12.75C Vancouver 12.75C VancouverNov 6, 2020 2:03 AM -
ਅਮਰੀਕੀ ਰਾਸ਼ਟਰਪਤੀ ਚੋਣਾਂ 'ਚ ਡੈਮੋਕ੍ਰੈਟਿਕ ਉਮੀਦਵਾਰ ਜੋ ਬਾਈਡਨ ਨੇ ਭਰੋਸਾ ਜਤਾਇਆ ਹੈ ਕਿ ਚੋਣਾਂ 'ਚ ਜਿੱਤ ਉਨ੍ਹਾਂ ਦੀ ਹੋਵੇਗੀ।
ਉਨ੍ਹਾਂ ਆਪਣੇ ਸਮਰਥਕਾਂ ਨੂੰ ਸਬਰ ਅਤੇ ਸ਼ਾਂਤੀ ਬਣਾ ਕੇ ਰੱਖਣ ਦੀ ਅਪੀਲ ਕੀਤੀ ਹੈ।
ਵੀਰਵਾਰ ਨੂੰ ਦੁਪਹਿਰ ਦੇ ਸਮੇਂ ਜੋ ਬਾਈਡਨ ਨੇ ਸਿਰਫ ਦੋ ਕੁ ਮਿੰਟ ਦੇ ਸੰਬੋਧਨ ਦੌਰਾਨ ਕਿਹਾ ਕਿ ਦੇਸ਼ 'ਚ ਹਰ ਬੈਲੇਟ ਦਾ ਗਿਣਿਆ ਜਾਣਾ ਜ਼ਰੂਰੀ ਹੈ।
ਉਨ੍ਹਾਂ ਕਿਹਾ ਕਿ ਅਜਿਹਾ ਹੀ ਹੋਣਾ ਚਾਹੀਦਾ ਹੈ, ਅਤੇ ਇਸੇ ਨੂੰ ਡੈਮੋਕਰੈਸੀ ਕਹਿੰਦੇ ਹਨ।
ਬਾਈਡਨ ਨੇ ਕਿਹਾ ਕਿ ਅਜਿਹਾ ਹੁੰਦੇ ਵੇਖਣ ਲਈ ਥੋੜੀ ਉਡੀਕ ਅਤੇ ਸਬਰ ਦੀ ਲੋੜ ਹੋਵੇਗੀ।
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਕੋਈ ਸ਼ੱਕ ਨਹੀਂ ਹੈ ਕਿ ਜਦ ਕਾਉਂਟਿੰਗ ਖਤਮ ਹੋਵੇਗੀ ਤਾਂ ਸੈਨੇਟਰ ਹੈਰਿਸ ਅਤੇ ਉਨ੍ਹਾਂ ਦੀ ਜਿੱਤ ਹੋਵੇਗੀ।
ਬਾਈਡਨ ਨੇ ਅਮਰੀਕਾ ਵਾਸੀਆਂ ਨੂੰ ਕਿਹਾ ਕਿ ਪ੍ਰੀਕਿਰਿਆ ਅੱਗੇ ਵਧ ਰਹੀ ਹੈ ਅਤੇ ਜਲਦੀ ਹੀ ਨਤੀਜੇ ਸਭ ਦੇ ਸਾਹਮਣੇ ਹੋਣਗੇ।
ਟ੍ਰੰਪ ਨੇ ਕਿਹਾ "ਲੀਗਲ" ਵੋਟਾਂ ਦੇ ਮਾਮਲੇ 'ਚ ਉਨ੍ਹਾਂ ਨੂੰ ਮਿਲੀ ਹੈ ਜਿੱਤ
ਦੂਜੇ ਪਾਸੇ ਡੌਨਲਡ ਟ੍ਰੰਪ ਨੇ ਦੁਪਹਿਰ ਦੇ ਸਮੇਂ ਆਪਣੇ ਸਮਰਥਕਾਂ ਨੂੰ ਸੰਬੋਧਨ ਕਰਦਿਆਂ ਕਰੀਬ 17 ਮਿੰਟ ਦੀ ਗੱਲਬਾਤ ਦੌਰਾਨ ਸਾਰੇ ਸੂਬਿਆਂ ਦੀ ਕਾਉਂਟਿੰਗ ਦੇ ਵੇਰਵੇ ਸਾਂਝੇ ਕਰਦਿਆਂ ਜ਼ੋਰ ਦਿੱਤਾ ਕਿ ਉਨ੍ਹਾਂ ਨਾਲ ਕਾਉਂਟਿੰਗ ਦੇ ਮਾਮਲੇ 'ਚ ਧੋਖਾ ਹੋਇਆ ਹੈ।
ਉਨ੍ਹਾਂ ਕਿਹਾ, "ਜੇਕਰ ਤੁਸੀਂ ਲੀਗਲ ਵੋਟਾਂ ਦੀ ਗਿਣਤੀ ਕਰੋ ਤਾਂ ਮੇਰੀ ਆਸਾਨੀ ਨਾਲ ਜਿੱਤ ਹੋਈ ਵਿਖਾਈ ਦਵੇਗੀ।
ਜੇਕਰ ਤੁਸੀਂ ਲੇਟ ਜਾਂ ਇਲਲੀਗਲ ਵੋਟਾਂ ਦੀ ਗਿਣਤੀ ਕਰੋ, ਤਾਂ ਉਹ ਸਾਡੇ ਤੋਂ ਚੋਣਾਂ ਖੋਹ ਸਕਦੇ ਹਨ।"
ਜਿੱਤ-ਹਾਰ ਦੇ ਫੈਸਲੇ ਤੋਂ ਬਾਈਡਨ ਕੁਝ ਕਦਮ ਦੂਰ
ਰਿਪਬਲਿਕਨ ਡੌਨਲਡ ਟ੍ਰੰਪ ਅਤੇ ਡੈਮੋਕ੍ਰੈਟ ਜੋ ਬਾਈਡਨ, ਫ਼ਿਲਹਾਲ 270 ਦੇ ਜੇਤੂ ਅੰਕੜੇ ਤੱਕ ਪਹੁੰਚਣ ਵਿੱਚ ਕਾਮਯਾਬ ਨਹੀਂ ਹੋ ਸਕੇ ਹਨ।
ਹਾਲਾਂਕਿ ਕੱਲ ਮਿਸ਼ੀਗਨ ਅਤੇ ਵਿਸਕਾਂਸਿਨ 'ਚ ਜੇਤੂ ਪ੍ਰੋਜੈਕਟ ਹੋ ਚੁੱਕੇ ਜੋ ਬਾਈਡਨ, 264 ਇਲੈਕਟੋਰਲ ਕਾਲਿਜ ਵੋਟਸ ਤੱਕ ਪਹੁੰਚ ਗਏ ਹਨ।
ਟ੍ਰੰਪ ਦੇ ਖਾਤੇ 'ਚ 214 ਇਲੈਕਟੋਰਲ ਵੋਟਸ ਹਨ।
