ਟ੍ਰੈਵਿਸ ਟੋਜ਼ ਨੇ ਯੂ. ਸੀ. ਪੀ. ਲੀਡਰਸ਼ਿਪ ਚੋਣ ਲੜਨ ਲਈ ਫਾਇਨੈਂਸ ਮਿਨਿਸਟਰ ਦੇ ਅਹੁਦੇ ਤੋਂ ਦਿੱਤਾ ਅਸਤੀਫਾ

ਟ੍ਰੈਵਿਸ ਟੋਜ਼ ਨੇ ਐਲਬਰਟਾ ਦੇ ਫਾਇਨੈਂਸ ਮਿਨਿਸਟਰ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਹੈ। ਉਹ ਜੇਸਨ ਕੈਨੀ ਦੀ ਥਾਂ ਲੈਣ ਲਈ ਯੂਨਾਈਟਿਡ ਕੰਜ਼ਰਵੇਟਿਵ ਪਾਰਟੀ (ਯੂ. ਸੀ. ਪੀ.) ਦੇ ਪਾਰਟੀ ਲੀਡਰ ਤੇ ਪ੍ਰੀਮੀਅਰ ਵਜੋਂ ਚੋਣ ਲੜਨ ਦੀ ਤਿਆਰੀ ਵਿਚ ਜੁਟ ਗਏ ਹਨ।

ਟੋਜ਼ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਉਹ ਯੂ. ਸੀ. ਪੀ. ਵਿਚ ਪਈਆਂ ਦਰਾਰਾਂ ਨੂੰ ਠੀਕ ਕਰਨ ਅਤੇ ਪਾਰਟੀ ਦੀਆਂ ਮੁੱਖ ਕਦਰਾਂ-ਕੀਮਤਾਂ ਨੂੰ ਮੁੜ ਸਥਾਪਿਤ ਕਰਨ 'ਤੇ ਧਿਆਨ ਕੇਂਦਰਿਤ ਕਰਨਾ ਚਾਹੁੰਦੇ ਹਨ।

ਕੈਨੀ ਨੇ ਟੋਜ਼ ਦੇ ਅਸਤੀਫੇ ਦੀ ਪੁਸ਼ਟੀ ਕੀਤੀ ਹੈ ਅਤੇ ਫਿਲਹਾਲ ਉਨ੍ਹਾਂ ਦੀ ਜਗ੍ਹਾ ਕਿਸੇ ਹੋਰ ਨੂੰ ਫਾਇਨੈਂਸ ਮਿਨਿਸਟਰੀ ਦੇਣ ਦਾ ਫ਼ੈਸਲਾ ਨਹੀਂ ਕੀਤਾ ਹੈ। 57 ਸਾਲਾ ਟੋਜ਼ ਗ੍ਰਾਂਡੇ ਪ੍ਰੈਰੀ-ਵਾਪਿਟੀ ਹਲਕੇ ਤੋਂ ਪਹਿਲੀ ਵਾਰ ਦੇ ਵਿਧਾਇਕ ਹਨ ਅਤੇ ਅਪ੍ਰੈਲ 2019 ਵਿਚ ਕੈਨੀ ਸਰਕਾਰ ਬਣਨ ਤੋਂ ਬਾਅਦ ਫਾਈਨੈਂਸ ਮਿਨਿਸਟਰ ਸਨ। ਗੌਰਤਲਬ ਹੈ ਕਿ ਲੀਡਰਸ਼ਿਪ ਰੇਸ ਲਈ ਪਾਰਟੀ ਨੇ ਹੁਣ ਤੱਕ ਨਿਯਮ-ਕਾਇਦੇ ਸਥਾਪਿਤ ਨਹੀਂ ਕੀਤੇ ਹਨ ਅਤੇ ਨਾ ਹੀ ਚੋਣ ਲਈ ਕੋਈ ਤਾਰੀਖ਼ ਨਿਰਧਾਰਤ ਕੀਤੀ ਗਈ ਹੈ।