ਵੈਨਕੂਵਰ ਪੁਲਿਸ ਨੇ ਚਾਕੂ ਦਿਖਾ ਕੇ ਡਰਾਉਣ ਅਤੇ ਸਪਰੇਅ ਪੇਂਟ ਨਾਲ ਹਮਲਾ ਕਰਨ ਦੇ ਦੋਸ਼ 'ਚ ਇਕ ਵਿਅਕਤੀ ਨੂੰ ਕੀਤਾ ਗ੍ਰਿਫ਼ਤਾਰ

ਵੈਨਕੂਵਰ ਪੁਲਿਸ ਨੇ ਇੱਕ 50 ਸਾਲਾ ਸ਼ੱਕੀ ਨੂੰ ਰਾਹਗੀਰ ਨੂੰ ਚਾਕੂ ਦਿਖਾ ਕੇ ਡਰਾਉਣ ਅਤੇ ਸਪਰੇਅ ਪੇਂਟ ਨਾਲ ਹਮਲਾ ਕਰਨ ਦੇ ਦੋਸ਼ ਵਿਚ ਗ੍ਰਿਫ਼ਤਾਰ ਕੀਤਾ ਹੈ। ਪੁਲਿਸ ਮੁਤਾਬਕ, ਘਟਨਾ ਸ਼ਨੀਵਾਰ ਦੀ ਹੈ, ਜਦੋਂ ਇੱਕ ਵਿਅਕਤੀ ਆਪਣੇ ਕੰਮ 'ਤੇ ਜਾ ਰਿਹਾ ਸੀ।

ਪੁਲਿਸ ਨੂੰ 27 ਦਸੰਬਰ ਦੀ ਸਵੇਰ ਲਗਭਗ 9:48 ਵਜੇ ਸ਼ਿਕਾਇਤਕਰਤਾ ਨੇ ਦੱਸਿਆ ਕਿ ਉਹ ਵੈਸਟ ਹੇਸਟਿੰਗਜ਼ ਅਤੇ ਹੈਮਿਲਟਨ ਸਟ੍ਰੀਟ ਨੇੜੇ ਪੈਦਲ ਜਾ ਰਿਹਾ ਸੀ ਅਤੇ ਉਸ ਨੇ ਇੱਕ ਵਿਅਕਤੀ ਨੂੰ ਕੰਧਾਂ 'ਤੇ ਸਪਰੇਅ ਪੇਂਟ ਕਰਦੇ ਹੋਏ ਦੇਖਿਆ, ਜਦੋਂ ਉਸ ਨੇ ਸ਼ੱਕੀ ਨੂੰ ਅਜਿਹਾ ਕਰਨ ਤੋਂ ਰੋਕਿਆ ਤਾਂ ਮੁਲਜ਼ਮ ਨੇ ਕਥਿਤ ਤੌਰ 'ਤੇ ਉਸ ਵੱਲ ਪੇਂਟ ਸਪਰੇਅ ਕੀਤਾ ਅਤੇ ਫਿਰ ਚਾਕੂ ਕੱਢ ਲਿਆ।

ਪੀੜਤ ਨੇ ਤੁਰੰਤ 9-1-1 'ਤੇ ਕਾਲ ਕਰਕੇ ਮਦਦ ਮੰਗੀ। ਮੌਕੇ 'ਤੇ ਪਹੁੰਚੀ ਪੁਲਿਸ ਨੇ ਮੁਲਜ਼ਮ ਨੂੰ ਨੇੜਿਓਂ ਹੀ ਹਿਰਾਸਤ ਵਿਚ ਲੈ ਲਿਆ। ਮੁਲਜ਼ਮ ਦੀ ਪਛਾਣ 50 ਸਾਲਾ ਕ੍ਰਿਸਟੋਫਰ ਚਾਰਲਸ ਹਡਸਨ ਵਜੋਂ ਹੋਈ। ਉਸ 'ਤੇ ਹਥਿਆਰ ਨਾਲ ਹਮਲਾ ਕਰਨ ਅਤੇ ਸ਼ਰਾਰਤ ਦੇ ਚਾਰਜਿਜ਼ ਲਗਾਏ ਗਏ ਹਨ ਅਤੇ ਅਦਾਲਤੀ ਕਾਰਵਾਈ ਤੋਂ ਬਾਅਦ ਹਡਸਨ ਨੂੰ ਜ਼ਮਾਨਤ 'ਤੇ ਰਿਹਾਅ ਕਰ ਦਿੱਤਾ ਗਿਆ ਹੈ।