ਐਲਬਰਟਾ ਦੀ ਪ੍ਰੀਮੀਅਰ ਨੇ ਗ੍ਰੀਨ ਲਾਈਨ ਪ੍ਰੋਜੈਕਟ ਜਾਰੀ ਰੱਖਣ ਲਈ ਕੁਝ ਸ਼ਰਤਾਂ 'ਤੇ ਭਰੀ ਹਾਮੀ

ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਅਤੇ ਕੈਲਗਰੀ ਦੀ ਮੇਅਰ ਨੇ ਸੋਮਵਾਰ ਵਰਚੁਅਲ ਮੀਟਿੰਗ ਕੀਤੀ। ਇਸ ਦੌਰਾਨ ਪ੍ਰੀਮੀਅਰ ਨੇ ਕਿਹਾ ਕਿ ਜੇਕਰ ਗ੍ਰੀਨ ਲਾਈਨ ਪ੍ਰੋਜੈਕਟ ਨਾਲ ਵੱਧ ਤੋਂ ਵੱਧ ਕੈਲਗੈਰੀਅਨਜ਼ ਨੂੰ ਇਸ ਦਾ ਲਾਭ ਹੋਵੇਗਾ ਤਾਂ ਉਹ ਜ਼ਰੂਰ ਇਸ ਨੂੰ ਜਾਰੀ ਰੱਖਣਗੇ।

ਮੰਗਲਵਾਰ ਸਿਟੀ ਹਾਲ ਵਿਚ ਗੋਂਡਕ ਨੇ ਦੱਸਿਆ ਕਿ ਸਮਿਥ ਨੇ ਕਿਹਾ ਕਿ ਉਹ ਵੀ ਕੈਲਗਰੀ ਦੇ ਸਾਊਥਈਸਟ ਵਿਚ ਪੈਂਦੇ ਸਟੇਸ਼ਨ ਸੇਟਨ ਤੱਕ ਟਰੇਨਜ਼ ਜਾਂਦੀਆਂ ਦੇਖਣਾ ਚਾਹੁੰਦੀ ਹੈ। ਦੱਸ ਦਈਏ ਕਿ ਪਿਛਲੇ ਹਫਤੇ ਸੂਬੇ ਦੇ ਆਵਾਜਾਈ ਮੰਤਰੀ ਡੇਵਿਨ ਡਰੀਸ਼ਨ ਨੇ ਕੈਲਗਰੀ ਦੀ ਮੇਅਰ ਨੂੰ ਪੱਤਰ ਲਿਖ ਕੇ ਦੱਸਿਆ ਸੀ ਕਿ ਉਹ ਮੈਗਾ ਪ੍ਰੋਜੈਕਟ ਲਈ $6.3-ਅਰਬ ਦੀ ਫੰਡਿੰਗ ਨੂੰ ਬੰਦ ਕਰ ਰਹੇ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਸ ਪ੍ਰੋਜੈਕਟ ਨਾਲ ਕੈਲਗਰੀ ਦੇ ਬਹੁਤ ਘੱਟ ਲੋਕਾਂ ਨੂੰ ਫਾਇਦਾ ਹੋਵੇਗਾ।

ਗੌਰਤਲਬ ਹੈ ਕਿ ਡਰੀਸ਼ਨ ਦਾ ਕਹਿਣਾ ਹੈ ਕਿ ਸੂਬਾ ਥਰਡ ਪਾਰਟੀ ਸਲਾਹਕਾਰ ਨੂੰ ਇਸ ਸਬੰਧੀ ਜਾਂਚ ਕਰਨ ਲਈ ਬੁਲਾਵੇਗਾ। ਇਸ ਦੇ ਰੀਵਿਊ ਨੂੰ ਦਸੰਬਰ ਦੇ ਆਖਿਰ ਤੱਕ ਪੇਸ਼ ਕਰਨਗੇ।