10.35C Vancouver 10.35C VancouverDec 19, 2025 5:58 PM - Connect Newsroom - Jasmine Singh
ਸਰੀ ਪੁਲਿਸ ਸਰਵਿਸ ਨੇ ਬਾਲ ਜਿਨਸੀ ਸ਼ੋਸ਼ਣ ਅਤੇ ਬੱਚਿਆਂ ਨਾਲ ਜੁੜੇ ਇਤਰਾਜ਼ਯੋਗ ਸਮੱਗਰੀ ਦੇ ਦੋਸ਼ ਵਿਚ ਦੋ ਵਿਅਕਤੀਆਂ ਵਿਰੁੱਧ ਕਈ ਧਾਰਾਵਾਂ ਤਹਿਤ ਕੇਸ ਦਰਜ ਕੀਤੇ ਹਨ। ਪੁਲਿਸ ਨੇ ਦੋਵਾਂ ਮੁਲਜ਼ਮਾਂ ਦੀਆਂ ਤਸਵੀਰਾਂ ਜਾਰੀ ਕਰਦਿਆਂ ਖ਼ਦਸ਼ਾ ਜ਼ਾਹਿਰ ਕੀਤਾ ਹੈ ਕਿ ਇਸ ਮਾਮਲੇ ਵਿਚ ਹੋਰ ਵੀ ਬੱਚੇ ਪੀੜਤ ਹੋ ਸਕਦੇ ਹਨ।
ਸਰੀ ਪੁਲਿਸ ਸਰਵਿਸ ਨੇ ਕਿਹਾ ਕਿ ਮੁਲਜ਼ਮਾਂ ਦੀਆਂ ਤਸਵੀਰਾਂ ਇਸੇ ਇਰਾਦੇ ਨਾਲ ਜਾਰੀ ਕੀਤੀਆਂ ਗਈਆਂ ਹਨ ਤਾਂ ਕਿ ਹੋਰ ਪੀੜਤ ਜਾਂ ਗਵਾਹ ਅੱਗੇ ਆ ਸਕਣ। ਮੁਲਜ਼ਮਾਂ ਦੀ ਪਛਾਣ 28 ਸਾਲਾ ਕਾਰਟਰ ਕੁੱਕ ਅਤੇ 21 ਸਾਲਾ ਮਹਿਲਾ ਟਖੂ ਖਿਓਨ੍ਹ ਉਰਫ ਮੀਕਾ ਨੁਹੀਅਨ ਵਜੋਂ ਦੱਸੀ ਗਈ ਹੈ। ਪੁਲਿਸ ਮੁਤਾਬਕ, ਉਨ੍ਹਾਂ ਵਲੋਂ ਕਥਿਤ ਅਪਰਾਧ ਸਾਲ 2021 ਅਤੇ 2024 ਦਰਮਿਆਨ ਕੀਤੇ ਗਏ ਸਨ।
ਇਸ ਮਾਮਲੇ ਦੀ ਜਾਂਚ ਅਕਤੂਬਰ 2024 ਵਿਚ ਸਰੀ ਆਰ.ਸੀ.ਐਮ.ਪੀ. ਸਪੈਸ਼ਲ ਵਿਕਟਿਮਜ਼ ਯੂਨਿਟ ਵੱਲੋਂ ਸ਼ੁਰੂ ਕੀਤੀ ਗਈ ਸੀ। ਸਰੀ ਪੁਲਿਸ ਸਰਵਿਸ ਨੇ ਕਿਹਾ ਕਿ ਜਾਂਚ ਅਜੇ ਵੀ ਓਪਨ ਹੈ ਅਤੇ ਪੁਲਿਸ ਹੋਰ ਪੀੜਤਾਂ ਦੀ ਤਲਾਸ਼ ਕਰ ਰਹੀ ਹੈ, ਤਾਂ ਜੋ ਮੁਲਜ਼ਮਾਂ ਨੂੰ ਸਖ਼ਤ ਸਜ਼ਾ ਦਿਵਾਈ ਜਾ ਸਕੇ। ਅਧਿਕਾਰੀਆਂ ਨੇ ਕਿਹਾ ਕਿ ਕੋਈ ਵੀ ਪੀੜਤ ਜਾਂ ਗਵਾਹ ਸਰੀ ਪੁਲਿਸ ਸਰਵਿਸ ਨਾਲ 604-599-0502 'ਤੇ ਸੰਪਰਕ ਕਰ ਸਕਦਾ ਹੈ।
