ਸਰੀ ਵਿਚ ਦੋ ਕਾਰਾਂ ਦੀ ਟੱਕਰ ਦੌਰਾਨ ਤਿੰਨ ਲੋਕ ਹੋਏ ਗੰਭੀਰ ਜ਼ਖ਼ਮੀ

ਸਰੀ ਵਿਚ ਐਤਵਾਰ ਨੂੰ ਦੋ ਕਾਰਾਂ ਦੀ ਟੱਕਰ ਵਿਚ ਤਿੰਨ ਲੋਕ ਗੰਭੀਰ ਜ਼ਖਮੀ ਹੋ ਗਏ। ਇਹ ਟੱਕਰ 128th ਸਟ੍ਰੀਟ ਅਤੇ 65th ਐਵੇਨਿਊ ਦੇ ਖੇਤਰ ਵਿਚ ਵੱਡੇ ਤੜਕੇ 1 ਵਜੇ ਵਾਪਰੀ। ਕਿਹਾ ਜਾਂਦਾ ਹੈ ਕਿ ਬਲੈਕ ਐਸ.ਯੂ.ਵੀ. ਪਹਿਲਾਂ ਰੋਡ ਦੇ ਸੈਂਟਰ ਵਿਚ ਬੈਰੀਕੇਡ ਨਾਲ ਟਕਰਾਈ, ਜਿਸ ਨਾਲ ਇਹ ਹਵਾ ਵਿਚ ਉਛਲ ਗਈ ਅਤੇ ਅੱਗ ਦੀਆਂ ਲਪਟਾਂ ਵਿਚ ਘਿਰ ਗਈ ਤੇ ਫਿਰ ਸਾਹਮਣੇ ਵਾਲੇ ਟ੍ਰੈਫਿਕ ਵਿਚ ਦੂਜੀ ਗੱਡੀ ਨਾਲ ਟਕਰਾਈ ਅਤੇ ਪਲਟ ਗਈ।

ਫਾਇਰਫਾਈਟਰਜ਼ ਨੇ ਕਾਰ ਵਿਚ ਫਸੇ ਦੋ ਲੋਕਾਂ ਨੂੰ ਬਾਹਰ ਕੱਢਿਆ, ਜਿਨ੍ਹਾਂ ਨੂੰ ਜਾਨਲੇਵਾ ਸੱਟਾਂ ਸਨ। ਦੂਜੀ ਗੱਡੀ ਦੇ ਡਰਾਈਵਰ ਨੂੰ ਵੀ ਗੰਭੀਰ ਸੱਟਾਂ ਲੱਗੀਆਂ ਅਤੇ ਉਸ ਨੂੰ ਵੀ ਹਸਪਤਾਲ ਲਿਜਾਇਆ ਗਿਆ।

ਸਰੀ ਪੁਲਿਸ ਸਰਵਿਸ ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਕਰ ਰਹੀ ਹੈ ਅਤੇ ਜਾਂਚਕਰਤਾ ਦਾ ਮੰਨਣਾ ਹੈ ਕਿ ਇਸ ਦਾ ਪ੍ਰਮੁੱਖ ਕਾਰਨ ਤੇਜ਼ ਰਫ਼ਤਾਰ ਸੀ। ਐਸ.ਪੀ.ਐਸ.ਨੇ ਇਸ ਘਟਨਾ ਦੀ ਡੈਸ਼ ਕੈਮ ਫੁਟੇਜ ਜਾਂ ਇਸ ਸਬੰਧੀ ਜਾਣਕਾਰੀ ਰੱਖਣ ਵਾਲਿਆਂ ਨੂੰ ਪੁਲਿਸ ਦੇ ਨਾਨ ਐਮਰਜੈਂਸੀ ਨੰਬਰ 604-599-0502 'ਤੇ ਸੰਪਰਕ ਕਰਨ ਦੀ ਅਪੀਲ ਕੀਤੀ ਹੈ।