16.79C Vancouver 16.79C VancouverAug 5, 2025 12:51 PM - The Canadian Press
ਕੈਨੇਡਾ ਅਮਰੀਕਾ ਬਾਰਡਰ ਨੇੜੇ 44 ਵਿਦੇਸ਼ੀ ਨਾਗਰਿਕਾਂ ਨੂੰ ਲਿਜਾ ਰਹੀ ਇੱਕ ਕਿਊਬ ਵੈਨ ਫੜ੍ਹੀ ਗਈ ਹੈ,ਜਿਸ ਦੇ ਸਬੰਧ ਵਿਚ ਕੈਨੇਡਾ ਬਾਰਡਰ ਸਰਵਿਸਸ ਏਜੰਸੀ ਨੇ ਤਿੰਨ ਕਥਿਤ ਤਸਕਰਾਂ ਨੂੰ ਗ੍ਰਿਫਤਾਰ ਕੀਤਾ ਅਤੇ ਉਨ੍ਹਾਂ 'ਤੇ ਦੋਸ਼ ਲਗਾਏ ਹਨ। ਏਜੰਸੀ ਨੇ ਕਿਹਾ ਕਿ ਇਹ ਕਰਾਵਾਈ ਦੱਖਣੀ ਕਿਊਬੈਕ ਵਿਚ ਅਮਰੀਕਾ ਦੀ ਸਰਹੱਦ ਨਾਲ ਲੱਗਦੇ ਟਾਊਨ ਸਟੈਨਸਟੇਡ ਵਿਚ ਸ਼ਨੀਵਾਰ ਅਤੇ ਐਤਵਾਰ ਦੀ ਦਰਿਮਆਨੀ ਰਾਤ ਕਰੀਬ 2.20 ਵਜੇ ਆਰ.ਸੀ.ਐਮ.ਪੀ. ਅਧਿਕਾਰੀ ਨੇ ਕੀਤੀ।
ਆਰਸੀਐਮਪੀ ਦੇ ਬੁਲਾਰੇ ਚਾਰਲਸ ਪੋਇਰੀਅਰ ਨੇ ਕਿਹਾ ਕਿ ਉਨ੍ਹਾਂ ਨੂੰ ਇੱਕ ਗਰੁੱਪ ਵਲੋਂ ਅਮਰੀਕਾ ਦੀ ਸਰਹੱਦ ਪਾਰ ਕਰਨ ਦੀ ਜਾਣਕਾਰੀ ਮਿਲੀ ਸੀ। ਉਨ੍ਹਾਂ ਦੱਸਿਆ ਕਿ ਪ੍ਰਵਾਸੀਆਂ ਵਿਚ ਇੱਕ ਗਰਭਵਤੀ ਔਰਤ ਅਤੇ 4 ਸਾਲ ਤੱਕ ਦੇ ਬੱਚੇ ਵੀ ਸ਼ਾਮਲ ਸਨ,ਜੋ ਡੀਹਾਈਡਰੇਸ਼ਨ ਦਾ ਸਾਹਮਣਾ ਕਰ ਰਹੇ ਸਨ।
ਉਨ੍ਹਾਂ ਕਿਹਾ ਕਿ ਗੱਡੀ ਵਿਚ ਇਹ ਸਾਰੇ ਪ੍ਰਵਾਸੀ ਤੰਗ ਹਾਲਤ ਵਿਚ ਸਨ ਅਤੇ ਸਾਹ ਲੈਣ ਲਈ ਵੀ ਜਗ੍ਹਾ ਨਹੀਂ ਸੀ। ਇਨ੍ਹਾਂ ਵਿਚ ਜ਼ਿਆਦਾਤਰ ਹੈਤੀਅਨ ਨਾਗਰਿਕ ਸਨ। ਹੋਰ ਵਿਦੇਸ਼ੀ ਨਾਗਰਿਕਾਂ ਬਾਰੇ ਜਾਣਕਾਰੀ ਨਹੀਂ ਦਿੱਤੀ ਗਈ। ਏਜੰਸੀ ਨੇ ਕਿਹਾ ਕਿ ਤਿੰਨੋਂ ਤਸਕਰਾਂ ਦੀ ਬੁੱਧਵਾਰ ਨੂੰ ਅਦਾਲਤ ਵਿਚ ਪੇਸ਼ੀ ਹੋਵੇਗੀ ਅਤੇ ਉਹ ਹਿਰਾਸਤ ਵਿਚ ਹਨ।
