ਵੈਨਕੂਵਰ ਪੁਲਿਸ ਵੱਲੋਂ ਇੱਕ ਅਣਪਛਾਤੀ ਮਹਿਲਾ ਦੀ ਪਛਾਣ ਕਰਨ ਲਈ ਲੋਕਾਂ ਤੋਂ ਸਹਾਇਤਾ ਦੀ ਕੀਤੀ ਗਈ ਮੰਗ

ਵੈਨਕੂਵਰ ਪੁਲਿਸ ਵੱਲੋਂ ਇੱਕ ਅਣਪਛਾਤੀ ਮਹਿਲਾ ਦੀ ਪਛਾਣ ਕਰਨ ਲਈ ਲੋਕਾਂ ਤੋਂ ਸਹਾਇਤਾ ਦੀ ਮੰਗ ਕੀਤੀ ਗਈ ਹੈ, ਜਿਸ ਦੀ ਪਿਛਲੇ ਮਹੀਨੇ ਸਟ੍ਰੈਥਕੋਨਾ ਸ਼ੈਲਟਰ ਵਿਚ ਇੱਕ ਹਫ਼ਤਾ ਰਹਿਣ ਤੋਂ ਬਾਅਦ ਮੌਤ ਹੋ ਗਈ ਸੀ।

ਪੁਲਿਸ ਮੁਤਾਬਕ, ਇਸ ਮਹਿਲਾ ਨੇ ਆਪਣਾ ਨਾਮ ਸਿਰਫ ਲਿੰਡਸੇ ਦੱਸਿਆ ਸੀ ਅਤੇ ਉਹ 20 ਤੋਂ 21 ਦਸੰਬਰ ਦੀ ਦਰਮਿਆਨੀ ਰਾਤ ਨੂੰ ਸ਼ੈਲਟਰ ਵਿਚ ਆਈ ਸੀ, ਜਿੱਥੇ ਉਹ ਸੱਤ ਰਾਤਾਂ ਰਹੀ ਅਤੇ 27 ਦਸੰਬਰ ਦੀ ਸ਼ਾਮ ਨੂੰ ਆਪਣੇ ਬਿਸਤਰੇ 'ਤੇ ਮ੍ਰਿਤਕ ਪਾਈ ਗਈ। ਈਸਟ ਕੋਰਡੋਵਾ ਸਟ੍ਰੀਟ 'ਤੇ ਸਥਿਤ ਇਸ ਸ਼ੈਲਟਰ ਦੇ ਕਰਮਚਾਰੀਆਂ ਨੇ ਦੱਸਿਆ ਕਿ ਮਹਿਲਾ ਬਹੁਤ ਘੱਟ ਇੰਗਲਿਸ਼ ਬੋਲਦੀ ਸੀ ਅਤੇ ਉਹ ਇੱਥੇ ਪਹਿਲਾਂ ਕਦੇ ਨਹੀਂ ਆਈ ਸੀ।

ਪੁਲਿਸ ਮੁਤਾਬਕ, ਮ੍ਰਿਤਕ ਮਹਿਲਾ ਦੀ ਉਮਰ 65 ਤੋਂ 75 ਸਾਲ ਵਿਚਕਾਰ ਹੋਣ ਦਾ ਅਨੁਮਾਨ ਹੈ ਅਤੇ ਉਹ ਏਸ਼ੀਆਈ ਮੂਲ ਦੀ ਜਾਪਦੀ ਸੀ। ਵੈਨਕੂਵਰ ਪੁਲਿਸ ਨੇ ਕਿਹਾ ਕਿ ਮਹਿਲਾ ਦੀ ਮੌਤ ਪਿੱਛੇ ਕੋਈ ਅਪਰਾਧਿਕ ਕਾਰਨ ਨਹੀਂ ਜਾਪਦਾ ਅਤੇ ਉਸ ਦੀ ਗੁੰਮਸ਼ੁਦਗੀ ਦੀ ਵੀ ਕੋਈ ਰਿਪੋਰਟ ਦਰਜ ਨਹੀਂ ਸੀ। ਪੁਲਿਸ ਹੁਣ ਉਸ ਦੇ ਪਰਿਵਾਰ ਜਾਂ ਜਾਣਕਾਰਾਂ ਤੱਕ ਪਹੁੰਚਣ ਦੀ ਕੋਸ਼ਿਸ਼ ਕਰ ਰਹੀ ਹੈ।