ਐਬਟਸਫੋਰਡ 'ਚ ਕਾਰੋਬਾਰੀ ਤੋੜ-ਭੰਨ ਕਰਕੇ ਏਟੀਐਮ ਚੋਰੀ ਕਰਨ ਤੋਂ ਬਾਅਦ ਸ਼ੱਕੀ ਨੂੰ ਕੀਤਾ ਗਿਆ ਗ੍ਰਿਫ਼ਤਾਰ

ਐਬਟਸਫੋਰਡ ਵਿਚ ਕੱਲ੍ਹ ਰਾਤ ਸ਼ੱਕੀਆਂ ਵਲੋਂ ਏ.ਟੀ.ਐਮ. ਚੋਰੀ ਕਰਨ ਦੀ ਖ਼ਬਰ ਸਾਹਮਣੇ ਆਈ ਹੈ। ਪੁਲਿਸ ਮੁਤਾਬਕ, ਰਾਤ ਕਰੀਬ 9 ਵਜੇ ਔਫੀਸਰ ਨੂੰ ਔਗਸਟਨ ਪਾਰਕਵੇਅ ਦੇ 36300 ਬਲਾਕ ਸਥਿਤ ਇੱਕ ਕਾਰੋਬਾਰ ਵਿਚ ਇਸ ਘਟਨਾ ਦੀ ਸੂਚਨਾ ਮਿਲੀ ਅਤੇ ਪੁਲਿਸ ਦੇ ਪਹੁੰਚਣ ਤੋਂ ਪਹਿਲਾਂ ਹੀ ਸ਼ੱਕੀ ਮੌਕੇ ਤੋਂ ਭੱਜ ਚੁੱਕੇ ਸਨ।

ਹਾਲਾਂਕਿ, ਰਾਤ 9:41 ਵਜੇ ਦੇ ਲਗਭਗ ਐਬਟਸਫੋਰਡ ਪੁਲਿਸ ਵਿਭਾਗ ਨੂੰ ਕਿਸੇ ਨੇ ਫੋਨ ਕਰਕੇ ਵੇਲਜ਼ ਗ੍ਰੇ ਐਵੇਨਿਊ ਅਤੇ ਮੈਕਕਿਨਲੇ ਡਰਾਈਵ ਦੇ ਇਲਾਕੇ ਵਿਚ ਸ਼ੱਕੀ ਗੱਡੀ ਬਾਰੇ ਰਿਪੋਰਟ ਦਿੱਤੀ, ਇਸ 'ਤੇ ਤੁਰੰਤ ਮੋਰਚਾ ਸੰਭਾਲਦੇ ਹੋਏ ਫਰੰਟਲਾਈਨ ਅਧਿਕਾਰੀਆਂ ਨੇ ਏਅਰ 1 ਅਤੇ ਪੁਲਿਸ ਡੌਗ ਸਰਵਿਸ ਦੀ ਮਦਦ ਨਾਲ ਖੇਤਰ ਦੀ ਘੇਰਾਬੰਦੀ ਕੀਤੀ ਅਤੇ ਇੱਕ ਸ਼ੱਕੀ ਨੂੰ ਕਾਬੂ ਕੀਤਾ, ਜਾਂਚ ਵਿਚ ਇਹ ਵੀ ਪਤਾ ਲੱਗਾ ਕਿ ਗੱਡੀ ਵੀ ਚੋਰੀ ਦੀ ਸੀ।

ਪੁਲਿਸ ਮੁਤਾਬਕ, ਚੋਰੀ ਹੋਇਆਏ.ਟੀ.ਐਮ. ਬਰਾਮਦ ਕਰ ਲਿਆ ਗਿਆ ਹੈ ਅਤੇ ਮੁਲਜ਼ਮ ਹਿਰਾਸਤ ਵਿਚ ਹੈ। ਫਿਲਹਾਲ ਸ਼ੱਕੀ ਦੀ ਪਛਾਣ ਨਹੀਂ ਦੱਸੀ ਗਈ, ਔਫੀਸਰ ਮੁਤਾਬਕ, ਮਾਮਲੇ ਦੀ ਅੱਗੇ ਦੀ ਜਾਂਚ ਅਜੇ ਵੀ ਜਾਰੀ ਹੈ।