰੀ ਦਾ ਬਣਾਇਆ ਗਿਆ ਨਿਸ਼ਾਨਾ

ਸਰੀ ਵਿਚ ਇੱਕ ਪ੍ਰਮੁੱਖ ਪੰਜਾਬੀ ਕਾਰੋਬਾਰੀ ਮਾਲਕ ਦੇ ਘਰ ਨੂੰ ਪੰਜ ਦਿਨਾਂ ਵਿਚ ਦੂਜੀ ਵਾਰ ਗੋਲੀਆਂ ਨਾਲ ਨਿਸ਼ਾਨਾ ਬਣਾਇਆ ਗਿਆ ਹੈ, ਪੁਲਿਸ ਨੇ ਇਸ ਨੂੰ ਐਕਸਟੋਰਸ਼ਨ ਨਾਲ ਸਬੰਧਤ ਮਾਮਲਾ ਦੱਸਿਆ ਹੈ। ਸਰੀ ਪੁਲਿਸ ਦੇ Sgt. Tige Pollock ਮੁਤਾਬਕ, ਤਾਜ਼ਾ ਗੋਲੀਬਾਰੀ ਦੀ ਘਟਨਾ ਬੁੱਧਵਾਰ ਨੂੰ ਸ਼ਾਮ 7.35 ਵਜੇ ਦੇ ਕਰੀਬ ਹੋਈ।

ਸਾਊਥ ਸਰੀ ਵਿਚ 32 ਐਵੇਨਿਊ ਦੇ 17000-ਬਲਾਕ ਵਿਚ ਸਥਿਤ ਇਸ ਘਰ 'ਤੇ ਪਹਿਲਾਂ ਸ਼ਨੀਵਾਰ ਸਵੇਰ 8.40 ਦੇ ਕਰੀਬ ਸ਼ੌਟ ਫਾਇਰ ਕੀਤੇ ਗਏ ਸਨ, ਇਹ ਗੋਲੀਆਂ ਘਰ ਦੀ ਵਿੰਡੋ 'ਤੇ ਮਾਰੀਆਂ ਗਈਆਂ ਸਨ, ਜਿਸ ਕਾਰਨ ਬਾਹਰ ਕੰਮ ਕਰ ਰਿਹਾ ਇੱਕ ਵਰਕਰ ਜ਼ਖਮੀ ਹੋ ਗਿਆ ਸੀ। ਦੂਜੀ ਸ਼ੂਟਿੰਗ ਵਿਚ ਘਰ ਵਿਚ ਕੋਈ ਵੀ ਜ਼ਖਮੀ ਨਹੀਂ ਹੋਇਆ, ਇਹ ਰਿਹਾਇਸ਼ ਨਾਮੀ ਕਾਰੋਬਾਰੀ ਸੰਦੀਪ ਆਹੂਜਾ ਦੀ ਹੈ ਜੋ ਪੰਜਾਬ ਇਨਸ਼ੋਰੈਂਸ ਏਜੰਸੀ ਦੇ ਸਹਿ-ਮਾਲਕ ਹਨ।

ਇਸ ਕੰਪਨੀ ਦੀ ਕੈਨੇਡਾ ਭਰ ਦੇ ਕਈ ਸ਼ਹਿਰਾਂ ਵਿਚ ਮੌਜੂਦਗੀ ਹੈ। ਸਰੀ ਪੁਲਿਸ ਸਰਵਿਸ ਨੇ ਪੁਸ਼ਟੀ ਕੀਤੀ ਕਿ ਦੋਵੇਂ ਗੋਲੀਬਾਰੀ ਦੀਆਂ ਵਾਰਦਾਤਾਂ ਐਕਸਟੋਰਸ਼ਨ ਨਾਲ ਸਬੰਧਤ ਹਨ। ਗੌਰਤਲਬ ਹੈ ਕਿ ਇਸ ਸਾਲ ਹੁਣ ਤੱਕ ਸਰੀ ਪੁਲਿਸ ਨੂੰ ਸ਼ਹਿਰ ਵਿਚ ਐਕਸਟੋਰਸ਼ਨ ਦੀਆਂ 100 ਦੇ ਕਰੀਬ ਰਿਪੋਰਟਸ ਮਿਲ ਚੁੱਕੀਆਂ ਹਨ, ਜਿਨ੍ਹਾਂ ਵਿਚੋਂ 43 ਵਿਚ ਗੋਲੀਬਾਰੀ ਦੇ ਮਾਮਲੇ ਸ਼ਾਮਲ ਹਨ।