ਅਮਰੀਕਾ ਨੇ ਕਿਊਬੈਕ ਦੇ ਫਰਾਂਸੀਸੀ ਭਾਸ਼ਾ ਬਿੱਲ ਨੂੰ ਮੰਨਿਆ ਤਕਨੀਕੀ ਵਪਾਰਕ ਰੁਕਾਵਟ

ਕਿਊਬੈਕ ਦਾ ਫ੍ਰੈਂਚ-ਭਾਸ਼ਾ ਬਿੱਲ 96 ਸੁਰਖੀਆਂ ਵਿਚ ਹੈ, ਅਮਰੀਕੀ ਸਰਕਾਰ ਨੇ ਇਸ ਨੂੰ ਦੋਹਾਂ ਮੁਲਕਾਂ ਵਿਚਕਾਰ ਤਕਨੀਕੀ ਵਪਾਰਕ ਰੁਕਾਵਟ ਵਜੋਂ ਲਿਸਟ ਕੀਤਾ ਹੈ। ਇਹ ਉਦੋਂ ਹੈ ਜਦੋਂ ਟਰੰਪ ਕੈਨੇਡਾ 'ਤੇ ਨਵਾਂ ਪਰਸਪਰ ਟੈਰਿਫ ਲਗਾਉਣ ਦੀ ਤਿਆਰੀ ਕਰ ਰਹੇ ਹਨ। ਅਮਰੀਕਾ ਦੇ ਵਪਾਰ ਪ੍ਰਤੀਨਿਧੀ ਡਿਪਾਰਟਮੈਂਟ ਨੇ ਕਿਹਾ ਕਿ ਅਮਰੀਕੀ ਕੰਪਨੀਆਂ ਕਿਊਬੈਕ ਦੇ ਬਿੱਲ 96 ਨੂੰ ਲੈ ਕੇ ਚਿੰਤਤ ਹਨ, ਜਿਸ ਤਹਿਤ 1 ਜੂਨ ਤੋਂ ਸੂਬੇ ਵਿਚ ਕੰਪਨੀਆਂ ਨੂੰ ਉਤਪਾਦ ਪੈਕਿੰਗ 'ਤੇ ਸ਼ਰਤਾਂ ਅਤੇ ਵੇਰਵਿਆਂ ਨੂੰ ਲਾਜ਼ਮੀ ਤੌਰ 'ਤੇ ਫ੍ਰੈਂਚ ਵਿਚ ਲਿਖਣਾ ਹੋਵੇਗਾ। ਅਮਰੀਕਾ ਨੇ ਇਸ ਨੂੰ ਅਣਉਚਿਤ ਵਪਾਰਕ ਅਭਿਆਸ ਮੰਨਿਆ ਹੈ।

ਇਸ ਦਾ ਕਹਿਣਾ ਹੈ ਕਿ ਕੁਝ ਮਾਮਲਿਆਂ ਵਿਚ ਇਹ ਬਿੱਲ ਅਮਰੀਕੀ ਚੀਜ਼ਾਂ ਨੂੰ ਸੂਬੇ ਵਿਚ ਪੂਰੀ ਤਰ੍ਹਾਂ ਪ੍ਰਵੇਸ਼ ਕਰਨ ਤੋਂ ਰੋਕਦਾ ਹੈ। ਗੌਰਤਲਬ ਹੈ ਕਿ ਕਿਊਬੈਕ ਸਰਕਾਰ ਫ੍ਰੈਂਚ ਭਾਸ਼ਾ ਦੀ ਘਟਦੀ ਵਰਤੋਂ ਦੇ ਮੱਦੇਨਜ਼ਰ ਇਸ ਵਿਚ ਸੁਧਾਰ ਲਈ 2022 ਵਿਚ ਪਾਸ ਕੀਤੇ ਗਏ ਭਾਸ਼ਾ ਦੇ ਸੁਧਾਰ ਸਬੰਧੀ ਬਿੱਲ 96 ਦੇ ਪ੍ਰਬੰਧਾਂ ਨੂੰ ਹੌਲੀ-ਹੌਲੀ ਲਾਗੂ ਕਰ ਰਹੀ ਹੈ।