19.33C Vancouver 19.33C VancouverDec 22, 2025 5:25 PM - Connect Newsroom - Ramandeep Kaur with files from The Canadian Press
ਸਰੀ ਪੁਲਿਸ ਅਤੇ ਫਾਇਰ ਸਰਵਿਸ ਨੂੰ ਨੌਰਥ ਸਰੀ ਇਲਾਕੇ ਵਿਚ ਅੱਗ ਦੀ ਲਪੇਟ ਵਿਚ ਮਿਲੇ ਇੱਕ ਰੀਕ੍ਰੀਏਸ਼ਨਲ ਵਾਹਨ ਦੇ ਟ੍ਰੇਲਰ ਵਿਚੋਂ ਦੋ ਲਾਸ਼ਾਂ ਬਰਾਮਦ ਹੋਈਆਂ ਹਨ। ਇਹ ਘਟਨਾ 102 ਐਵੇਨਿਊ ਦੇ 12200 ਬਲਾਕ ਦੀ ਹੈ। ਸਰੀ ਪੁਲਿਸ ਸਰਵਿਸ ਮੁਤਾਬਕ, ਉਨ੍ਹਾਂ ਨੂੰ ਰਾਤ 9 ਵਜੇ ਦੇ ਕਰੀਬ ਮੌਕੇ 'ਤੇ ਬੁਲਾਇਆ ਗਿਆ, ਜਿੱਥੇ ਫਾਇਰ ਫਾਇਟਰਜ਼ ਇੱਕ ਘਰ ਦੇ ਡਰਾਈਵ ਵੇਅ 'ਤੇ ਆਰਵੀ ਟ੍ਰੇਲਰ ਵਿਚ ਅੱਗ ਬੁਝਾਉਣ ਲਈ ਜੂਝ ਰਹੇ ਸਨ।
ਪੁਲਿਸ ਨੇ ਸੋਮਵਾਰ ਨੂੰ ਇੱਕ ਬਿਆਨ ਵਿਚ ਇਸ ਦੀ ਜਾਣਕਾਰੀ ਦਿੱਤੀ ਅਤੇ ਕਿਹਾ ਕਿ ਮਾਮਲੇ ਦੀ ਜਾਂਚ ਜਾਰੀ ਹੈ। ਅੱਗ ਕਾਰਨ ਸਾਵਧਾਨੀ ਦੇ ਤੌਰ 'ਤੇ ਨਾਲ ਦੇ ਘਰ ਨੂੰ ਖਾਲੀ ਕਰਵਾ ਲਿਆ ਗਿਆ ਸੀ ਪਰ ਪੁਲਿਸ ਦਾ ਕਹਿਣਾ ਹੈ ਕਿ ਇਸ ਘਟਨਾ ਵਿਚ ਹੋਰ ਕਿਸੇ ਨੂੰ ਕੋਈ ਨੁਕਸਾਨ ਨਹੀਂ ਪੁੱਜਾ।
ਘਟਨਾ ਸਥਾਨ ਤੋਂ ਸਾਹਮਣੇ ਆਈਆਂ ਤਸਵੀਰਾਂ ਵਿਚ ਇੱਕ ਡਿਟੈਚਡ ਘਰ ਦੇ ਡਰਾਈਵ ਵੇਅ 'ਤੇ ਅੱਗ ਨਾਲ ਸੜੇ ਆਰਵੀ ਟ੍ਰੇਲਰ ਨੂੰ ਦੇਖਿਆ ਗਿਆ। ਸਰੀ ਪੁਲਿਸ ਸਰਵਿਸ ਦੇ media liaison Ian MacDonald ਨੇ ਦੱਸਿਆ ਕਿ ਮ੍ਰਿਤਕਾਂ ਵਿਚ ਇੱਕ ਔਰਤ ਅਤੇ ਇੱਕ ਪੁਰਸ਼ ਸ਼ਾਮਲ ਸਨ, ਜਿਨ੍ਹਾਂ ਨੂੰ ਘਰ ਦੇ ਰਹਿਣ ਵਾਲੇ ਲੋਕ ਜਾਣਦੇ ਸਨ।
