ਲੰਮੇ ਸਮੇਂ ਤੋਂ ਗੜ੍ਹ ਰਹੀ ਟੋਰਾਂਟੋ ਸੈਂਟ ਪਾਲ ਦੀ ਸੰਸਦੀ ਸੀਟ ਪੀਅਰੇ ਪੋਲੀਵਰੇ ਦੀ ਕੰਜ਼ਰਵੇਟਿਵ ਪਾਰਟੀ ਨੇ ਜਿੱਤੀ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਵੱਡਾ ਝਟਕਾ ਲੱਗਾ ਹੈ, ਲਿਬਰਲਸ ਦਾ ਲੰਮੇ ਸਮੇਂ ਤੋਂ ਗੜ੍ਹ ਰਹੀ ਟੋਰਾਂਟੋ ਸੈਂਟ ਪਾਲ ਦੀ ਸੰਸਦੀ ਸੀਟ ਪੀਅਰੇ ਪੋਲੀਵਰੇ ਦੀ ਕੰਜ਼ਰਵੇਟਿਵ ਪਾਰਟੀ ਨੇ ਜਿੱਤ ਲਈ ਹੈ। ਇਹ ਸੀਟ 30 ਸਾਲਾਂ ਦੇ ਵੱਧ ਸਮੇਂ ਤੋਂ ਲਿਬਰਲਸ ਕੋਲ ਸੀ।

ਇਤਿਹਾਸਕ ਗੜ੍ਹ ਗੁਆਉਣ ਨਾਲ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਲੀਡਰਸ਼ਿਪ ’ਤੇ ਪਾਰਟੀ ਅੰਦਰ ਵਿਰੋਧ ਵੱਧ ਸਕਦਾ ਹੈ। ਕੰਜ਼ਰਵੇਟਿਵ ਉਮੀਦਵਾਰ ਡਾਨ ਸਟੀਵਨ ਨੇ ਟੋਰਾਂਟੋ ਸੈਂਟ ਪਾਲ ਦੀ ਜ਼ਿਮਨੀ ਚੋਣ ਵਿਚ 42.1 ਫੀਸਦੀ ਵੋਟ ਹਾਸਲ ਕੀਤੇ। ਉਨ੍ਹਾਂ ਨੇ ਲਿਬਰਲ ਦੀ ਉਮੀਦਵਾਰ ਲੈਸਲੀ ਚਰਚ ਨੂੰ ਸਖ਼ਤ ਮੁਕਾਬਲੇ ਵਿਚ ਹਰਾਇਆ, ਜਿਸ ਨੂੰ 40.5 ਫੀਸਦੀ ਵੋਟ ਮਿਲੇ। ਉਥੇ ਹੀ, ਜਗਮੀਤ ਸਿੰਘ ਦੀ ਐੱਨ. ਡੀ. ਪੀ. ਦੇ ਉਮੀਦਵਾਰ ਅੰਮ੍ਰਿਤ ਪਰਹਾਰ ਮਹਿਜ਼ 10.9 ਫੀਸਦੀ ਵੋਟ ਹੀ ਹਾਸਲ ਕਰ ਸਕੇ।

ਖਾਸ ਗੱਲ ਇਹ ਹੈ ਕਿ ਡਿਪਟੀ ਪ੍ਰਧਾਨ ਮੰਤਰੀ ਕ੍ਰਿਸਟੀਆ ਫ੍ਰੀਲੈਂਡ ਅਤੇ ਇੱਕ ਦਰਜਨ ਹੋਰ ਕੈਬਨਿਟ ਮੰਤਰੀਆਂ ਨੂੰ ਹਲਕੇ ਵਿਚ ਲਗਾਉਣ ਦੇ ਬਾਵਜੂਦ ਲਿਬਰਲ ਪਾਰਟੀ ਆਪਣਾ ਗੜ੍ਹ ਨਹੀਂ ਬਚਾ ਸਕੀ। ਇਸ ਤੋਂ ਸਾਫ ਹੈ ਕਿ ਕੰਜ਼ਰਵੇਟਿਵ ਦੀ ਇਹ ਇਤਿਹਾਸਕ ਜਿੱਤ ਲਿਬਰਲ ਲਈ ਚਿੰਤਾ ਵਧਾਉਣ ਵਾਲੀ ਹੈ ਕਿਉਂਕਿ ਹਾਊਸਿੰਗ ਸੰਕਟ ਤੇ ਮਹਿੰਗਾਈ ਵਰਗੇ ਮੁੱਦਿਆਂ ਨੂੰ ਲੈ ਕੇ ਲਿਬਰਲਸ ਖਿਲਾਫ ਨਾਰਾਜ਼ਗੀ ਵਧੀ ਹੈ।

ਹਾਲਾਂਕਿ ਸਿਆਸੀ ਮਾਹਰਾਂ ਦਾ ਕਹਿਣਾ ਹੈ ਕਿ ਇਹ ਇਲੈਕਸ਼ਨ ਸਿਰਫ ਮੁੱਦਿਆਂ ਬਾਰੇ ਨਹੀਂ ਸੀ ਕਈ ਵੋਟਰਸ ਨੇ ਬਦਲਾਅ ਦੀ ਇੱਛਾ ਨਾਲ ਵੋਟ ਕੀਤੀ। ਮਾਹਰਾਂ ਮੁਤਾਬਕ, ਕੰਜ਼ਰਵੇਟਿਵ ਦੀ ਜਿੱਤ ਟਰੂਡੋ ’ਤੇ ਲਿਬਰਲ ਲੀਡਰ ਵਜੋਂ ਅਹੁਦਾ ਛੱਡਣ ਲਈ ਦਬਾਅ ਪਾਵੇਗੀ।