ਰਾਸ਼ਟਰਪਤੀ ਟਰੰਪ ਨੇ ਅਮਰੀਕੀ ਫੈਡਰਲ ਰਿਜ਼ਰਵ ਦੇ ਨਵੇਂ ਚੇਅਰਮੈਨ ਵਜੋਂ ਕੇਵਿਨ ਵਾਰਸ਼ ਨੂੰ ਕੀਤਾ ਨਾਮਜ਼ਦ

ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਅਮਰੀਕੀ ਫੈਡਰਲ ਰਿਜ਼ਰਵ ਦੇ ਨਵੇਂ ਚੇਅਰਮੈਨ ਵਜੋਂ ਕੇਵਿਨ ਵਾਰਸ਼ ਨੂੰ ਨਾਮਜ਼ਦ ਕੀਤਾ ਹੈ। ਦੱਸ ਦੇਈਏ ਕਿ 55 ਸਾਲਾ ਕੇਵਿਨ ਵਾਰਸ਼ 2006 ਤੋਂ 2011 ਤੱਕ ਫੈਡਰਲ ਰਿਜ਼ਰਵ ਦੇ ਗਵਰਨਰ ਰਹਿ ਚੁੱਕੇ ਹਨ। ਟਰੰਪ ਉੱਚ ਵਿਆਜ ਦਰਾਂ ਨੂੰ ਲੈ ਕੇ ਲੰਮੇ ਸਮੇਂ ਤੋਂ ਮੌਜੂਦਾ ਚੇਅਰਮੈਨ ਜੇਰੋਮ ਪਾਵਲ ਦੀ ਆਲੋਚਨਾ ਕਰਦੇ ਆ ਰਹੇ ਹਨ। ਇਹ ਫੈਸਲਾ ਵਾਈਟ ਹਾਊਸ ਵੱਲੋਂ ਸੈਂਟਰਲ ਬੈਂਕ ‘ਤੇ ਲੰਬੇ ਸਮੇਂ ਤੋਂ ਬਣੇ ਰਾਜਨੀਤਿਕ ਦਬਾਅ ਦੇ ਮਾਹੌਲ ਵਿੱਚ ਲਿਆ ਗਿਆ ਹੈ।

ਜਿਕਰਯੋਗ ਹੈ ਕਿ ਜੇਰੋਮ ਪਾਵਲ ਦਾ ਕਾਰਜਕਾਲ ਮਈ ਵਿੱਚ ਖ਼ਤਮ ਹੋ ਰਿਹਾ ਹੈ ਅਤੇ ਨਵੀਂ ਨਿਯੁਕਤੀ ਨਾਲ ਫੈਡਰਲ ਰਿਜਰਵ ਦੀ ਭਵਿੱਖ ਨੂੰ ਲੈ ਕੇ ਤਿਆਰ ਕੀਤੀ ਨੀਤੀ ਦੀ ਦਿਸ਼ਾ ‘ਤੇ ਵੱਡਾ ਅਸਰ ਪੈ ਸਕਦਾ ਹੈ।

ਮਾਹਰਾਂ ਦਾ ਕਹਿਣਾ ਹੈ ਕਿ ਕੇਵਿਨ ਵਾਰਸ਼ ਇੱਕ ਅਜਿਹਾ ਨਾਮ ਹੈ ਜੋ ਟਰੰਪ ਅਤੇ ਵਿੱਤੀ ਬਾਜ਼ਾਰ ਦੋਵਾਂ ਨੂੰ ਸੰਤੁਸ਼ਟ ਕਰ ਸਕਦਾ ਹੈ। ਨਿਵੇਸ਼ਕਾਂ ਲਈ ਉਹ ਜਾਣਿਆ-ਪਛਾਣਿਆ ਚਿਹਰਾ ਹੈ ਅਤੇ ਟਰੰਪ ਲਈ ਉਹ ਇੱਕ ਐਸੇ ਵਿਅਕਤੀ ਹਨ ਜੋ ਸੈਂਟਰਲ ਬੈਂਕ ਦੀ ਮੌਜੂਦਾ ਨੀਤੀ ‘ਤੇ ਸਵਾਲ ਉਠਾਉਂਦੇ ਰਹੇ ਹਨ।