ਈਸਟ ਵੈਨਕੂਵਰ ਵਿੱਚ ਘਾਤਕ ਹਿੱਟ-ਐਂਡ-ਰਨ ਮਾਮਲੇ 'ਚ ਪੁਲਿਸ ਵੱਲੋਂ ਕੀਤੀ ਜਾ ਰਹੀ ਡਰਾਈਵਰ ਦੀ ਤਲਾਸ਼

ਵੈਨਕੂਵਰ ਪੁਲਿਸ ਵਲੋਂ ਤੜਕਸਾਰ ਈਸਟ ਵੈਨਕੂਵਰ ਵਿਚ ਵਾਪਰੇ ਇੱਕ 'ਹਿੱਟ ਐਂਡ ਰਨ' ਹਾਦਸੇ ਦੀ ਜਾਂਚ ਕੀਤੀ ਜਾ ਰਹੀ ਹੈ, ਜਿਸ ਵਿਚ ਪੈਦਲ ਜਾ ਰਹੀ ਇੱਕ 81 ਸਾਲਾ ਬਜ਼ੁਰਗ ਮਹਿਲਾ ਦੀ ਮੌਤ ਹੋ ਗਈ। ਪੁਲਿਸ ਨੇ ਫ਼ਰਾਰ ਹੋਏ ਡਰਾਈਵਰ ਨੂੰ ਫੜਨ ਲਈ ਜਨਤਾ ਤੋਂ ਮਦਦ ਦੀ ਅਪੀਲ ਕੀਤੀ ਹੈ। ਹਾਦਸਾ ਸਵੇਰੇ 6:30 ਵਜੇ ਦੇ ਕਰੀਬ ਬਾਅਦ ਵਾਪਰਿਆ। ਵੈਨਕੂਵਰ ਪੁਲਿਸ ਅਤੇ ਬੀ.ਸੀ.ਐਮਰਜੈਂਸੀ ਹੈਲਥ ਸਰਵਿਸਸ ਨੂੰ ਸੂਚਨਾ ਮਿਲੀ ਸੀ ਕਿ ਯੂਕਲਿਡ ਐਵੇਨਿਊ ਨੇੜੇ ਰੂਪਰਟ ਸਟ੍ਰੀਟ 'ਤੇ ਇੱਕ ਕਾਰ ਨੇ ਪੈਦਲ ਜਾ ਰਹੀ ਬਜ਼ੁਰਗ ਮਹਿਲਾ ਨੂੰ ਟੱਕਰ ਮਾਰ ਦਿੱਤੀ ਹੈ।

ਟੱਕਰ ਮਾਰਨ ਤੋਂ ਬਾਅਦ ਡਰਾਈਵਰ ਰੁਕਣ ਦੀ ਬਜਾਏ ਕਾਰ ਭਜਾ ਕੇ ਫ਼ਰਾਰ ਹੋ ਗਿਆ। ਬਜ਼ੁਰਗ ਮਹਿਲਾ ਨੇ ਉਸ ਨੂੰ ਹਸਪਤਾਲ ਲਿਜਾਏ ਜਾਣ ਤੋਂ ਪਹਿਲਾਂ ਹੀ ਮੌਕੇ 'ਤੇ ਦਮ ਤੋੜ ਦਿੱਤਾ। ਜਾਂਚਕਰਤਾ ਦਾ ਮੰਨਣਾ ਹੈ ਕਿ ਹਾਦਸੇ ਵਿਚ ਸ਼ਾਮਲ ਗੱਡੀ ਡਾਰਕ ਗ੍ਰੇ ਵੋਲਕਸਵੈਗਨ ਗੋਲਫ ਹੈ, ਜੋ 1990 ਦੇ ਦਹਾਕੇ ਦੇ ਅਖੀਰ ਜਾਂ 2000 ਦੇ ਸ਼ੁਰੂਆਤੀ ਸਾਲਾਂ ਦਾ ਮਾਡਲ ਹੋ ਸਕਦੀ ਹੈ। ਪੁਲਿਸ ਅਨੁਸਾਰ, ਹਾਦਸੇ ਕਾਰਨ ਕਾਰ ਦੇ ਡਰਾਈਵਰ ਵਾਲੇ ਪਾਸੇ ਦਾ ਸ਼ੀਸ਼ਾ ਟੁੱਟਾ ਹੈ। ਇਸ ਤੋਂ ਇਲਾਵਾ ਅਗਲੇ ਬੰਪਰ, ਹੈੱਡਲਾਈਟ ਅਤੇ ਫਰੰਟ ਫੈਂਡਰ 'ਤੇ ਨੁਕਸਾਨ ਦੇ ਨਿਸ਼ਾਨ ਹੋ ਸਕਦੇ ਹਨ।