ਸਰੀ ਪੁਲਿਸ ਸਰਵਿਸ ਨੇ ਅੱਜ ਤੋਂ ਸੰਭਾਲੀ ਕਲੋਵਰਡੇਲ ਦੀ ਪੂਰੀ ਜ਼ਿੰਮੇਵਾਰੀ

ਸਰੀ ਪੁਲਿਸ ਸਰਵਿਸ ਨੇ ਅੱਜ ਤੋਂ ਕਲੋਵਰਡੇਲ ਦੀ ਪੂਰੀ ਜ਼ਿੰਮੇਵਾਰੀ ਸੰਭਾਲ ਲਈ ਹੈ। ਇਸ ਨਾਲ ਪਿਛਲੇ 75 ਸਾਲਾਂ ਤੋਂ ਚੱਲੀ ਆ ਰਹੀ ਆਰ.ਸੀ.ਐਮ.ਪੀ. ਦੀ ਸੇਵਾ ਅੱਜ ਖ਼ਤਮ ਹੋ ਗਈ ਹੈ। ਇਹ ਤਬਦੀਲੀ 196 ਸਟ੍ਰੀਟ ਤੋਂ ਲੈ ਕੇ ਫਲੀਟਵੁੱਡ ਅਤੇ ਨਿਊਟਨ ਦੀ ਹੱਦ ਤੱਕ ਅਤੇ ਫਰੇਜ਼ਰ ਰਿਵਰ ਤੋਂ ਲੈ ਕੇ 48 ਐਵੇਨਿਊ ਤੱਕ ਦੇ ਪੂਰੇ ਕਲੋਵਰਡੇਲ ਖੇਤਰ ਵਿਚ ਲਾਗੂ ਹੋਈ ਹੈ।

ਵ੍ਹੇਲੀ/ਸਿਟੀ ਸੈਂਟਰ, ਨਿਊਟਨ ਅਤੇ ਸਾਊਥ ਸਰੀ ਪਹਿਲਾਂ ਹੀ ਐਸ.ਪੀ.ਐਸ.ਕੋਲ ਆ ਗਏ ਸਨ। ਆਰ.ਸੀ.ਐਮ.ਪੀ. ਹੁਣ ਸਿਰਫ਼ ਗਿਲਡਫੋਰਡ ਵਿਚ ਆਪਣੀਆਂ ਸੇਵਾਵਾਂ ਜਾਰੀ ਰੱਖੇਗੀ, ਜਦੋਂ ਤੱਕ ਪੂਰੀ ਤਬਦੀਲੀ ਮੁਕੰਮਲ ਨਹੀਂ ਹੋ ਜਾਂਦੀ। ਹਾਲਾਂਕਿ, ਇਹ ਇੱਕ ਵੱਡੀ ਉਪਲਬਧੀ ਹੈ ਪਰ ਇਸ ਪਿੱਛੇ ਕੁਝ ਗੰਭੀਰ ਮੁੱਦੇ ਵੀ ਰਹੇ ਹਨ। ਐਸ.ਪੀ.ਐਸ. ਦੇ ਚੀਫ਼ ਕਾਂਸਟੇਬਲ ਨੌਰਮ ਲਿਪਿੰਸਕੀ ਨੇ ਪਹਿਲਾਂ ਇਸ ਤਬਦੀਲੀ ਨੂੰ ਜੁਲਾਈ ਤੱਕ ਟਾਲਣ ਦੀ ਮੰਗ ਕੀਤੀ ਸੀ।

ਉਨ੍ਹਾਂ ਦਾ ਕਹਿਣਾ ਸੀ ਕਿ ਸ਼ਹਿਰ ਵਿਚ ਚੱਲ ਰਹੇ ਐਕਸਟੋਸ਼ਨ Crisis ਕਾਰਨ ਅਧਿਕਾਰੀ ਪਹਿਲਾਂ ਹੀ ਵਿਸ਼ੇਸ਼ ਜਾਂਚ ਟੀਮਾਂ ਵਿਚ ਲਗਾਏ ਗਏ ਹਨ ਪਰ ਸੂਬਾ ਸਰਕਾਰ ਨੇ ਮੰਗ ਨੂੰ ਰੱਦ ਕਰ ਦਿੱਤਾ ਸੀ। ਇਸ ਵਿਚਕਾਰ ਨਵੇਂ ਤਜਰਬੇਕਾਰ ਅਧਿਕਾਰੀਆਂ ਨੂੰ ਆਕਰਸ਼ਿਤ ਕਰਨ ਲਈ ਐਸ.ਪੀ.ਐਸ. ਨੇ ਸਾਈਨਿੰਗ ਬੋਨਸ $20,000 ਤੋਂ ਵਧਾ ਕੇ $30,000 ਕੀਤਾ ਹੈ, ਜਿਸ ਦੀ ਮੇਅਰ ਬ੍ਰੈਂਡਾ ਲੋਕ ਵੱਲੋਂ ਨਿਖੇਧੀ ਕੀਤੀ ਗਈ ਹੈ।