14.37C Vancouver 14.37C VancouverOct 30, 2025 6:09 PM - Connect Newsroom
ਅਮਰੀਕਾ ਹਰ ਸਾਲ ਦੇਸ਼ ਵਿਚ ਆਉਣ ਵਾਲੇ ਸ਼ਰਨਾਰਥੀਆਂ ਦੀ ਗਿਣਤੀ 7,500 ਤੱਕ ਸੀਮਤ ਕਰ ਰਿਹਾ ਹੈ ਅਤੇ ਇਸ ਵਿਚ ਵੀ ਦੱਖਣੀ ਅਫਰੀਕੀ ਗੌਰਿਆਂ ਨੂੰ ਪਹਿਲ ਦਿੱਤੀ ਜਾਵੇਗੀ। ਇਹ ਜੋਅ ਬਾਈਡੇਨ ਪ੍ਰਸ਼ਾਸਨ ਵਲੋਂ ਪਿਛਲੇ ਸਾਲ ਲਈ ਨਿਰਧਾਰਤ ਕੀਤੀ ਗਈ 125,000 ਸ਼ਰਨਾਰਥੀ ਲੈਣ ਦੀ ਲਿਮਟ ਤੋਂ ਕਾਫ਼ੀ ਘੱਟ ਹੈ।
ਟਰੰਪ ਪ੍ਰਸ਼ਾਸਨ ਵਲੋਂ ਸ਼ਰਨਾਰਥੀ ਸੀਮਾ ਵਿਚ ਇਸ ਵੱਡੀ ਕਟੌਤੀ ਦਾ ਕੋਈ ਖਾਸ ਕਾਰਨ ਨਹੀਂ ਦੱਸਿਆ ਗਿਆ, ਮੀਮੋ ਵਿਚ ਸਿਰਫ਼ ਇਹ ਕਿਹਾ ਗਿਆ ਹੈ ਕਿ ਇਹ ਗਿਣਤੀ ਮਾਨਵਤਾਵਾਦੀ ਚਿੰਤਾਵਾਂ ਕਾਰਨ ਅਤੇ ਰਾਸ਼ਟਰੀ ਹਿੱਤ ਵਿਚ ਜਾਇਜ਼ ਹੈ। ਇਹ ਤਾਜ਼ਾ ਕਦਮ ਅਮਰੀਕਾ ਦੀ ਸ਼ਰਨਾਰਥੀ ਨੀਤੀ ਵਿਚ ਇੱਕ ਵੱਡਾ ਬਦਲਾਅ ਹੈ, ਜਿਸ ਨੇ ਇਤਿਹਾਸਿਕ ਤੌਰ 'ਤੇ ਦੁਨੀਆ ਭਰ ਵਿਚ ਜੰਗ ਅਤੇ ਅੱਤਿਆਚਾਰ ਤੋਂ ਭੱਜਣ ਵਾਲੇ ਲੱਖਾਂ ਲੋਕਾਂ ਨੂੰ ਪਨਾਹ ਦਿੱਤੀ ਹੈ।
ਇਹ ਕਾਰਵਾਈ ਟਰੰਪ ਵਲੋਂ 2025 ਵਿਚ ਆਪਣੇ ਪਹਿਲੇ ਦਿਨ ਦਫ਼ਤਰ ਵਿਚ ਜਾਰੀ ਕੀਤੇ ਇੱਕ ਕਾਰਜਕਾਰੀ ਆਦੇਸ਼ ਤੋਂ ਬਾਅਦ ਕੀਤੀ ਗਈ ਹੈ, ਜਿਸ ਤਹਿਤ ਅਮਰੀਕਾ ਨੇ ਸ਼ਰਨਾਰਥੀ ਦਾਖ਼ਲਾ ਪ੍ਰੋਗਰਾਮ ਨੂੰ ਅਣਮਿੱਥੇ ਸਮੇਂ ਲਈ ਰੋਕ ਦਿੱਤਾ ਸੀ ਅਤੇ ਉਦੋਂ ਤੋਂ ਸਿਰਫ਼ ਇੱਕ ਛੋਟੀ ਜਿਹੀ ਗਿਣਤੀ ਵਿਚ ਸ਼ਰਨਾਰਥੀ ਦੇਸ਼ ਵਿਚ ਦਾਖ਼ਲ ਹੋਏ ਹਨ।
