12.53C Vancouver 12.53C VancouverNov 26, 2020 4:33 PM -
ਵੈਨਕੂਵਰ ਦੇ ਸਿਟੀ ਕਾਉਂਸਲਰਾਂ ਨੇ ਸਰਬਸੰਮਤੀ ਨਾਲ ਫੈਡਰਲ ਸਰਕਾਰ ਤੋਂ ਬਰਾਮਦ ਹੋਏ ਨਾਜਾਇਜ਼ ਨਸ਼ਿਆਂ ਦੀ ਛੋਟੀ ਮਾਤਰਾ ਦਾ ਗੈਰ-ਅਪਰਾਧੀਕਰਨ ਕਰਨ ਦੀ ਮੰਗ ਦੇ ਹੱਕ ਵਿੱਚ ਵੋਟ ਪਾਈ ਹੈ ਯਾਨੀ ਛੋਟੀ ਮਾਤਰਾ ਵਿੱਚ ਨਸ਼ੇ ਬਰਾਮਦ ਹੋਣ 'ਤੇ ਇਸ ਨੂੰ ਕ੍ਰਿਮੀਨਲ ਅਪਰਾਧ ਨਾ ਮੰਨਣਾ।
ਮੇਅਰ ਕੈਨੇਡੀ ਸਟੂਅਰਟ ਵੱਲੋਂ ਇਹ ਮਤਾ ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਪ੍ਰਸਤਾਵਿਤ ਕੀਤਾ ਗਿਆ ਸੀ।
ਸਟੂਅਰਟ ਮੁਤਾਬਕ ਇਹ ਇੱਕ ਸਿਹਤ ਕੇਂਦਰਤ ਪਹੁੰਚ ਹੈ ਅਤੇ ਇਸ ਨਾਲ ਨਸ਼ੀਲੇ ਪਦਾਰਥਾਂ ਦੀ ਵਰਤੋਂ ਕਰਨ ਵਾਲਿਆਂ ਨੂੰ ਬਦਨਾਮੀ ਤੋਂ ਬਚਾਇਆ ਜਾ ਸਕੇਗਾ।
ਸਟੂਅਰਟ ਨੇ ‘ਵੈਨਕੂਵਰ ਏਰੀਆ ਨੈੱਟਵਰਕ ਆਫ ਡਰੱਗ ਯੂਜ਼ਰਜ਼’ ਵਰਗੀਆਂ ਹੋਰ ਸੰਸਥਾਵਾਂ ਦਾ ਧੰਨਵਾਦ ਵੀ ਕੀਤਾ ਜੋ ਪਿਛਲੇ ਕਈ ਸਾਲਾਂ ਤੋਂ ਗੈਰ-ਅਪਰਾਧੀਕਰਨ ਦੇ ਹੱਕ ਵਿਚ ਕੰਮ ਕਰਦੀਆਂ ਆਈਆਂ ਹਨ।
ਸਿਟੀ ਸਟਾਫ ਹੁਣ ਸਿਹਤ ਅਤੇ ਨਿਆਂ ਮੰਤਰੀਆਂ ਸਮੇਤ ਫੈਡਰਲ ਅਧਿਕਾਰੀਆਂ ਨੂੰ ਪੱਤਰ ਲਿਖ ਕੇ ਨਿਯੰਤਰਿਤ ਨਸ਼ੀਲੀਆਂ ਦਵਾਈਆਂ ਅਤੇ ਪਦਾਰਥ ਐਕਟ ਤੋਂ ਛੋਟ ਦੀ ਮੰਗ ਕਰੇਗਾ।
ਜੇ ਇਸ ਨੂੰ ਫੈਡਰਲ ਸਰਕਾਰ ਤੋਂ ਮਨਜ਼ੂਰੀ ਮਿਲ ਜਾਂਦੀ ਹੈ ਤਾਂ ਸਟੂਅਰਟ ਮੁਤਾਬਕ ਉਹ ਵੈਨਕੂਵਰ ਪੁਲਿਸ ਵਿਭਾਗ, ਵੈਨਕੂਵਰ ਕੋਸਟਲ ਹੈਲਥ, ਕਮਿਊਨਿਟੀ ਸਮੂਹਾਂ ਅਤੇ ਨਸ਼ਿਆਂ ਦੀ ਵਰਤੋਂ ਨਾਲ ਤਜਰਬੇ ਵਾਲੇ ਲੋਕਾਂ ਨਾਲ ਕੰਮ ਕਰਨਗੇ ਤਾਂ ਜੋ ਇਹ ਨਿਰਧਾਰਤ ਕੀਤਾ ਜਾ ਸਕੇ ਕਿ ਗੈਰ-ਅਪਰਾਧੀਕਰਨ ਨੂੰ ਕਿਵੇਂ ਲਾਗੂ ਕਰਨਾ ਹੈ।
ਜ਼ਿਕਰਯੋਗ ਹੈ ਕਿ ਬੀ.ਸੀ. ਕੋਰੋਨਰਜ਼ ਸਰਵਿਸ ਵੱਲੋਂ ਜਾਰੀ ਇਕ ਨਵੀਂ ਰਿਪੋਰਟ ਮੁਤਾਬਕ ਸੂਬੇ ਵਿਚ ਅਕਤੂਬਰ ਮਹੀਨੇ ਵਿੱਚ ਨਸ਼ਿਆਂ ਕਾਰਣ 162 ਵਿਅਕਤੀਆਂ ਦੀਆਂ ਜਾਨਾਂ ਗਈਆਂ ਸਨ।
