ਪੀ. ਐੱਮ. ਟਰੂਡੋ ਨੇ ਤਿੰਨ ਨਵੇਂ ਸੈਨੇਟਰਾਂ ਦੀ ਨਿਯੁਕਤੀ ਦਾ ਕੀਤਾ ਐਲਾਨ

ਕੈਨੇਡੀਅਨ ਪੁਲਿਸ ਆਰਸੀਐਮਪੀ ਦੇ ਪਹਿਲੇ ਦਸਤਾਰਧਾਰੀ ਸਿੱਖ ਅਧਿਕਾਰੀ ਰਹੇ ਬਲਤੇਜ ਸਿੰਘ ਢਿੱਲੋਂ ਨੂੰ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਸੈਨੇਟ ਲਈ ਨਿਯੁਕਤ ਕੀਤਾ ਹੈ।

ਢਿੱਲੋਂ ਪੁਲਿਸ ਵਿਚ ਲਗਭਗ 30 ਸਾਲਾਂ ਦੇ ਕਰੀਅਰ ਤੋਂ ਬਾਅਦ 2019 ਵਿਚ ਸੇਵਾਮੁਕਤ ਹੋਏ ਸਨ ਇਸ ਦੌਰਾਨ ਉਹ ਇੰਸਪੈਕਟਰ ਦੇ ਅਹੁਦੇ ਤੱਕ ਪਹੁੰਚੇ ਅਤੇ ਆਪਣੀ ਸੇਵਾ ਦੌਰਾਨ ਉਨ੍ਹਾਂ ਨੇ ਸੀਰੀਅਲ ਕਿਲਰ ਰੌਬਰਟ ਪਿਕਟਨ ਤੋਂ ਲੈ ਕੇ ਏਅਰ ਇੰਡੀਆ ਬੰਬ ਧਮਾਕੇ ਦੀ ਜਾਂਚ ਸਮੇਤ ਹੋਰ ਹਾਈ-ਪ੍ਰੋਫਾਈਲ ਮਾਮਲਿਆਂ ਦੀ ਜਾਂਚ ਵਿਚ ਹਿੱਸਾ ਲਿਆ ਸੀ। ਬਲਤੇਜ ਸਿੰਘ ਢਿੱਲੋਂ ਬ੍ਰਿਟਿਸ਼ ਕੋਲੰਬੀਆ ਦੀ ਨੁਮਾਇੰਦਗੀ ਕਰਦੇ ਹਨ।

ਹਾਲ ਹੀ ਵਿਚ ਉਹਨਾਂ ਬ੍ਰਿਟਿਸ਼ ਕੋਲੰਬੀਆ ਦੀਆਂ 2024 ਦੀਆਂ ਸੂਬਾਈ ਚੋਣਾਂ ਵਿਚ ਸਰੀ-ਸਰਪੈਂਟਾਈਨ ਦੀ ਸੀਟ ਤੋਂ ਐਨ.ਡੀ.ਪੀ. ਲਈ ਚੋਣ ਲੜੀ ਸੀ ਪਰ ਉਹ ਦੂਜੇ ਸਥਾਨ 'ਤੇ ਰਹੇ ਸਨ। ਢਿੱਲੋਂ ਦੇ ਨਾਲ ਹੀ ਪੀ. ਐੱਮ. ਜਸਟਿਨ ਟਰੂਡੋ ਨੇ ਕਿਊਬੈਕ ਤੋਂ ਅਰਥਸ਼ਾਸਤਰੀ ਅਤੇ ਸਾਬਕਾ ਡਿਪਲੋਮੈਟ ਮਾਰਟਿਨ ਹੇਬਰਟ ਅਤੇ ਸਸਕੈਚਵਨ ਦੇ ਕਿਸਾਨ ਅਤੇ ਮੌਜੂਦਾ ਸਮੇਂ ਕੈਨੇਡੀਅਨ ਫੈਡਰੇਸ਼ਨ ਆਫ਼ ਐਗਰੀਕਲਚਰ ਦੇ ਉਪ ਪ੍ਰਧਾਨ ਟੌਡ ਲੇਵਿਸ ਨੂੰ ਸੈਨੇਟ ਭੇਜਿਆ ਹੈ।

ਗੌਰਤਲਬ ਹੈ ਕਿ ਸੰਸਦ ਵਿਚ ਕਿਸੇ ਬਿੱਲ ਦੇ ਕਾਨੂੰਨ ਬਣਨ ਤੋਂ ਪਹਿਲਾਂ ਕੈਨੇਡੀਅਨ ਸੈਨੇਟਰ ਦਾ ਮਹੱਤਵਪੂਰਨ ਰੋਲ ਹੁੰਦਾ ਹੈ। ਇਹ ਕੈਨੇਡੀਅਨ ਸੰਸਦ ਦਾ ਉਪਰਲਾ ਸਦਨ ਅਖਵਾਉਂਦਾ ਹੈ।