ਬੀ. ਸੀ. ਵਿਚ ਪਿਛਲੇ ਮਹੀਨੇ ਪਈ ਕੜਾਕੇ ਦੀ ਠੰਢ ਤੋਂ ਬਾਅਦ ਮੌਸਮ ਨੇ ਮੁੜ ਲਈ ਕਰਵਟ

ਬੀ. ਸੀ. ਵਿਚ ਪਿਛਲੇ ਮਹੀਨੇ ਪਈ ਕੜਾਕੇ ਦੀ ਠੰਢ ਤੋਂ ਬਾਅਦ ਹੁਣ ਮੌਸਮ ਨੇ ਮੁੜ ਕਰਵਟ ਲਈ ਹੈ। ਸੂਬੇ ਦੀਆਂ ਪੰਜ ਵੱਖ-ਵੱਖ ਕਮਿਊਨਿਟੀ ਵਿਚ ਇਸ ਹਫ਼ਤੇ ਸਰਦੀਆਂ ਦੇ ਆਮ ਮੌਸਮ ਦੇ ਮੁਕਾਬਲੇ ਰੋਜ਼ਾਨਾ ਉੱਚ ਤਾਪਮਾਨ ਦੇ ਨਵੇਂ ਰਿਕਾਰਡ ਦਰਜ ਕੀਤੇ ਗਏ ਹਨ।

ਇਨਵਾਇਰਮੈਂਟ ਕੈਨੇਡਾ ਅਨੁਸਾਰ, ਵੈਨਕੂਵਰ ਤੋਂ ਲਗਭਗ 150 ਕਿਲੋਮੀਟਰ ਨੌਰਥ ਵਿਚ ਸਥਿਤ ਪੇਂਬਰਟਨ ਵਿਚ ਸੋਮਵਾਰ ਨੂੰ ਤਾਪਮਾਨ 16 ਡਿਗਰੀ ਸੈਲਸੀਅਸ ਤੱਕ ਦਰਜ ਹੋਇਆ, ਇਸ ਨੇ ਪਿਛਲੇ ਸਾਲ ਦੇ 13 ਡਿਗਰੀ ਦੇ ਰਿਕਾਰਡ ਨੂੰ ਤੋੜਿਆ ਹੈ। ਇਸੇ ਤਰ੍ਹਾਂ ਵੈਸਟ ਕੂਟੇਨੇ ਦੇ ਟਰੇਲ ਇਲਾਕੇ ਵਿਚ ਤਾਪਮਾਨ 14 ਡਿਗਰੀ ਦਰਜ ਕੀਤਾ ਗਿਆ, ਜਿਸ ਨੇ 2021 ਦੇ 11 ਡਿਗਰੀ ਦੇ ਰਿਕਾਰਡ ਨੂੰ ਤੋੜ ਦਿੱਤਾ।

ਉਥੇ ਹੀ, ਐਲਬਰਟਾ ਨੇੜੇ ਪੈਂਦੇ ਕ੍ਰੈਨਬਰੂਕ ਵਿਚ ਤਾਪਮਾਨ 12.4 ਡਿਗਰੀ ਰਿਹਾ, ਇਸ ਇਲਾਕੇ ਨੇ 1986 ਵਿਚ 12.1 ਡਿਗਰੀ ਨਾਲ ਰੋਜ਼ਾਨਾ ਉੱਚ ਦਾ ਰਿਕਾਰਡ ਦਰਜ ਕੀਤਾ ਸੀ। ਇਨਵਾਇਰਮੈਂਟ ਕੈਨੇਡਾ ਮੁਤਾਬਕ, ਕਲਿੰਟਨ ਅਤੇ Tatlayoko Lake ਇਨ੍ਹਾਂ ਦੋਵਾਂ ਥਾਵਾਂ 'ਤੇ ਵੀ ਰੋਜ਼ਾਨਾ ਤਾਪਮਾਨ ਦੇ ਨਵੇਂ ਰਿਕਾਰਡ ਬਣੇ ਹਨ।