ਨਿਊ ਵੈਸਟਮਿੰਸਟਰ ਦੇ ਵੈਸਟ ਐਂਡ ਇਲਾਕੇ ਵਿੱਚ ਦਰਜਨ ਤੋਂ ਵੱਧ ਵਾਹਨਾਂ ਦੀ ਭੰਨਤੋੜ, ਸ਼ੱਕੀ ਗ੍ਰਿਫ਼ਤਾਰ

ਨਿਊ ਵੈਸਟਮਿੰਸਟਰ ਦੇ ਵੈਸਟ ਐਂਡ ਇਲਾਕੇ ਵਿਚ ਇੱਕ ਦਰਜਨ ਤੋਂ ਵੱਧ ਵਾਹਨਾਂ ਨਾਲ ਭੰਨਤੋੜ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਮੰਗਲਵਾਰ ਦੀ ਦੇਰ ਰਾਤ ਅਤੇ ਬੁੱਧਵਾਰ ਦੇ ਤੜਕੇ ਵਿਚਕਾਰ 14 ਕਾਰਾਂ ਅਤੇ ਵਪਾਰਕ ਸਥਾਨਾਂ ਦੇ ਸ਼ੀਸ਼ੇ ਤੋੜੇ ਗਏ।

ਪੁਲਿਸ ਨੂੰ ਪਹਿਲਾਂ ਡਬਲਿਨ ਸਟ੍ਰੀਟ ਦੇ 1500 ਬਲਾਕ ਵਿਚ ਕਾਰ ਅਲਾਰਮ ਵੱਜਣ ਦੀ ਕਾਲ ਆਈ ਅਤੇ ਲਗਭਗ ਦੋ ਘੰਟੇ ਬਾਅਦ ਤੜਕੇ ਦੋ ਵਜੇ ਪੁਲਿਸ ਨੂੰ 12th ਸਟ੍ਰੀਟ 'ਤੇ ਇੱਕ ਕਾਰੋਬਾਰ ਵਿਚ ਬੁਲਾਇਆ ਗਿਆ, ਜਿੱਥੇ ਮਾਲਕ ਨੇ ਇੱਕ ਸਾਈਕਲ 'ਤੇ ਸਵਾਰ ਵਿਅਕਤੀ ਨੂੰ ਸਾਹਮਣੇ ਵਾਲੀ ਖਿੜਕੀ ਨੂੰ ਲੱਤ ਮਾਰ ਕੇ ਤੋੜਦੇ ਦੇਖਣ ਦੀ ਰਿਪੋਰਟ ਦਿੱਤੀ।

ਥੋੜ੍ਹੀ ਦੇਰ ਬਾਅਦ ਅਧਿਕਾਰੀਆਂ ਨੇ ਐਡਿਨਬਰਗ ਸਟ੍ਰੀਟ ਅਤੇ ਹੈਨਲੀ ਸਟ੍ਰੀਟ ਨੇੜੇ ਸ਼ੱਕੀ ਨੂੰ ਲੱਭਿਆ ਅਤੇ ਉਸ ਨੂੰ ਗ੍ਰਿਫਤਾਰ ਕੀਤਾ। ਸਾਰਜੈਂਟ ਐਂਡਰੂ ਲੀਵਰ ਨੇ ਕਿਹਾ ਕਿ ਇਹ ਪੂਰੀ ਤਰ੍ਹਾਂ ਬੇਤੁਕਾ ਵਿਵਹਾਰ ਸੀ। ਉਨ੍ਹਾਂ ਦੱਸਿਆ ਕਿ ਦੋ ਕਾਰੋਬਾਰੀ ਮਾਲਕਾਂ ਨੇ ਨੁਕਸਾਨ ਹੋਣ ਦੀ ਰਿਪੋਰਟ ਕੀਤੀ ਹੈ ਅਤੇ ਹੋਰ ਸੰਭਾਵੀ ਪੀੜਤਾਂ ਨੂੰ ਨਿਊ ਵੈਸਟਮਿੰਸਟਰ ਨਾਲ ਸੰਪਰਕ ਕਰਨ ਲਈ ਕਿਹਾ ਗਿਆ ਹੈ।