ਸਰੀ ਪੁਲਿਸ ਸਰਵਿਸ ਨੇ ਸੈਟੇਲਾਈਟ ਪੁਲਿਸ ਸਿਖਲਾਈ ਅਕੈਡਮੀ ਲਈ ਪ੍ਰਸਤਾਵ ਕੀਤਾ ਪੇਸ਼

ਸਰੀ ਪੁਲਿਸ ਸਰਵਿਸ ਨੇ ਬੀ.ਸੀ. ਦੇ ਪਬਲਿਕ ਸੇਫਟੀ ਅਤੇ ਸਾਲਿਸਿਟਰ ਜਨਰਲ ਮੰਤਰਾਲਾ ਨੂੰ ਸਰੀ ਵਿਚ ਸੈਟੇਲਾਈਟ ਪੁਲਿਸ ਅਕੈਡਮੀ ਸਥਾਪਤ ਕਰਨ ਦਾ ਪ੍ਰਸਤਾਵ ਭੇਜਿਆ ਹੈ। ਇਸ ਕਦਮ ਦਾ ਉਦੇਸ਼ ਨਵੀਂ ਭਰਤੀ ਪ੍ਰਕਿਰਿਆ ਨੂੰ ਤੇਜ਼ ਕਰਨਾ ਅਤੇ ਸੂਬੇ ਦੀ ਮੁੱਖ ਪੁਲਿਸ ਸਿਖਲਾਈ ਸਹੂਲਤ-JIBC ਯਾਨੀ ਜਸਟਿਸ ਇੰਸਟੀਚਿਊਟ ਆਫ਼ ਬੀ.ਸੀ.'ਤੇ ਬੋਝ ਨੂੰ ਘਟਾਉਣਾ ਹੈ। ਪ੍ਰਸਤਾਵ ਅਨੁਸਾਰ,ਐਸ.ਪੀ.ਐਸ.ਦੇ ਟ੍ਰੇਨਿੰਗ ਸੈਂਟਰ ਵਿਚ ਹਰ ਸਾਲ ਘੱਟੋ-ਘੱਟ 90 ਨਵੇਂ ਭਰਤੀਆਂ ਨੂੰ ਸਿਖਲਾਈ ਦਿੱਤੀ ਜਾ ਸਕਦੀ ਹੈ।

ਚੀਫ਼ ਕਾਂਸਟੇਬਲ ਨੌਰਮ ਲਿਪਿੰਸਕੀ ਨੇ ਕਿਹਾ ਕਿ ਐਸ.ਪੀ.ਐਸ. ਦੀ ਨਵੀਂ ਭਰਤੀ ਨੂੰ ਟ੍ਰੇਨ ਕਰਨ ਲਈ ਸਰੀ ਦੇ ਹੀ ਮੌਜੂਦਾ ਟ੍ਰੇਨਿੰਗ ਸੈਂਟਰ ਅਤੇ ਇੰਸਟ੍ਰਕਟਰ ਦੀ ਵਰਤੋਂ ਨਾਲ JIBC ਕੋਲ ਹੋਰ ਪੁਲਿਸ ਏਜੰਸੀਆਂ ਦੀਆਂ ਜ਼ਰੂਰਤਾਂ ਨੂੰ ਵਧੀਆ ਤਰੀਕੇ ਨਾਲ ਪੂਰਾ ਕਰਨ ਦੀ ਸਮਰਥਾ ਵਧੇਗੀ। ਸਰੀ ਸ਼ਹਿਰ ਅਤੇ ਸਰੀ ਪੁਲਿਸ ਬੋਰਡ ਦੋਵਾਂ ਨੇ ਇਸ ਯੋਜਨਾ ਦਾ ਸਮਰਥਨ ਕੀਤਾ ਹੈ।

ਮੇਅਰ ਬ੍ਰੈਂਡਾ ਲੌਕ ਦਾ ਕਹਿਣਾ ਹੈ ਕਿ ਇਸ ਨਾਲ ਭਰਤੀ ਦੀ ਪ੍ਰਕਿਰਿਆ ਤੇਜ਼ ਹੋਵੇਗੀ ਅਤੇ ਖਰਚੇ ਘਟਣਗੇ। ਇਹ ਮੰਗ ਇਸ ਲਈ ਕੀਤੀ ਗਈ ਹੈ ਕਿ ਕਿਉਂਕਿ ਸਰੀ ਇਸ ਸਮੇਂ ਕੈਨੇਡਾ ਦੇ ਇਤਿਹਾਸ ਵਿਚ ਸਭ ਤੋਂ ਵੱਡੇ ਪੁਲਿਸ ਟ੍ਰਾਂਜ਼ੀਸ਼ਨ ਵਿਚੋਂ ਲੰਘ ਰਿਹਾ ਹੈ, ਜਿਸ ਲਈ ਇਸ ਵੇਲੇ ਲਗਭਗ 250 ਅਸਾਮੀਆਂ ਭਰਨੀਆਂ ਬਾਕੀ ਹਨ। ਇਸੇ ਤਰ੍ਹਾਂ ਦੇ ਸਿਖਲਾਈ ਮਾਡਲ ਐਲਬਰਟਾ ਅਤੇ ਓਨਟਾਰੀਓ ਦੀਆਂ ਪੁਲਿਸ ਏਜੰਸੀਆਂ ਵਿਚ ਚੱਲ ਰਹੇ ਹਨ।