ਰਿਚਮੰਡ ਵਿੱਚ ਹਿਟ-ਐਂਡ-ਰਨ ਮਾਮਲੇ ਵਿੱਚ ਨੌਜਵਾਨ ਦੀ ਹਾਲਤ ਗੰਭੀਰ, ਪੁਲਿਸ ਵੱਲੋਂ ਵਾਹਨ ਦੀ ਤਲਾਸ਼ ਜਾਰੀ

ਰਿਚਮੰਡ ਵਿਚ ਹਿਟ-ਐਂਡ-ਰਨ ਦਾ ਗੰਭੀਰ ਮਾਮਲਾ ਸਾਹਮਣੇ ਆਇਆ ਹੈ, ਜਿਸ ਵਿਚ ਜ਼ਖਮੀ ਹੋਇਆ 17 ਸਾਲਾ ਨੌਜਵਾਨ ਹਸਪਤਾਲ ਵਿਚ ਜਿੰਦਗੀ ਅਤੇ ਮੌਤ ਦੀ ਲੜਾਈ ਲੜ ਰਿਹਾ ਹੈ। ਪੁਲਿਸ ਵਲੋਂ ਡਰਾਈਵਰ ਦੀ ਭਾਲ ਕੀਤੀ ਜਾ ਰਹੀ ਹੈ। ਰਿਚਮੰਡ ਆਰ.ਸੀ.ਐਮ.ਪੀ. ਅਨੁਸਾਰ, ਸ਼ਨੀਵਾਰ ਰਾਤ ਲਗਭਗ 11:30 ਵਜੇ ਨੰ. 3 ਰੋਡ ਦੇ 4200 ਬਲਾਕ ਵਿਚ ਹੰਗਾਮੇ ਦੀਆਂ ਕਈ ਰਿਪੋਰਟਸ ਮਿਲੀਆਂ ਸਨ, ਜਦੋਂ ਪੁਲਿਸ ਮੌਕੇ 'ਤੇ ਪਹੁੰਚੀ ਤਾਂ ਉੱਥੇ 17 ਸਾਲਾ ਨੌਜਵਾਨ ਬੇਹੋਸ਼ ਅਤੇ ਲਹੂ-ਲੁਹਾਣ ਹਾਲਤ ਵਿਚ ਮਿਲਿਆ। ਐਮਰਜੈਂਸੀ ਹੈਲਥ ਸਰਵਿਸ ਵਲੋਂ ਉਸ ਨੂੰ ਗੰਭੀਰ ਹਾਲਤ ਵਿਚ ਹਸਪਤਾਲ ਲਿਜਾਇਆ ਗਿਆ।

ਪੁਲਿਸ ਦੀ ਸ਼ੁਰੂਆਤੀ ਜਾਂਚ ਵਿਚ ਸਾਹਮਣੇ ਆਇਆ ਹੈ ਕਿ ਸੜਕ ਦੇ ਨੇੜੇ ਹੋਏ ਕਿਸੇ ਝਗੜੇ ਤੋਂ ਬਾਅਦ ਇਹ ਹਾਦਸਾ ਵਾਪਰਿਆ। ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਹੀ ਇੱਕ ਵੀਡੀਓ ਵਿਚ ਦੇਖਿਆ ਜਾ ਸਕਦਾ ਹੈ ਕਿ ਤਿੰਨ ਨੌਜਵਾਨਾਂ ਦਾ ਇੱਕ ਗਰੁੱਪ ਨੇੜੇ ਪਾਰਕਿੰਗ ਲਾਟ ਵਿਚ ਲੜ ਰਿਹਾ ਸੀ, ਜੋ ਬਾਅਦ ਵਿਚ ਸੜਕ ਵੱਲ ਦੌੜ ਪਏ। ਇਸੇ ਦੌਰਾਨ ਇੱਕ ਗੱਡੀ ਨੇ ਇੱਕ ਨੌਜਵਾਨ ਨੂੰ ਟੱਕਰ ਮਾਰੀ ਅਤੇ ਬਿਨਾਂ ਰੁਕੇ ਨਿਕਲ ਗਈ।

ਪੁਲਿਸ ਨੂੰ ਸ਼ੱਕ ਹੈ ਕਿ ਹਾਦਸੇ ਵਿਚ ਸ਼ਾਮਲ ਗੱਡੀ ਡਾਰਕ ਫੋਰਡ ਫੀਏਸਟਾ ਸੀ। ਪੁਲਿਸ ਨੇ ਕਿਹਾ ਕਿ ਇਸ ਮਾਮਲੇ ਵਿਚ ਹਿੱਟ-ਐਂਡ-ਰਨ ਦੇ ਨਾਲ-ਨਾਲ ਝਗੜੇ ਦੇ ਸੰਬੰਧ ਵਿਚ ਸਰੀਰਕ ਨੁਕਸਾਨ ਪਹੁੰਚਾਉਣ ਵਾਲੇ ਕਥਿਤ ਹਮਲੇ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ।