ਲੇਬਰ ਡੇਅ ਦੇ ਲੌਂਗ ਵੀਕੈਂਡ ਦੌਰਾਨ ਹਜ਼ਾਰਾਂ ਆਸਮਾਨੀ ਬਿਜਲੀ ਡਿੱਗਣ ਦੀਆਂ ਵਾਪਰੀਆਂ ਘਟਨਾਵਾਂ

ਬੀ.ਸੀ. ਵਾਈਲਡਫਾਇਰ ਸਰਵਿਸ ਦਾ ਕਹਿਣਾ ਹੈ ਕਿ ਲੇਬਰ ਡੇਅ ਦੇ ਲੌਂਗ ਵੀਕੈਂਡ ਦੌਰਾਨ ਹਜ਼ਾਰਾਂ ਆਸਮਾਨੀ ਬਿਜਲੀ ਡਿੱਗਣ ਦੀਆਂ ਘਟਨਾਵਾਂ ਹੋਈਆਂ ਹਨ, ਜਿਸ ਦਾ ਮਤਲਬ ਹੈ ਕਿ ਆਉਣ ਵਾਲੇ ਦਿਨਾਂ ਵਿਚ ਹੋਰ ਨਵੀਆਂ ਅੱਗਾਂ ਦਾ ਪਤਾ ਲੱਗਣ ਦੀ ਸੰਭਾਵਨਾ ਹੈ। ਏਜੰਸੀ ਨੇ ਕਿਹਾ ਕਿ ਮੌਜੂਦਾ ਸਮੇਂ ਬੀ. ਸੀ. ਵਿਚ ਲਗਭਗ 165 ਥਾਵਾਂ 'ਤੇ ਜੰਗਲੀ ਅੱਗਾਂ ਸਰਗਰਮ ਹਨ ਅਤੇ ਮੰਨਿਆ ਜਾ ਰਿਹਾ ਹੈ ਕਿ ਇਨ੍ਹਾਂ ਵਿਚੋਂ ਕਰੀਬ 75 ਫੀਸਦੀ ਬਿਜਲੀ ਡਿੱਗਣ ਨਾਲ ਲੱਗੀਆਂ ਸਨ।

ਬੀ.ਸੀ. ਵਾਈਲਡਫਾਇਰ ਸਰਵਿਸ ਨੇ ਕਿਹਾ ਕਿ ਲਗਭਗ 40 ਫੀਸਦੀ ਅੱਗਾਂ ਕੰਟਰੋਲ ਤੋਂ ਬਾਹਰ ਹਨ, ਜਦੋਂ ਕਿ 20 ਫੀਸਦੀ 'ਤੇ ਕਾਬੂ ਪਾਇਆ ਜਾ ਰਿਹਾ ਹੈ, ਜਦੋਂ ਕਿ ਹੋਰ 40 ਫੀਸਦੀ ਕਾਬੂ ਕੀਤੀਆਂ ਜਾ ਚੁੱਕੀਆਂ ਹਨ। ਏਜੰਸੀ ਨੇ ਇਹ ਵੀ ਚਿਤਾਵਨੀ ਦਿੱਤੀ ਕਿ ਆਮ ਨਾਲੋਂ ਵੱਧ ਉੱਚ ਤਾਪਮਾਨ ਅਤੇ ਲੰਮੇ ਸਮੇਂ ਤੱਕ ਖੁਸ਼ਕ ਮੌਸਮ ਕਾਰਨ ਨਵੀਆਂ ਜੰਗਲੀ ਅੱਗ ਲੱਗਣ ਦੀ ਸੰਭਾਵਨਾ ਬਹੁਤ ਜ਼ਿਆਦਾ ਬਣੀ ਹੋਈ ਹੈ। ਹਾਲਾਂਕਿ, ਰਾਹਤ ਦੀ ਗੱਲ ਇਹ ਹੈ ਕਿ ਇਸ ਸਮੇਂ ਵਾਈਲਡ ਫਾਇਰ ਆਫ ਨੋਟ ਵਿਚ ਕੋਈ ਵੀ ਅੱਗ ਨਹੀਂ ਹੈ।