13.65C Vancouver 13.65C VancouverFeb 3, 2026 5:39 PM - Connect Newsroom - Ramandeep Kaur with files from The Canadian Press
ਵੈਨਕੂਵਰ ਇੰਟਰਨੈਸ਼ਨਲ ਏਅਰਪੋਰਟ ਨੇ ਸਾਲ 2025 ਨੂੰ ਆਪਣੇ ਇਤਿਹਾਸ ਦੇ ਸਭ ਤੋਂ ਸਫਲ ਸਾਲ ਵਜੋਂ ਦਰਜ ਕੀਤਾ ਹੈ। ਹਵਾਈ ਅੱਡੇ ਦੇ ਅਧਿਕਾਰੀਆਂ ਮੁਤਾਬਕ, ਪਿਛਲੇ ਸਾਲ ਯਾਤਰੀਆਂ ਦੀ ਗਿਣਤੀ ਅਤੇ ਕਾਰਗੋ ਸ਼ਿਪਮੈਂਟਸ ਨੇ ਹੁਣ ਤੱਕ ਦੇ ਸਾਰੇ ਅੰਕੜਿਆਂ ਨੂੰ ਪਿੱਛੇ ਛੱਡ ਦਿੱਤਾ ਹੈ।
2025 ਵਿਚ ਹਵਾਈ ਅੱਡੇ ਤੋਂ 26.9 ਮਿਲੀਅਨ ਦੇ ਕਰੀਬ ਯਾਤਰੀਆਂ ਨੇ ਸਫ਼ਰ ਕੀਤਾ। ਇਹ 2024 ਦੇ ਮੁਕਾਬਲੇ 2.7 ਫੀਸਦੀ ਦਾ ਵਾਧਾ ਹੈ। ਇਸ ਤੋਂ ਪਹਿਲਾਂ ਸਭ ਤੋਂ ਵੱਧ ਯਾਤਰੀਆਂ ਦਾ ਰਿਕਾਰਡ 2019 ਵਿਚ 26.3 ਮਿਲੀਅਨ ਬਣਿਆ ਸੀ।
ਏਅਰਪੋਰਟ ਮੁਤਾਬਕ, ਏਸ਼ੀਆ ਪੈਸੀਫਿਕ ਖੇਤਰ ਦੇ ਯਾਤਰੀਆਂ ਦੀ ਗਿਣਤੀ ਵਿਚ ਸਭ ਤੋਂ ਵੱਧ 15.6 ਫੀਸਦੀ ਦਾ ਉਛਾਲ ਦੇਖਿਆ ਗਿਆ। ਘਰੇਲੂ ਯਾਤਰਾ ਵਿਚ ਵੀ 3.8 ਫੀਸਦੀ ਦਾ ਵਾਧਾ ਹੋਇਆ। ਦੂਜੇ ਪਾਸੇ, ਅਮਰੀਕਾ ਲਈ ਸਫ਼ਰ ਕਰਨ ਵਾਲੇ ਯਾਤਰੀਆਂ ਦੀ ਗਿਣਤੀ ਵਿਚ 7.1 ਫੀਸਦੀ ਦੀ ਕਮੀ ਦਰਜ ਕੀਤੀ ਗਈ।
ਇਸ ਤੋਂ ਇਲਾਵਾ ਕਾਰਗੋ ਸ਼ਿਪਮੈਂਟ ਦੇ ਮਾਮਲੇ ਵਿਚ ਹਵਾਈ ਅੱਡੇ ਨੇ ਪਿਛਲੇ ਸਾਲ 365,000 ਟਨ ਮਾਲ ਦੀ ਢੋਆ-ਢੁਆਈ ਰਿਕਾਰਡ ਕੀਤੀ, ਜੋ ਕਿ 2024 ਦੇ ਮੁਕਾਬਲੇ 7.4 ਫੀਸਦੀ ਵੱਧ ਹੈ। ਏਅਰਪੋਰਟ ਪ੍ਰਸ਼ਾਸਨ ਮੁਤਾਬਕ 13 ਨਵੇਂ ਹਵਾਈ ਰੂਟਾਂ ਦੀ ਸ਼ੁਰੂਆਤ ਅਤੇ ਅੰਤਰਰਾਸ਼ਟਰੀ ਮੰਗ ਵਿਚ ਵਾਧਾ ਇਸ ਸਫਲਤਾ ਦੇ ਮੁੱਖ ਕਾਰਨ ਹਨ।
