23.5C Vancouver 23.5C VancouverJun 10, 2020 5:16 PM -
ਕੋਵਿਡ-19 ਦੇ ਚੱਲਦੇ ਸੂਬਾਈ ਸਿਹਤ ਅਧਿਕਾਰੀਆਂ ਵੱਲੋਂ ਜਾਰੀ ਹਦਾਇਤਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਸਿਟੀ ਆਫ਼ ਸਰ੍ਹੀ ਵੱਲੋਂ ਸ਼ਹਿਰ ਦੇ ਆਉਟਡੋਰ ਪੂਲ, ਸਪ੍ਰੇ ਪਾਰਕ ਅਤੇ ਬੀਚ 15 ਜੂਨ ਤੋਂ ਪੜਾਅ ਦਰ ਪੜਾਅ ਖੋਲੇ ਜਾਣਗੇ।
ਮੇਅਰ ਡਗ ਮਕੈਲਮ ਦਾ ਕਹਿਣਾ ਹੈ ਕਿ ਇੱਕ ਸਾਬਕਾ ਤੈਰਾਕ, ਲਾਈਫਗਾਰਡ ਅਤੇ ਖੇਡ ਸਮਰਥਕ ਵਜੋਂ, ਉਹ ਗਰਮੀਆਂ ਦੇ ਮਹੀਨਿਆਂ ਦੌਰਾਨ ਸ਼ਹਿਰ ਦੀਆਂ ਅਜਿਹੀਆਂ ਸੁਵਿਧਾਵਾਂ ਦੀ ਮਹੱਤਤਾ ਸਮਝਦੇ ਹਨ।
ਮਕੈਲਮ ਨੇ ਦੱਸਿਆ ਕਿ ਸ਼ਹਿਰ ਨਿਵਾਸੀਆਂ ਦੀ ਸਿਹਤ ਅਤੇ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਸਿਟੀ ਵੱਲੋਂ ਕੁਝ ਤਬਦੀਲੀਆਂ ਕੀਤੀਆਂ ਗਈਆਂ ਹਨ ਅਤੇ ਆਮ ਜਨਤਾ ਸਰੀਰਕ ਦੂਰੀ ਵਰਗੀਆਂ ਹਦਾਇਤਾਂ ਦੀ ਪਾਲਣਾ ਕਰਕੇ ਸਿਟੀ ਦੀ ਇਸ ਉਪਰਾਲੇ ਵਿੱਚ ਮਦਦ ਕਰ ਸਕਦੀ ਹੈ।
ਸੁਵਿਧਾਵਾਂ ਦੇ ਖੁੱਲਣ ਦੀ ਸਮਾਂ-ਸਾਰਣੀ:
ਜੂਨ 15: ਬੇਅਰ ਕ੍ਰੀਕ ਪਾਰਕ, ਫਲੀਟਵੁਡ ਪਾਰਕ, ਸਾਊਥ ਸਰ੍ਹੀ ਐਥਲੈਟਿਕ ਪਾਰਕ, ਕਲੋਵਰਡੇਲ ਐਥਲੈਟਿਕ ਪਾਰਕ, ਅਨਵਿਨ ਪਾਰਕ, ਏਰਮਾ ਸਟੀਫ਼ਨਸਨ ਪਾਰਕ, ਗੋਲਡਸਟੋਨ ਪਾਰਕ, ਨਿਊਟਨ ਐਥਲੈਟਿਕ ਪਾਰਕ, ਬ੍ਰਿਜਵਿਉ ਪਾਰਕ ਅਤੇ ਹੇਜ਼ਲਗ੍ਰੋਵ ਪਾਰਕ ਦੇ ਸਪ੍ਰੇ ਪਾਰਕ।
ਜੂਨ 27: ਕਵਾੰਟਲਨ ਪਾਰਕ, ਬੇਅਰ ਕ੍ਰੀਕ ਪਾਰਕ, ਹਿਓਰਥ ਰੋਡ ਪਾਰਕ ਅਤੇ ਗ੍ਰੀਨਵੇ ਪਾਰਕ ਦੇ ਆਉਟਡੋਰ ਪੂਲ।
ਜੂਨ 27: ਕਰੈਸੈਂਟ ਬੀਚ 'ਤੇ ਲਾਈਫ਼ਗਾਰਡਿੰਗ ਸੇਵਾਵਾਂ।
ਜੁਲਾਈ 4: ਸੰਨੀਸਾਈਡ ਪਾਰਕ, ਅਨਵਿਨ ਪਾਰਕ, ਪੋਰਟ ਕੈਲਜ਼ ਪਾਰਕ ਅਤੇ ਹੌਲੀ ਪਾਰਕ ਦੇ ਆਉਟਡੋਰ ਪਾਰਕ।
ਸਿਟੀ ਵੱਲੋਂ ਆਮ ਜਨਤਾ ਨੂੰ ਬਿਮਾਰ ਹੋਣ ਦੀ ਸੂਰਤ ਵਿੱਚ ਘਰ ਰਹਿਣ ਅਤੇ ਵੱਡੇ ਇਕੱਠਾਂ ਤੋਂ ਦੂਰ ਰਹਿਣ ਦੀ ਸਲਾਹ ਦਿੱਤੀ ਗਈ ਹੈ।
ਇਹਨਾਂ ਸੇਵਾਵਾਂ ਦੀ ਵਰਤੋਂ ਕਰਨ ਲਈ, ਲੋਕਾਂ ਨੂੰ ਆਪਣਾ ਹੈਂਡ ਕਲੀਨਰ ਨਾਲ ਲੈਕੇ ਆਉਣ ਅਤੇ ਮੌਕੇ 'ਤੇ ਬਾਕੀ ਲੋਕਾਂ ਤੋਂ ਸਰੀਰਕ ਦੂਰੀ ਬਣਾਕੇ ਰੱਖਣ ਲਈ ਕਿਹਾ ਗਿਆ ਹੈ।
ਇਹਨਾਂ ਸੁਵਿਧਾਵਾਂ 'ਤੇ ਕੁਝ ਤਬਦੀਲੀ ਨਾਲ ਪਬਲਿਕ ਸਵਿਮ ਅਤੇ ਕਮਿਊਨਿਟੀ ਸਵਿਮ ਕਲਾਸਾਂ ਦਾ ਆਯੋਜਨ ਜਾਰੀ ਰਹੇਗਾ।
ਕੋਵਿਡ-19 ਤੋਂ ਬਚਾਅ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਕੀਤੀਆਂ ਗਈਆਂ ਤਬਦੀਲੀਆਂ ਦੇ ਤਹਿਤ, ਪੂਲਾਂ ਵਿੱਚ ਇੱਕ ਸਮੇਂ 'ਤੇ ਉਤਰਨ ਵਾਲੇ ਲੋਕਾਂ ਦੀ ਸੰਖਿਆ ਨੂੰ ਨਿਯੰਤਰਿਤ ਕਰਨ, ਦੂਰੀ ਦਰਸਾਉਣ ਵਾਲੇ ਸੰਕੇਤ ਲਗਾਉਣ, ਅਤੇ ਪਹਿਲਾਂ ਨਾਲੋਂ ਵੱਧ ਫਰਸਟ-ਏਡ ਅਤੇ ਲਾਈਫ਼ਗਾਰਡ ਸੇਵਾਵਾਂ ਮੁਹੱਈਆ ਕਰਵਾਉਣਾ ਸ਼ਾਮਲ ਹੈ।
ਸਿਟੀ ਮੁਤਾਬਕ ਇਹਨਾਂ ਸੁਵਿਧਾਵਾਂ ਨੂੰ ਖੋਲਣ ਦਾ ਇਹ ਫ਼ੈਸਲਾ ਬ੍ਰਿਟਿਸ਼ ਕੋਲੰਬੀਆ ਦੇ ਰੀ-ਸਟਾਰਟ ਪਲੈਨ ਦੇ ਦੂਜੇ ਪੜਾਅ ਨੂੰ ਧਿਆਨ ਵਿੱਚ ਰੱਖ ਕੇ ਲਿਆ ਗਿਆ ਹੈ।
