12.28C Vancouver 12.28C VancouverOct 27, 2025 6:42 PM - Connect Newsroom - Pervez Sandhu
ਸਰੀ ਵਿੱਚ ਵੀਕਐਂਡ ਦੌਰਾਨ ਸ਼ਨੀਵਾਰ ਨੂੰ ਇੱਕ ਨਵੇਂ ਸਪੋਰਟਿੰਗ ਅਤੇ ਮਨੋਰੰਜਤ ਸਹੂਲਤ ਵਾਲੇ ਕਲੋਵਰਡੇਲ ਸਪੋਰਟ ਐਂਡ ਆਈਸ ਕੰਪਲੈਕਸ ਨੂੰ ਖੋਲ੍ਹ ਦਿੱਤਾ ਗਿਆ ਹੈ।
ਇਸ ਦੀ ਸ਼ੁਰੂਆਤ ਮੌਕੇ ਸਿਟੀ ਆਫ ਸਰੀ ਦੇ ਕਾਉਂਸਲਰਸ ਅਤੇ ਮੇਅਰ ਬ੍ਰੈਂਡਾ ਲੌਕ ਪਹੁੰਚੇ ਹੋਏ ਸਨ।
ਇਸ ਕੰਪਲੈਕਸ ਵਿੱਚ ਹਾਕੀ ਸੰਬੰਧੀ ਦੋ ਆਈਸ ਰਿੰਕ ਹਨ ਅਤੇ ਪੂਰੇ ਆਕਾਰ ਦੇ ਡ੍ਰੈਸਿੰਗ ਰੂਮ, ਦੋ ਅਧਿਕਾਰੀਆਂ ਦੇ ਕਮਰੇ ਅਤੇ ਲੋਕਾਂ ਦੇ ਬੈਠਣ ਲਈ 200 ਤੋਂ ਵਧ ਸੀਟਾਂ ਅਤੇ ਕਈ ਹੋਰ ਸਹੂਲਤਾਂ ਉਪਲਬਧ ਹਨ।
ਇਸ ਤੋਂ ਇਲਾਵਾ ਸਕੇਟ ਅਤੇ ਹੈਲਮੈਟ ਆਦਿ ਕਿਰਾਏ 'ਤੇ ਲੈਣ ਜਿਹੀ ਸੁਵਿਧਾ ਅਤੇ ਖਾਣਪੀਣ ਦੀ ਸਮਗਰੀ ਆਦਿ ਦਾ ਵੀ ਪ੍ਰਬੰਧ ਹੈ।
ਕਨੈਕਟ ਐਫ.ਐਮ. ਨਾਲ ਗੱਲ ਕਰਦਿਆਂ ਮੇਅਰ ਲੌਕ ਨੇ ਕਿਹਾ ਕਿ, "ਕਲੋਵਰਡੇਲ ਤੇਜ਼ੀ ਨਾਲ ਵਿਕਾਸ ਕਰ ਰਿਹਾ ਹੈ, ਅਤੇ ਇਹ ਨਵਾਂ ਕੰਪਲੈਕਸ ਉਹ ਸਮਾਵੇਸ਼ੀ, ਪਹੁੰਚਯੋਗ ਅਤੇ ਉੱਚ-ਗੁਣਵੱਤਾ ਵਾਲੀਆਂ ਮਨੋਰੰਜਨ ਸਹੂਲਤਾਂ ਪ੍ਰਦਾਨ ਕਰਦਾ ਹੈ, ਜਿਨ੍ਹਾਂ ਦੀਆਂ ਪਰਿਵਾਰਾਂ ਨੇ ਲੰਮੇ ਸਮੇਂ ਤੋਂ ਉਡੀਕ ਕੀਤੀ ਹੋਈ ਸੀ।"
ਇਹ ਕੰਪਲੈਕਸ ਆਈਸ ਹਾਕੀ, ਫਿਗਰ ਸਕੇਟਿੰਗ, ਪਬਲਿਕ ਲੈਸਨਜ਼ ਅਤੇ ਗਰਮੀਆਂ ਦੇ ਸਮੇਂ ਡ੍ਰਾਈ-ਫਲੋਰ ਖੇਡਾਂ ਜਿਵੇਂ ਕਿ ਲੈਕਰਾਸ ਅਤੇ ਬਾਲ ਹਾਕੀ ਸਮੇਤ ਕਈ ਪ੍ਰੋਗਰਾਮਾਂ ਲਈ ਵਰਤਿਆ ਜਾ ਸਕਦਾ ਹੈ।
ਮੇਅਰ ਲੌਕ ਨੇ ਕਲੋਵਰਡੇਲ 'ਚ 129 ਏਕੜ ਦੇ ਹੋਰ ਵਿਕਾਸ ਦੀ ਗੱਲ ਕੀਤੀ ਅਤੇ ਆਖਿਆ ਕਿ ਸਰੀ ਲਈ 10,000 ਸੀਟਾਂ ਵਾਲੇ ਅਰੀਨਾ 'ਤੇ ਕੰਮ ਅੱਗੇ ਵਧਾਉਣ ਲਈ ਵੀ ਪ੍ਰੋਗ੍ਰੈਸ ਹੋ ਰਹੀ ਹੈ।
